Азіяцкі ваяж
У 15-м туры Адзінай лігі ВТБ «Цмокі» сустрэлася з галоўным канкурэнтам за трапленне ў плэй-оф і, на жаль, пацярпелі паразу. Наша каманда, якая змагалася з «Астаной» на роўных палову першай чвэрці, у далейшым прапусціла рывок суперніка - і ўжо да яго не падабралася. Нават нягледзячы на перыядычныя ўсплёскі Лютыча, Бразелтана і Ульянкі.
Яшчэ ў анонсе супрацьстаяння мы згадвалі пра важнасць казахстанскага паядынку для нашай каманды. Як-ніяк, перад стартавым укідваннем "Астана" размяшчалася на шостым месцы ў групе B, апярэджваючы мінчукоў на 2 перамогі (маючы 2 сустрэчы ў запасе). Іншымі словамі: для працягу барацьбы за плэй-оф "драконам" кроў з носу патрабавалася вікторыя. Паражэнне ж практычна гарантавала беларускаму клубу нетрапленне ў стадыю накаўт-раўнда. Між тым усе мы разумелі, што здабыць поспех на азіяцкіх землях няпроста. Бо пасля змены галаўкама тамтэйшы калектыў змяніўся. Як следства, узгрувасціўся на жаданы шосты радок, а заадно і прымусіў яго баяцца.
Як паказаў ужо дэбют сустрэчы, асцерагаліся мы не дарма. Так, першыя хвіліны госці змагаліся з візаві на роўных. Пасля чаго празвінела некалькі гучных і непрыемных для нас званочкаў. Па-першае, не прайшло і 5 хвілін, як 2 персанальных заўвагі атрымаў Бэнсан - і, само сабой, адправіўся на лаўку. Па-другое, у чарговы раз уразіла хуткасць, з якой гаспадары накіроўваліся ў хуткія адрывы. У гэтыя моманты яны нагадвалі веласіпедыстаў, якія раскочваюцца звычайна на веладроме, дзе і праходзіла гэтая сустрэча. Нарэшце, па-трэцяе, яшчэ ў першай чвэрці падапечныя Трыфуновіча ўдала апрабавалі прэсінг па ўсёй пляцоўцы. Мала таго, што аднойчы мінчукі не паспелі вывесці мяч праз цэнтральную лінію за пакладзены час, так і падобная стратэгія начыста выбіла "драконаў" з кідковага рытму. На выхадзе ж мы атрымалі рывок гаспадароў 13:2 і 11 ачкоў адставання.
За выпраўленне сітуацыі ўзяліся рэзервісты нашай каманды. У прыватнасці, удала выйшаў з лаўкі Лютыч, якога апанент некалькі разоў неабдумана пакідаў у куце ў адзіноце. Двойчы адрозніваўся з-за дугі Бразелтан. Але, на жаль, уколы гульцоў беларускага калектыву ніяк не звязваліся ў паслядоўнасць. У выніку незадоўга да вялікага перапынку "Цмокі" і зусім гарэлі "-15". Добра, што другое далёкае трапленне Ульянкі запар, а таксама дакладны кідок Лашкевіча пасля розыгрышу "двойкі" злёгку скарацілі дэфіцыт.
Аднак становішча спраў на пляцоўцы ўсё яшчэ не ўсяляла аптымізм. Узмацніў паніку нашых заўзятараў пачатак трэцяй чвэрці, у якім Блумс і Сайман на дваіх збудавалі рывок 7:0 і давялі перавагу "Астаны" да жахлівых 17 балаў. Але што самае сумнае, вялікая перавага Джонсана і сяброў ніяк не рассейваўся. На кожныя штрафныя Міркавіча даводзілася трапленне Лаваля. На "энд-уан" Бэнсана - тры ачкі Блумса і гэтак далей. Калі ж у канцоўцы трэцяй чвэрці яшчэ і злавіў кураж Джонсан, які набраў 5 ачкоў каманды запар, перавага "Астаны" дасягнула ўжо "23".
Так, у пачатку чацвёртага перыяду "драконы" на час страпянуліся. За паўтары хвіліны Лютыч рэалізаваў 2 штрафных і аддаў 2 выніковыя перадачы (на Хантэра і Бразелтана), чым дапамог гасцям здзейсніць рывок 7:0 і прымусіць апанента браць тайм-аўт. Больш за тое, неўзабаве пасля сярэдняга траплення Бразелтана Цмокі і зусім скарацілі адставанне да "-15". Але, на жаль, супраціў з боку апанента "Астана" спыніла аператыўна, адказаўшы спуртам 7:0. У той момант непазбежнасць паражэння напэўна ўсвядомілі нават самыя адданыя і аптымістычна настроеныя заўзятары нашай каманды.
У выніку казахстанскі клуб зрабіў чарговы крок у кірунку да плэй-оф. Будзем аб'ектыўныя: па той гульні, якую прадэманстравалі падапечныя Трыфуновіча, яны відавочна заслугоўваюць траплення ў накаўт-раўнд. Што ж тычыцца нашай каманды, то восьмае паражэнне запар, па сутнасці, адкінула іх з пула прэтэндэнтаў на выхад у наступную стадыю. Што, зрэшты, не пазбаўляе падапечных Кайрыса турнірнай матывацыі. Бо чым вышэй каманда фінішуе ў групавым раўндзе, тым больш у яе шанцаў на захаванне месца ў лізе ВТБ на наступны сезон.
АСТАНА - ЦМОКІ-МІНСК - 99:82 (27:16, 23:24, 29:16, 20:26)
Астана. 22 лютага
АСТАНА: Джонсан (18 + 9 пас), Цветкавіч (11), П.Калецес (11 + 7 пад), Калеснікаў (7), Сайман (14 + 7 пад); Блумс (18), Лаваль (12 + 8 пад), Клімаў (6), Раш (2), Мурзагаліеў (0), Лапчанка (0), Марчук (0).
ЦМОКІ-МІНСК: Міркавіч (11 + 7 пас), Харпер (0), Трасцінецкі (9), Ульянка (10), Бэнсан (16); Бразелтан (11), Лютыч (10 + 6 пас), Хантэр (7), Мешчаракоў (6), Лашкевіч (2), Коршук (н.в.).
