Мотакросавы Гран Пры Вялікабрытаніі: змена лідара ў MX2 і абвастрэнне барацьбы ў MXGP

Фота: mxgp.com

У мінулыя выхадныя на трасе Матэрлі Байсін у англійскім Вінчэстэры прайшоў другі этап чэмпіянату свету па мотакросе. Успамінаем галоўныя падзеі яго гонак, вынікі якіх могуць камусьці падацца нечаканымі.

Трэк Матэрлі Байсін значна адрозніваецца ад расійскага «Орлёнка», дзе сусветны мотакрос пачаў свой новы сезон двума тыднямі раней. Ён даўжэйшы – 2 240 метраў. Паваротаў болей, яны болей разнастайныя. Ну і надвор’е на выспах Брытаніі меней прадказальнае чым у Краснадарскім краі.

Можа быць таму гэтую трасу любяць гоншчыкі вышэйшага ўзроўню, які дзевяціразовы (калі браць тытулы ва ўсіх класах) чэмпіён Антоніа Кайролі, які атрымаў на ёй шмат перамог у мінулыя гады. У Расіі італьянец, як і належыць яму, прайшоў праз неверагодныя прыгоды, застаўшыся ў другой гонцы без ачкоў. І цяпер гоншчык завадской каманды Red Bull KTM Factory Racing наважваўся выправіць становішча.

Ну а лідары абедзвюх катэгорый – Том Віаль і Цім Гайсэр – збіраліся развіць поспехі, якіх дабіліся ў Туапсэ. Калі не атрымаць па дзве перамогі зноў, то хаця б набраць ачкоў болей за канкурэнтаў і застацца лідарамі. Канкурэнты ў сваю чаргу намерваліся самі выступіць максімальна эфектыўна і ў ідэале перахапіць лідарства ў француза са славенцам.

Нажаль, у выпадку з Віалем гэта атрымалася ў іх не ў выніку барацьбы на трасе. Завадскі гоншчык KTM проста не змог выйсці на старт праз траўму рукі, якую атрымаў падчас трэніровак. Так што з Велікабрытаніі Том з’ехаў, апусціўшыся на восьмую пазіцыю ў асабістым заліку MX2.

Гонкі без яго прайшлі адносна спакойна. У абедзвюх пераможца вызначыўся ўжо на старце, а барацьба вялася за пазіцыі ніжэй першай. У першым заездзе фактычна ад старту да фінішу пралідзіраваў яшчэ адзін француз Максім Рэно з Monster Energy Yamaha Factory MX2 Team. За другую пазіцыю спачатку спрачаліся яго суайчыннікі – Маціс Байрам з F&H Kawasaki Racing Team MX2 і яго напарнік па камандзе Цібольт Беністан.

Апошні доўгі час ціснуў на Байрама, займаючы трэцюю пазіцыю, пакуль не ўпаў і не адкаціўся на пятую. Пасля чаго Байраму прыйшлося абараняцца ўжо ад іспанскага гоншчыка Honda 114 Motorsports Рубэна Фернандэса і італьянскага прадстаўніка завадскога калектыву KTM Маціа Гуаданьіні. Саступіў Маціс толькі аднаму з іх – Фернандэсу, заняўшы трэцяе месца. Сваю ўдалую атаку Рубэн правёў на апошнім кругу ў апошнім павароце, у выніку чаго ў яго з Байрамам быў практычна фотафініш.

Гуаданьіні ж узяў сваё ў другой гонцы, у якой ужо ён выступіў у ролі дамінатара. Хол-шот тут, праўда, ўзяў нямецкі гоншчык DIGA Procross GasGas Factory Racing Сімон Лагенфельдэр, аднак надоўга на першай пазіцыі ён не затрымаўся, хутка саступіўшы яе Гуаданьіні і яго аўстрыйскаму напарніку па Red Bull KTM Factory Racing Рэнэ Хоферу, які ў першай гонцы сышоў праз механічныя праблемы.

Лагенфельдэр у выніку заняў толькі пятае месца, прапусціўшы затым яшчэ некалькіх супернікаў. У ліку якіх быў і Байрам, які першым павёў спрэчку за другую пазіцыю з Хоферам. Рэнэ, аднак, абараняўся эфектыўна, а Мацісу не было наканавана заняць і трэцяе месца – ён фінішаваў сёмым праз сваю памылку і падзенне.

Аднак і Хофэр другую пазіцыю ўсё ж саступіў – пераможцу першай гонкі Рэно. Ён і ў другой добра стартаваў, ад пачатку замацаваўшыся ў групе лідараў, а затым і правёўшы некалькі абгонаў. Перш чым пакінуць ззаду Хофэра, Максім зламаў супраціў нідэрландскага гоншчыка F&H Kawasaki Racing Team MX2 Роана ван де Моосдайка.

І менавіта Рэно стаў у выніку пераможцам брытанскага этапу ў класе MX2. У сусветным мотакросе ён вызначаецца менавіта так – па суме двух гонак. Выніковае другое месца дасталася Гуаданьіні, а на ніжнюю ступень подыуму падняўся Фернандэс, якому ў другой гонцы пашанцавала меней чым у першай – ён фінішаваў шостым.

Падобны сцэнарый быў і ў першай гонцы галоўнай катэгорыі MXGP. Старт, а потым і ўвесь заезд выйграў згаданы вышэй Кайролі, а ўсе асноўныя падзеі разварочваліся ў яго за спінай. Зрэшты, з сапраўды значных можна выдзеліць хіба што адыгрыш некалькіх пазіцый у выкананні Гайсэра – завадскі гоншчык Хонды фінішаваў на чацвёртай.

Барацьба за другое месца паміж калегамі Кайролі па камандзе Хорхе Прада і Джэфры Херлінгсам пасіла збольшага пазіцыйны характар і скончылася на карысць іспанца. Нідэрландзец фінішаваў трэцім.

Вось другая гонка MXGP была ўжо значна весялейшай. У ёй на старце лідарства захапіў гоншчык завадской каманды Monster Energy Kawasaki Racing Team Рамэн Фэвр, які ў першым заездзе фінішаваў сёмым. Практычна адразу ён прапусціў наперад Прада з Кайролі, якія пачалі бароцца за лідарства паміж сабой (Прада быў наперадзе), аднак вельмі хутка Фэвр змог абагнаць Антоніа.

Прыкладна праз тры хвіліны пасля старту трасу крыху намачыў дождж, але нікога ў групе лідараў ён не запаволіў. Гайсэр дык увогуле хутка пасля Фэвра абагнаў Кайролі (не ў апошні раз). Рамэн тым часам ужо біўся з Прада за лідарства, толькі знайсці прарэх у абароне іспанца было няпроста. Але Фэвр змог гэта зрабіць, скарыстаўшыся памылкай Хорхе ў адным з паваротаў, зноў узначаліўшы гонку.

А ззаду ўжо зусім разышоўся Гайсэр. Спачатку ён у другі раз абагнаў Кайролі, потым адбіў яго контаратаку і распачаў ціск на Прада. Абараняўся той і эфектна, і эфектыўна, раз за разам знаходзячы магчымасці для ўдалых контратак. Але славенец быў яўна хутчэйшы, і ўсё ж знайшоў зручнае месца для абгону.

З Фэврам Ціму было складаней. Па-першае, француза трэба было яшчэ дагнаць. А па-другое, перамагчы хацеў і ён, і так проста саступаць першую пазіцыю не збіраўся нават дзейснаму чэмпіёну. Рэальная барацьбя паміж ім і Гайсэрам пачалася меней чым за два кругі да фінішу, аднак яна ўпрыгожыла ўвесь брытанскі этап у цэлым.

Месцамі гоншчыкі ішлі паралельнымі курсамі, нават у павароты заходзячы разам плячом да пляча. Атакі і контратакі, разнастайныя траекторыі – было ўсё. Толькі на апошнім кругу Гайсэр здолеў перахапіць лідарства ў Фэвра і атрымаў заслужаную перамогу.

Рамэн фінішаваў другім, Кайролі, які да гэтага паспеў прапусціць наперад яшчэ і Херлінгса, пазней апярэдзіў і яго, і Прада, заняўшы трэцяе месца (Прада прыйшоў да фінішу толькі сёмым). Ну а па выніках усяго этапу Кайролі перамог. Гайсэр заняў другое месца, Херлінгс трэцяе.

Пасля брытанскага Гран Пры асабісты залік у MX2 узначаліў Фернандэс, у якога 79 ачкоў. Аднак тут усё па-ранейшаму шчыльна – Рэно і Байрам, якія займае другую і трэцюю пазіцыі адпаведна, саступаюць яму ўсяго пяць ачкоў кожны. У заліку вытворцаў тут працягвае лідзіраваць KTM, у якога 93 ачкі. Kawasaki захавала другую пазіцыю і мае 80 ачкоў, усяго на адно апярэджваючы Хонду, якая замыкае першую тройку.

У MXGP Гайсэр захаваў сваё лідарства, і зараз мае 93 ачкі. Херлінгс з 78 ачкамі застаўся другім, Фэвр па-ранейшаму трэці, у яго 73 ачкі. Сярод вытворцаў у галоўнай катэгорыі першая пакуль што Honda, у якой 93 ачкі. KTM, які працягвае займаць другую пазіцыю, крыху наблізіўся і зараз мае 87 ачкоў. Kawasaki з 73 баламі ўсё так жа замыкае першую тройку.

Трэці этап чэмпіянату свету па мотакросе пачнецца ўжо заўтра. З Вялікабрытаніі яго ўдзельнікі ўжо перабраліся ажно ў Італію, на трасу ў Маджыоры. Хто з’едзе лідарамі адтуль, даведаемся вельмі хутка.