Абмяняліся ветласцямі. От Цянак адказаў Кале Раванпэры перамогай на Ралі Фінляндыя

Фота: wrc.com

Амаль увесь бягучы сезон чэмпіянату свету па ралі праходзіць пад дыктоўку маладога фіна з завадской Таёты Кале Раванпэры. Аднак на хатнім этапе перамагчы ў яго не атрымалася – там бліснуў гоншчык Hyundai От Цянак.

Якія б цікавыя ў свеце ні праходзілі гонкі, не варта забывацца, што ў гэты ж час агрэсар катуе Украіну. Замутнены розум расійскага дыктатара і яго комплекс непаўнавартаснасці прывялі яго да думкі, што наспеў час пашыраць тэрыторыю сваёй імперыі, і што усе вакол яму падпарадкуюцца, як гэта даўно зрабіў мясцовы калгасны дыктатар, які прадаў яму Беларусь, каб усядзець на троне.

З Украінай і ўкраінцамі ў вар’ята атрымаўся аблом, і замест бліцкрыгу рускі фашызм атрымаў пастку, з якой не будзе прымальнага для яго выйсця. Толькі і застаецца, што шантажаваць свет ядзернай катастрофай і слаць на верную смерць новае гарматнае мяса. Украіна – не Расія, і яе грамадзяне сваю радзіму любяць па-сапраўднаму, таму вызваленне яе захопленых частак застаецца пытаннем часу.

Такім жа пытаннем ёсць і ваенная параза агрэсара, а значыць, і вызваленне Беларусі, рэжым у якой апошнія два гады трымаецца выключна за кошт свайго расійскага гаспадара. Беларусы дапамагаюць украінцам разбіць яго, і змагаюцца і за нас. Слава Україні! Героям Слава! Верым! Можам! Пераможам! Жыве Беларусь!

Сваёй дурнотай Расія дабілася, каб яе спартсменаў, у тым ліку гоншчыкаў, або выганялі з сусветных серый, або забаранялі ім выступаць пад расійскай сімволікай. А на Ралі Фінляндыя карыстацца ёй забаранілі нават расійскім балельшчыкам, хаця ім гэтым разам балець не было за каго. Усё шоу рабілі ў асноўным мясцовыя зоркі і суседзі з Эстоніі, як той жа от Цянак.

Гэты сезон WRC выдаецца складаным для ўсёй каманды Hyundai. Сам чэмпіён 2019 года перамог дагэтуль толькі на Ралі Сардынія, а вось на сваім хатнім эстонскім ралі саступіў лідару чэмпіянату – юнаму і таленавітаму Кале Раванпэры і яго партнёру па Таёце Элфіну Эвансу. Фін натуральна наважваўся парадаваць і сваіх суайчыннікаў, і, па вялікім рахунку, справіўся з задачай, хоць і не падняўся на вяршыню подыуму хатняга ралі.

Павольным Раванпэра на гравійных дарогах у наваколлях Ювяскюля не быў. Хаця на самым пачатку не быў і ў ліку самых хуткіх, хіба што на шэйкдаўне лепшы час паказаў. На першым жа допе – суперспэшле ў чацвер – на першай пазіцыі апынуўся Цьеры Нэвіль. Але ўжо раніцай наступнага дня бельгіец аддаў ініцыятыву свайму партнёру па камандзе Цянаку.

От лідзіраваў таго самага моманту і да фінішу апошняга суперспэшла ў нядзелю. Не перашкодзіла яму нават непрадказальнае надвор’е у суботу, якое ўсё ж выявілася пэўнай складанасцю для Раванпэры. Што, аднак, не перашкодзіла яму апярэдзіць Эванса і яшчэ аднаго прадстаўніка Таёты Эсапеку Лапі і падняцца на другую пазіцыю па выніках шаснаццатага спецучастка.

З таго моманту ўсё ішло роўна і для Кале, а ў нядзелю на тым самым фінальным суперспэшле ён нават стаў найхутчэйшым, зарабіўшы пяць бонусных балаў, а адставанне ад Цянака скараціў да 6,8 секунды. Нядрэнна выступіў і Лапі, які заняў трэцяе месца. Не перашкодзіў яму ў гэтым нават пераварот на перадапошнім дваццаць першым допе, у выніку якога яго GR Yaris Rally1 застаўся без лабавога шкла. Фінальны доп экіпаж пераадольваў без яго і ў мотакросавых масках.

Поспех Цянака, канечне, не пахіснуў лідарства Раванпэры ў чэмпіянаце – у Кале 198 ачкоў супраць 104 у Ота. Затое эстонец разам падняўся на другую пазіцыю. Нэвіль, які ў Фінляндыі заняў пятае месца, у турнірнай табліцы цяпер трэці, ад Цянака ён адстае на адзін бал. Toyota ўсё так жа ўпэўнена лідзіруе ў заліку вытворцаў, маючы 339 ачкоў. Hyundai на другой пазіцыі з 251 балам, у M-Sport Ford 174 ачкі, ён трэці.

Hyundai у Фінляндыі адзначыліся былі перамогай і ў катэгорыі WRC2, але… Мясцовы любімец Цеему Сунінен, як і Цянак, пралідзіраваў ад старту да фінішу, а потым быў дыскваліфікаваны за парушэнне тэхнічнага рэгламенту. Пярэдні бампер яго i20 N Rally2 замест мінімальна дапушчальных 4 510 грамаў важыў 3 931. Дэталь была вырабленая не Hyundai Motorsport і была ўсталяваная для тэстаў, а потым па недагляду не была замененая арыгінальнай.

Перамога ў выніку адышла таксама да фіна – Эміля Ліндхольма. Ён на сваёй Škoda Fabia Rally2 увесь час быў не надта павольнейшым за Сунінена, і на фінішы саступіў таму ўсяго 7,7 секунды. Пры гэтым эстонца Эгона Каура на Volkswagen Polo GTI, які заняў другое месца, Ліндхольм апярэдзіў амаль на дзве хвіліны, а былога ўдзельніка галоўнага чэмпіянату Хэйдэна Пэдана на Hyundai i20 N Rally2 – крыху болей чым на дзве.

У WRC3, дзе ўсе ўдзельнікі стартуюць на аднолькавых Ford Fiesta Rally 3, абышлося без парушэнняў правіл і дыскваліфікацый, і яшчэ адзін прадстаўнік Фінляндыі Лаўры Йоона перамог чыста. Чэха Яна Чэрнага, які заняў другое месца, ён апярэдзіў болей чым на чатыры хвіліны, а свайго суайчынніка Генры Ціманена – болей чым на васямнаццаць. Чысцейшая перамога, іначай і не скажаш. Такая, якая чакае Украіну.

Удзельнікаў жа чэмпіянату свету па ралі чакае яшчэ пяць этапаў. Наступным стане Ралі Грэцыя, яно ж Ралі Акропаліс, якое пройдзе 18-21 жніўня.