Барбашынскi пра словы Махневай: «Чалавек тут нарадзіўся, жыве – і кажа, што беларуская мова ня мае будучыні. Ну гэта абсурд! Хоць бы крыху думала»
Алiмпiйскi чэмпiён па гандболе Андрэй Барбашынскi для «Радыё свабода» распавеў, як ставіцца да калегаў-спартоўцаў, якія грэбліва выказваюцца пра «мёртвы язык»? Апошнім такім прыкладам – алімпійская прызэрка, вясьлярка Маргарыта Махнева, якая заявіла «Прессболу», што беларуская мова «нікому не патрэбна».
«Разумею, што выказала сваю пазыцыю. Але як па мне, дайце ёй вясло, хай адграбае далей... Паслухайце, чалавек тут нарадзіўся, жыве – і кажа, што беларуская мова ня мае будучыні. Ну гэта абсурд! Хоць бы крыху думала. Згодны, чыста па-жыцейску зручней размаўляць па-расейску, так склалася. Але мова — наш падмурак, наша гісторыя. Яе трэба вывучаць, пашыраць, прасоўваць. Вось тады будзе здорава. Колькі людзей, якія прынцыпова размаўляюць па-беларуску — яны што, «непэрспэктыўныя»? Калі беларус, то вельмі кепска, што няма жаданьня гаварыць на роднай мове.
Чым мы адрозьніваемся ад палякаў, немцаў, французаў? Перадусім мовай! Пастаўце вас сярод ангельцаў, хто наўскідку скажа, што вы не ангелец? І ня будуць ведаць да таго часу, пакуль не пачняце гаварыць.
Стагодзьдзямі людзі зьмешваліся, насіліся туды-сюды з войнамі, набегамі. Якіх толькі міграцый не было. Але ж кожны народ стараўся захаваць сваю адметнасьць. І што, цяпер я мушу сказаць, што беларуская мова ня мае пад сабой ніякай гістарычнай асновы? Ня будзе такога. А хто не разумее, хай хоць крыху пацікавіцца, хто мы і адкуль...» – сказаў Барбашынскi.
