Падзенні лідараў і ўзлёты іх пераследнікаў. Успамінаем падзеі другога этапу серыі WTCR у Эштарыле

Фота: fiawtcr.com

Партугальскія гонкі сусветнага Турынга прынеслі радасць фармальным сераднякам і расчараванне лідарам. У тым ліку некаторым ветэранам кузаўных гонак.

Здавалася б, бірузовые кітайскія седаны Lynk & Co 03 TCR ужо старыя і не абнаўляліся істотна два гады. Аднак перамагаць на іх, аказваецца, магчыма. Што, увогуле, не дзіўна, бо гэта ж каманды Cyan Racing Lynk & Co Ян Эрлашэ з’яўляецца дзейсным чэмпіёнам сусветнага турынговага Кубку.

Толькі цяжар лідара ў спаборніцтвах кшталту WTCR выражаецца і ў тым, што арганізатары цябе запавольваюць. Таму ў гэтым годзе той жа Эрлашэ атрымлівае магчымасць бліснуць толькі ў першых заездах, дзе першая дзясятка па вынікам кваліфікацыі стартуе ў рэверсіўным парадку.

І гэтым, дарэчы, моцна не задаволенае кіраўніцтва канцэрна Geely, які і валодае брэндам Lynk & Co. Прычым да такой ступені, што ўжо заявіла арганізатарам WTCR, што калі яны не развяжуць рукі камандам на кітайскай тэхніцы, то на фінансавую падтрымку на лістападаўскім этапе на кітайскай жа трасе Нінбо, якая таксама належыць Geely, могуць не разлічваць.

Так што пакуль і Эрлашэ, і яго напарнік і дзядзя Іван Мюлер, і прадстаўнікі іх сяброўскага калектыву Cyan Performance Lynk & Co Санцьяга Уруція і Тэд Б’йорк часцей выступаюць у ролях тых, хто даганяе. Так атрымалася, аднак затое ўдала, і ў першай гонцы на Эштарыле.

С першай пазіцыі ў ёй дзякуючы ўсё той жа рэверсіўнай стартавай рашотцы стартаваў італьянскі ветэран з BRC Hyundai N LUKOIL Squadra Corse Габрыэле Тарквіні. Вось у яго, у адрозненні ад прадстаўнікоў Cyan, машына новая – Hyundai Elantra N TCR. Болей важна, што яна хуткая на прамых. Тым не менш гэта не перашкодзіла Эрлашэ, які таксама пачынаў заезд з першага стартавага шэрагу, абагнаць італьянца ў першым павароце.

Жыццё Яну адразу ўскладніў ALL-INKL.COM Muennich Motorsport Нэстар Жыраламі, які памыліўся на тармажэнні перад тым жа першым паваротам, падтараніў ззаду Hyundai напарніка Тарквіні Норберта Міхеліса, які ў сваю чаргу зачапіў Хонду Ацілы Тасі. У гэтым замесе таксама пацярпеў лідар чэмпіянату Жан-Карл Вернэ, які пра пракол левай пярэдняй шыны сышоў з дыстанцыі разам з Міхелісам і Жыраламі, чыі аўтамабілі былі моцна пашкоджаныя.

Праз гэты інцыдэнт на трасу выехаў аўтамабіль бяспекі, які і не дазволіў Эрлашэ адарвацца ад Тарквіні. І пасля рэстарту Габрыэле распачаў уціск на Яна. Толькі на дзявятым кругу сам выбыў з гонкі праз праблемы з пярэдняй гумай, пашкоджанай аб абломкі на трасе, так што Эрлашэ ўсё ж атрымаў першую ў сезоне перамогу. Другім фінішаваў Мюлер, трэцім Уруція. Хоць так, але ўвесь подыум першай гонцы афарбаваўся ў бірузовы колер каманды Cyan.

Героямі другога плану сталі гоншчыкі на Honda Civic TCR, таксама хуткіх – Эстэбан Гер’еры з ALL-INKL.COM Muennich Motorsport і Цьягу Мантэйру з сяброўскага калектыву ALL-INKL.DE Muennich Motorsport. Яны былі мацнейшымі ў кваліфікацыі, так што першы заезд пачыналі з дзясятай і дзявятай пазіцый адпаведна, аднак на старце, скарыстаўшыся завалам у першым павароце, прарваліся на пятае і чацвёртае.

Аргенцінец быў хутчэйшы за партугальца, і каманда спачатку дазволіла яму выйсці наперад, каб паспрабаваць навязаць барацьбу супернікам на Lynk & Co. Але гэтага ў Гер’еры не атрымалася, і перад самым фінішам ён вярнуў пазіцыю Мантэйру, які вышэй размяшчаецца ў чэмпіянаце.

Другая гонка для іх абодвух мелася скончыцца на подыуме, пры гэтым адзін з іх мусіў перамагаць. Толькі Эстэбан, у якога была поўл-пазіцыя, праз механічныя праблемы на старце адкаціўся далёка назад. Яго наступны прарыў на восьмае месца, канечне, заслугоўвае павагі, але зусім не на такі вынік ён разлічваў.

Зрэшты, і Мантэйру апынуўся зусім не там, дзе планаваў. Пасля правалу Гер’еры Цьягу доўгі час узначальваў гонку, спакойна яе кантралюючы, пакуль за тры кругі да фінішу на яго аўтамабілі не ўзніклі праблемы з крышкай капоту, правы бок якой задраўся, парушыў аэрадынаміку і не дазваляў развіваць вялікую хуткасць (Мантэйру пазней сказаў, што праблемай было нават уключыць шостую перадачу).

Суддзі ў сваю чаргу справядліва палічылі, што так працягваць гонку небяспечна, абавязаўшы партугальца, які перамог у першай гонцы на першым этапе на Нордшляйфэ, чорным сцягам з аранжавым кругам заехаць у боксы. Што ён і зрабіў, аддаўшы лідарства Тасі, які выступае за ALL-INKL.DE Muennich Motorsport. Менавіта ён і атрымаў перамогу ў галоўным заездзе, якая стала другой у яго кар’еры. Вернэ гэтым разам пазбег непрыемнасцей і фінішаваў другім, а трэцяе месца дасталася Міхелісу.

Намнога больш важна для Вернэ, што ён захаваў лідарства ў асабістым заліку WTCR, дзе ён мае 61 ачко, па-ранейшаму на пяць апярэджваючы бліжэйшых супернікаў. Якіх цяпер ажно тры! Гэта Тасі, Мюлер і Уруція, якія размяшчаюцца на пазіцыях з другой па чацвёртую. Чатыры ачкі ім саступае Мантэйру, які замыкае першую пяцёрку.

Калектыў ALL-INKL.DE Muennich Motorsport пасля этапу ў Партугаліі ўзначаліў камандны залік і мае 108 ачкоў. Але канкурэнты з Cyan Racing Lynk & Co, якія падняліся на другую пазіцыю, адстаюць усяго на тры ачкі. Каманда ALL-INKL.COM Muennich Motorsport з 94 ачкамі цяпер трэцяя.

Наступны этап WTCR пройдзе ў Іспаніі на трасе Мотарлэнд Арагон роўна праз тыдзень – 10-11 ліпеня.