Адкласці на заўтра. Цмокам не скарыўся «Урал»

У пятым туры Топ -16 Еўрачэленджа "Цмокі" маглі забяспечыць не толькі выхад у чвэрцьфінал, але і першае месца ў групе L. Але, на жаль, ваяж у Екацярынбург не прынёс нашай камандзе станоўчых эмоцый. У напружанай барацьбе з нязначнай перавагай вікторыю атрымалі гаспадары, што аднак не перашкодзіла "Цмокам" выйсці ў плэй-оф Еўрачэленджа.

У тым, што нашу каманду чакае няпросты паядынак, мы былі ўпэўненыя задоўга да яго пачатку. Як-ніяк, "драконам" павінны былі пазмагацца з галоўным канкурэнтам за верхняе месца ў групе, якое да таго ж падапечныя Кайрыса саступілі ў першым крузе (гэта было іх адзінае паражэнне ў першых чатырох сустрэчах Топ-16). Акрамя таго, цяжкі двухавертаймавы паядынак з "Азоўмашам" і стартавае ўкідванне ў Екацярынбургу падзялілі крыху больш двух сутак.

Зразумела, што пра поўнае аднаўленне баскетбалістаў беларускага калектыву не магло быць і гаворкі. Таму і няхітра, што першыя хвіліны матчу прывялі ў роспач. "Урал", які падтрымліваецца аднымі з самых адданых балельшчыкаў у краіне, спуртануў 12:1, пры гэтым палову ачкоў сабраў у хуткіх адрывах, а 10 балаў - з дапамогай нападаў з трохсекунднай зоны. Само сабой, пасля няўдалага пачатку літоўскі настаўнік гасцей узяў тайм-аўт, які, што радуе, злёгку супакоіў разгарачанага апанента. Акрамя таго, пасля перапынку наша каманда прыкметна ўмацавала абарончыя рэдуты, адсунуўшы акцэнт гаспадарскіх нападаў на перыметр. "Дальнабойную артылерыю" гаспадароў, зрэшты, таксама трэба было баяцца. Аднак на дузе менчукі абараняліся добра - і вымушалі візаві перманентна страляць у малако.

Магчыма, дастойная абарона на перыметры дазволіла б "драконам" вырвацца наперад задоўга да вялікага перапынку. Калі б не адно нечаканае "але". У самы непадыходны момант слабіну даў адзін з самых моцных бакоў беларускага чэмпіёна. Лідары Еўрачэленджа па колькасці падбораў раз за разам дазвалялі "Уралу" адваёўваць адскокі на чужым шчыце. Толькі ў першай палове гульцы расійскага клуба сабралі 9 такіх падбораў (4 з іх - на рахунку Макгі). Як следства, гаспадары мала таго, што часцяком атрымлівалі магчымасці для нападаў другім тэмпам, дык яшчэ і практычна не дазвалялі "Цмокам" арганізоўваць хуткія адрывы. Пазіцыйнай жа атацы падапечныя Акулава да пары да часу супрацьдзейнічалі вельмі нядрэнна.

Зрэшты, нават нягледзячы на згаданыя складанасці, у другой чвэрці госці змаглі падабрацца да візаві. У прыватнасці, у сярэдзіне перыяду здзейснілі міні-рывок 6:0, які вянчаў Мікіта Мешчаракоў. Ну а на вялікі перапынак і зусім сышлі з нязначным адставаннем у 3 ачкі дзякуючы Міркавічу, скарыстаўшыся нераўнацэнным разменам і вызначыліся ў праходзе за лічаныя імгненні да сірэны.

Добра, што ў ролі адстаючых мінчукі знаходзіліся нядоўга. Трапленні Бэнсана і Харпера з-пад кольца ўпершыню ў матчы вывелі гасцей наперад менш чым праз хвіліну пасля аднаўлення гульні. Акрамя таго, наша каманда пакінула за сабой і чвэрць ў цэлым. Па іншаму, зрэшты, і быць не магло, бо ў трэцім перыядзе "драконы" рэалізавалі 10 з 12 кідкоў з гульні! Выключыць б некалькі крыўдных страт, ды не злаві кідок снайперы гаспадароў (у адрозненне ад першай паловы, у трэцяй 10-хвілінцы яны стралялі з-за дугі рэдка, але трапна, адправіўшы ў мэту 4 далёкія спробы з 5) - і перавага "Цмокаў" аказалася б куды больш унушальнай. Зрэшты, і без таго 3 балы перавагі, з якімі Ульянка і кампанія падыходзілі да заключнай чвэрці, усялялі аптымізм. 

Ён, праўда, разышоўся на старце апошняга перыяду. Ці жарт, амаль чатыры хвіліны госці не маглі набраць ніводнага ачка, пакуль, нарэшце, Харпер не падправіў промах Трасцінецкага. У дадатак не цешыла і сітуацыя з фаламі. У прыватнасці, па ходзе няўдалага адрэзка чацвёртую персанальную заўвагу атрымаў Міркавіч. Добра хоць, што на гаспадароў знайшла нязвыклая хандра пры выкананні штрафных. Толькі за пару абаротаў секунднай стрэлкі ў апошняй чвэрці гульцы "Урала" змазалі больш спроб з лініі, чым за ўсю папярэднюю сустрэчу. Зрэшты, то было слаым суцяшэннем. Асабліва калі ўлічыць, што за 4 з лішнім хвіліны да сірэны Фліс далёкім трапленнем давёў перавагу да "+5" і вымусіў Кайрыса браць чарговы тайм-аўт, а таксама вярнуць на паркет сербскага разыгрываючага.

Перапынак разам з ракіроўкай на нейкі час даў гаючы эфект. Мінчукі не толькі падабраліся ўшчыльную, але і не дазвалялі апаненту вызначыцца на працягу 3 з лішнім хвілін - да той пары, калі Харыс кідком зверху давёў перавагу расейскага клуба да "+3" за 46 секунд да сірэны. На жаль, у далейшым ні Харперу, ні Міркавічу не ўдалося скараціць дэфіцыт. Як следства, разам з перамогай "Урал" атрымаў пуцёўку ў чвэрцьфінал Еўрачэленджа разам з першым месцам у групе.

Пасля таго, як фінская "Котка" ў вячэрнім матчы аўторка аказалася мацнейшай за дацкі "Бакен" 82:79, баскетбольны чэмпіён Беларусі аказаўся недасягальны для абодвух скандынаўскіх праследавацеляў. А гэта значыць, што сталічны клуб разам з расійскім "Уралам" заваяваў пуцёўку ў плэй-оф Еўрачэленджа сезона-2013/14 ад групы "L". Нагадаем, што так далёка ў клубных міжнародных турнірах яшчэ не дабіралася ні адна з каманд у гісторыі суверэннага беларускага баскетбола. Віншуем нашых хлопцаў са знамянальным дасягненнем і жадаем ім поспеху ў накаўт-раўндзе! 

УРАЛ - ЦМОКІ-МІНСК - 69:65 (20:12, 18:23, 18:24, 13:6)

Екацярынбург. 18 студзеня

УРАЛ: Глазуноў (7 + 9 пас), Харыс (12), Нікалаеў (9), Фліс (12), Макгі (8 + 16 пад); Арцешын (9), Карчагін (6), Васкрасенскі (3), Ключнікаў (3), Баранаў (0), Чарамных (0), Кузняцоў (н.в.).

ЦМОКІ-МІНСК: Міркавіч (12), Харпер (11 + 7 пад), Ульянка (1), Коршук (0), Бэнсан (18 + 11 пад); Хантэр (10), Лашкевіч (7), Бразелтан (2), Мешчаракоў (2), Трасцінецкі (2 + 6 пад), Лютыч (0).

Фота: прэс-служба БК "Урал"