Да абароны тытулу гатовы! Дзейсны чэмпіён Еўропы па ралі Аляксей Лук’янюк пачаў новы сезон ERC з перамогі ў Польшчы

Фота: fiaerc.com

У мінулы ўік-энд у польскіх Мікалайках свой сезон пачаў нарэшце і чэмпіянат Еўропы па ралі. Перамогу на першым этапе атрымаў расіянін Аляксей Лук’янюк.

Перамагаць у еўрапейскім ралійным першынстве Лукасу не прывыкаць – ён яго не проста дзейсны, а двухразовы чэмпіён. І перад стартам новага сезону масквіч быў матываваны да замацавання свайго статусу. А канкурэнты наважваліся кінуць яму выклік.

Толькі спачатку Аляксей сам крыху ўскладніў сабе жыццё, патрапіўшы ў аварыю падчас трэніровак напачатку тыдня, у якой моцна пашкодзіў свой Citroën C3 Rally2. Аднак механікі яго каманды Saintéloc  Junior Team паспяхова адрамантавалі аўтамабіль да пачатку спаборніцтва.

Ну а там ужо ў справу ўступілі і супернікі Аляксея. І ў першую чаргу яго малады суайчыннік Мікалай Гразін, які выступае на Volkswagen Polo GTI R5. Гэта ён узначаліў пратакол ралі Польшчы пасля першага спецучастку, чаму паспрыяў яго першы вынік на шэйкдаўне, што дазволіў яму першаму выбіраць болей зручнае месца ў чарзе стартоўцаў.

Пры гэтым вынікі пасля першага допу былі настолькі шчыльнымі, што Лук’янюк размясціўся толькі на трынаццатай пазіцыі, саступіўшы Гразіну меней чым дзве з паловай секунды. Праўда, ужо пасля другога спецучастка Аляксей падняўся на другую пазіцыю, аднак яго адставанне ад Мікалая складала ўжо амаль 36 секунд.

Далей яно толькі расло, і ўсё ішло да другой у кар’еры Гразіна перамогі на этапе ERC, але ўсё перакрэслілі праколы абедзвюх пярэдніх шын на перадапошнім з суботніх і сёмым па ліку 28,7-кіламетровым спецучастку Wieliczki 2. Запасное кола пры гэтым у яго было толькі адно, што азначала фактычны сход з дыстанцыі.

Лук’янюк жа на тым допе быў найхутчэйшым, узначаліўшы пасля яго і агульны залік. Пераследнікі ў яго пры гэтым засталіся дужыя. Узяць хаця б галоўнага з іх – дасведчанага ў тым ліку ў чэмпіянаце свету Андрэаса Мікельсэна (адзінага двухразовага чэмпіёна ўжо не існуючай серыі IRC, якую пасля 2012 года аб’ядналі як раз з чэмпіянатам Еўропы) на Škoda Fabia Rally2 Evo каманды Toksport WRT.

Ды і таксама вядомы што па ERC, што па WRC Крэйг Брын быў дастаткова хуткім, каб паспрачацца як мінімум за подыум. Што ён і рабіў, пакуль на ўсё тым жа сёмым спецучастку ўсяго за адзін кіламетр да фінішу не зламалася падвеска яго Hyundai i20 R5. Да гонару ірландца, ён, вярнуўшыся ў нядзелю ў спаборніцтва па сістэме Rally 2, выйграў тры спецучасткі з шасці, у выніку, праўда, заняўшы толькі сорак пятае месца.

За подыум жа пасля непрыемнасцей у Брына з Гразіным пачаў біцца мясцовы гоншчык Міка Марчык на Škoda Fabia Rally2 Evo. Ну як біцца… Мікельсэн быў далёка – амаль у 46 секундах наперадзе, яго суайчыннік Войцэ Чучала, які таксама выступаў на Шкодзе, пасля сёмага спецучастку саступаў яму болей чым 30 секунд. А ў нядзелю механічныя праблемы і штраф у адну хвіліну і дзесяць секунд адкінулі яго з чацвёртай пазіцыі на сёмую.

Так што Марчык мусіў проста не дапускаць памылак на допах, што засталіся. З гэтай задачай ён справіўся паспяхова, заняўшы трэцяе месца на хатнім ралі. Другім фінішаваў Мікельсэн. Нарвежац таксама быў хуткім у нядзелю, адзначыўшыся перамогамі на адзінаццатым і дванаццатым спецучастках. І ў выніку саступіў Лук’янюку, які перамог, не так і многа – 18,4 секунды.

Іншымі словамі, лёгкім шпацырам новы сезон еўрапейскага ралійнага чэмпіянату для Аляксея быць не мусіць. Канкурэнты ў яго вартыя, магчыма, сярод іх будзе і яго мінулагодні дуэльны супернік – малады швед Олівер Сольберг. А гэта значыць, што сумаваць не давядзецца ні яму, ні нам.

Палажэнне ў чэмпіянаце пасля першага этапу адпавядае яго вынікам. Лук’янюк лідзіруе з 38 ачкамі, пяць яму саступае Мікельсэн, які займае другую пазіцыю, Марчык на трэцяй, у яго 25 балаў. У камандным заліку лідары Saintéloc Junior Team і Porvoon Autopalvelu, у якіх па 40 ачкоў. Усяго тры ачкі ім саступае калектыў Toksport WRT, а ад яго на адзін бал у сваю чаргу адстае Rallye Team Spain.

У ERC у гэтым годзе запланавана яшчэ сем этапаў. Сезон скончыцца 20 лістапада на Канарскіх выспах, а працягнецца ўжо на наступным тыдні – 1-3 ліпеня – у латвійскай Ліепаі, дзе, як і ў Польшчы, пройдзе гравійнае ралі.