Вітаем у клубе Яна Эрлашэ, развітваемся з Габрыэле Тарквіні і ўспамінаем іншыя падзеі этапу WTCR у Адрыі

Фота: fiawtcr.com

Кубак свету па аўтагонках у класе Турынг паступова набліжаецца да завяршэння свайго сезону. У мінулы ўік-энд ён правёў свой перадапошні этап у італьянскай Адрыі.

Этап гэты для Габрыэле Тарквіні значыў крыху болей, чым для астатніх – ён быў для яго апошнім хатнім. 59-летні суперветэран, чыя гоначная кар’ера пачалася яшчэ ў сярэдзіне 80-х гадоў мінулага стагоддзя і апроч сусветнага і рэгіянальных турынговых першынстваў уключала ў сябе і Формулу-1, падыходзіць да завяршэння. І трэба адзначыць, што перад сваімі суайчыннікамі двухразовы чэмпіён сусветнага Турынга (2009 года яшчэ WTCC і 2018 ужо WTCR), які выступае ў складзе BRC Hyundai N LUKOIL Squadra Corse, не зганьбіўся.

Хаця асноўная ўвага, зразумела, была прыцягнутая да іншых дзейных асоб Кубку – да тых, якія зараз змагаюцца за чэмпіёнства. Напрыклад да чэмпіёна дзейснага, Яна Эрлашэ. Чарговыя карэктоўкі балансу зрабілі Lynk & Co 03 TCR крыху хутчэйшымі, і на адноўленай трасе Adria International Raceway, даўжыня якой павялічылася з меней чым 2 500 да 3 745 метраў, малады француз з каманды Cyan Racing Lynk & Co перамог у кваліфікацыі.

Але з поўлу, у адпаведнасці з правіламі, Ян стартаваў толькі ў другой гонцы, а першую пачынаў з дзясятай пазіцыі. Аднак і на першай усё роўна быў бірузовы кітайскі аўтамабіль – уругвайскага гоншчыка сяброўскага калектыву Cyan Performance Lynk & Co Санцьяга Уруціі, які ў кваліфікацыі паказаў дзясяты час. На старце, праўда, яго апярэдзіў супернік з каманды ALL-INKL.COM Münnich Motorsport Эстэбан Гер’еры, аднак ужо да канца першага круга Санці вярнуў сабе лідарства, абагнаўшы аргенцінца ў апошнім павароце.

Эстэбан жа і другую пазіцыю не ўтрымаў, прапусціўшы на дзясятым кругу на выхадзе з таго ж апошняга павароту яшчэ аднаго ветэрана – Тома Каранэля, які выступае за каманду Comtoyou DHL Team Audi Sport. Не так і дрэнна выступіў згаданы вышэй Тарквіні – італьянец у пачатку апошняга чатырнаццатага круга абагнаў Эрлашэ, падняўшыся на дзясятую пазіцыю.

Якая пазней стала дзявятай (Эрлашэ, адпаведна, першую дзясятку замкнуў) – суддзі пакаралі нядаўняга фаварыта Кубку Жана-Карла Вернэ. Француз, чыя кваліфікацыя напярэдадні, на яго думку, была сапсаваная маршаламі (яны ў нязручны момант заклікалі яго на ўзважванне яго Hyundai Elantra N TCR, праз што ў яго засталося мала часу, каб палепшыць свой вынік), па ходу гонкі дапусціў кантакт з Audi RS3 LMS напарніка Каранэля і свайго суайчынніка Натанаэля Бертона. Апошні пашкодзіў машыну аб бар’ер бяспекі і сышоў з дыстанцыі, а Вернэ фізічна фінішаваў дзясятым, але атрымаў 5-секундны штраф, апусціўшыся ў пратаколе на дванаццатую пазіцыю.

Хоць і такі вынік Жана-Карла выглядае не так і дрэнна на фоне таго, чым скончылася для яго другая гонка. Француз у ёй фінішаваў, але апошнім, у кругу ад пераможцы. У самым пачатку ён стаў ахвярай кантакту з напарнікам і суайчыннікам Гер’еры – Нэстарам Жыраламі. Той сам стаў ахвярай напарніка і дзядзі Эрлашэ Івана Мюлера, які выпіхнуў яго з трасы. Ну а сам Нэстар, вяртаючыся на трасу, падбіў Каранэля і Вернэ і разам з Томам сышоў з дыстанцыі праз зламаную падвеску сваёй Honda Civic TCR. Жан-Карл таксама наведаў боксы, але пасля кароткага рамонту вярнуўся ў гонку, каб замкнуць фінішны пратакол.

Ўсе гэтыя падзеі развіваліся за спінай Эрлашэ, які першым стартаваў і першым жа і фінішаваў – другі раз у гэтым сезоне, увайшоўшы ў клуб з тым жа Вернэ і бельгійскім гоншчыкам Comtoyou Team Audi Sport Фрэдэрыкам Вервішам. Апошні першую гонку скончыў на шостай пазіцыі, а другую – на другой. Пры гэтым замкнуў першую тройку яго суайчыннік і напарнік Жыль Магнус, які стартаваў чацвёртым, ужо на старце атакаваў напарніка Уруціі Тэда Б’ёрка і апярэдзіў яго, калі той памыліўся, выехаўшы ў адным з першых паваротаў за межы трасы. Гэтым у ліку астатніх скарыстаўся і Мюлер, і Тарквіні, які на гэты фінішаваў пятым, акурат за Іванам.

Аднак для чэмпіянату галоўнай была ўсё ж перамога Эрлашэ. Дзякуючы ёй Ян перад фіналам яшчэ замацаваў сваё лідарства ў асабістым заліку, дзе ў яго цяпер 201 ачко. У Вервіша, які падняўся на другую пазіцыю, іх толькі 165, на адно болей, чым у Гер’еры, які застаўся трэцім. У камандным заліку лідары не памяняліся – імі з 352 баламі засталіся Cyan Racing Lynk & Co. Затое Comtoyou Team Audi Sport разам узляцелі на другую пазіцыю. Праўда, маючы 288 ачкоў, яны ізноў жа толькі на адно апярэджваюць каманду Cyan Performance Lynk & Co.

Завершыцца сезон WTCR у расійскім Сочы 27-28 лістапада.