І зноў Хансэны! Браты-гоншчыкі сусветнага ралі-кросу адзначыліся поспехам і на трэцім этапе серыі Extreme E

Фота: extreme-e.com

Чэмпіён свету па ралі-кросе 2019 году Цімі Хансэн і брытанская ралістка Кэці Манінгс перамаглі на этапе серыі электрычных пазадарожных гонак Extreme E на выспе Грэнландыя. А вось Йохан Крыстоферсан і там пацярпеў няўдачу, цяпер ужо з аўстралійскай ралійнай гоншчыцай Молі Тэйлар.

Серыя гонак на электрычных пазадарожніках набірае абароты! Адначасова другое пасля Формулы Е дзецішча каманды Алехандра Агага становіцца ўсё больш цікавым і відовішчным. Напрыклад, на Грэнландыі ў фінале змагаліся ўжо пяць экіпажаў, што, вядома, зрабіла барацьбу за перамогу больш напружанай і шчыльнай.

Адначасова выявілася, што электракары Odyssey 21 не такія ўжо і крэпкія, як можна было б чакаць ад машын, прызначаных для язды па зусім не роўным паверхням. Прычым на трэцім этапе ламаліся яны збольшага ў выніку не аварый, а быццам бы штатных для іх скокаў на трамплінах.

Канечне, на Грэнландыі і ўмовы былі недзе больш жорсткія, чым на першых двух этапах у Саудаўскай Аравіі і Сенегале: тут вам і каменне, і проста жорсткі грунт вулканічнага паходжання. Праколы, з якімі ўдзельнікі сутыкаліся, яшчэ можна было б зразумець. А вось тое, што на некаторых машынах не вытрымлівалі падвескі і электроніка, было даволі дзіўна.

Машына французскага ветэрана-шматстаночніка Стэфана Саразэна і юнай брытанкі Джэймі Чэдвік, напрыклад, зламалася ў бяскрыўднай, здавалася б, сітуацыі. У першым паўфінале ў канцы другога 8,6-кіламетровага круга за стырном быў як раз Стэфан (удзельнікі Extreme E, нагадаю, праязджаюць два кругі са зменай пілота пасля першага). Ён паспрабаваў атакаваць экіпаж іспанскага дуэта каманды Acciona Sainz XE Team Карласа Сайнса-старэйшага і Лаі Санц (ім у той момант кіравала былая мотагоншчыца), проста паехаўшы па альтэрнатыўнай траекторыі. Але і гэтага хапіла, каб фатальна пашкодзіць падвеску і сысці з дыстанцыі.

Перамог жа ў тым першым паўфінале экіпаж каманды сяміразовага і дзейснага чэмпіёна Формулы-1 Льюіса Хэмілтана X44 – дзевяціразовы чэмпіён свету па ралі Себасцьен Лёб і ўдзельніца пазадарожных гонак з Іспаніі Крысціа Гуцьерэс. Асабліва варта выдзеліць Лёба. Пакуль ягоны бос разам з астатнімі ўдзельнікамі незразумелага Гран Пры Бельгіі вымушаны быў чакаць немаведама чаго, сам француз выпраўляў наступствы не надта ўдалага старту сваёй напарніцы. Але, апынуўшыся за стырном Адысея, эльзасец стаў аўтарам аднаго з самых эфектных абгонаў этапу. У чым яму, дзеля справядлівасці, на камяністай секцыі дапамог рэжым павышанай магутнасці Hyperdrive, што і дазволіў яму апярэдзіць Санц, якая фінішавала другой і прайшла ў фінал.

У другім паўфінале змагаліся як раз Цімі Хансан з Каці Манінгс, якія выступаюць за каманду Andretti United Extreme E, Йохан Крыстоферсан і Молі Тэйлар з калектыву RXR, што належыць чэмпіёну Формулы-1 2016 году Ніка Росбергу, а таксама экіпаж каманды ABT Cupra ў складзе дзвюх легенд сусветнага аўтаспорту – шведа Маціаса Экстрома і немкі Юты Кляйншмідт. Апошняя гонку і пачынала, але адразу моцна адстала ад Крыстоферсана з Хансэнам праз паломку прываднога валу, і ўжо не мела магчымасці змагацца са шведскімі майстрамі ралі-кросу.

А яны (дакладней, іх экіпажы) ў сваю чаргу змагаліся яшчэ як! Пасля кароткай сутычцы на старце Крыстоферсан захапіў лідарства, але крыху пазней праз дрэнную бачнасць зачапіў абмежавальныя вароты, за што атрымаў 10-секундны штраф. Так што Хансэну, а затым і Каці трэба было проста не адпусціць машыну канкурэнтаў болей чым на гэтыя дзесяць секунд, аднак Манінгс на сваім адрэзку ўсё ж абагнала Тэйлар на трасе.

Тым не менш, у фінал прайшлі абодва экіпажы. Патрапіў туды і малодшы з братоў Хансэнаў Кэвін. Праўда, яму і яго суайчынніцы Мікаэле Алін-Катулінскі, з якой яны абараняюць колеры каманды JBXE яшчэ аднаго чэмпіёна Формулы-1 – 2009 году – Джэнсана Батана, пасля няўдачы ў кваліфікацыях прыйшлося выкарыстоўваць апошні шанец і перамагаць у дадатковым заездзе The Crazy Race. Там ім дапамаглі як раз паломкі на машынах іх канкурэнтаў – Крысцін Джамполі-Зонкі і Олівера Бэнэта з каманды Hispano Suiza Xite Energy Team і амерыканскага дуэта Segi TV Chip Ganassi Racing Сары Прайс і Кайла Ледзюка.

Кэвін, можа, і рады быў бы выступаць у адным экіпажы з братам Цімі, але арганізатары Extreme E дбаюць не толькі пра экалогію, але і пра гендэрную роўнасць. Таму хлопчык тут мусіць быць толькі з дзяўчынкай. Што, зрэшты, зусім нядрэнна, пры ўсёй павазе аўтара гэтага блога да свабоды самавызначэння! Але выступай Хансэны за адну каманду, яны бы адсвяткавалі сапраўдны дубль, бо менавіта іх экіпажы занялі два першых месцы ў фінале. Які таксама выдаўся падзейным і напружаным, але, нажаль, ізноў не абышоўся без тэхнічных паломак.

Першымі не пашанцавала Лёбу і Гуцьерэс – увесь адрыў у 18 секунд, які Себасцьен здабыў на першым кругу, быў разбураны праколам задняга правага кола. Так што спрэчка за перамогу зноў разгарэлася паміж экіпажамі Крыстоферсана і Тэйлар (пераможцамі першых двух этапаў, калі хто забыўся) і Хансэна і Манінгс. Толькі трохразоваму чэмпіёну па ралі-кросу, якому двайны пракол не дазволіў паспаборнічаць за перамогу на этапе яго роднай дысцыпліны ў роднай жа Швецыі, не пашанцавала і на Грэнландыі.

Са старэйшым Хансэнам Йохан біўся літаральна кола ў кола, але аднаго са скокаў на трампліне не вытрымала не падвеска яго электрапазадарожніка нават, а яго электроніка. Пасля прызямлення машына проста запаволілася, і экіпаж RXR адкаціўся на апошняе месца.

Цімі Хансэн і Каці Манінгс у выніку прынеслі першую перамогу камандзе Andretti United Extreme E, а Кэвін Хансэн і Мікаэла Алін-Катулінскі фінішавалі другімі, парадаваўшы Джэнсана Батана. Замкнулі тройку прызёраў Карлас Сайнс-старэйшы і Лая Санц.

Негледзячы на няўдачу свайго экіпажу на трэцім этапе, калектыў Ніка Росберга захаваў лідарства ў серыі і мае 93 ачкі. Каманда Хэмілтана, праўда, да яго наблізілася, і цяпер адстае толькі на дзевяць балаў. Andretti United Extreme E дзякуючы перамозе сваіх гоншчыкаў (добра, свайго гоншчыка і сваёй гоншчыцы) падняліся на трэцюю пазіцыю – у іх 76 ачкоў.

Саўладальнікам Andretti United, дарэчы, з’яўляецца Зак Браўн – глава каманды McLaren у Формуле-1. І цікава, што брытанскі вытворца спорткараў з наступнага году далучыцца менавіта да Extreme E, а не да Формулы Е, што, здавалася б, болей лагічна.

Два апошнія этапы першага сезону Extreme E мусілі былі прайсці ў Паўднёвай Амерыцы – у Бразіліі і Аргенціне, аднак праз пандэмійныя цяжкасці арганізатарам прыйшлося шукаць ім замены. Часткова сваю задачу яны выканалі – ужо вядома, што наступны этап пройдзе 23-24 кастрычніка на выспе Корсіка. Дата і месца правядзення фіналу зараз вызначаецца.