Брудныя танцы ў Джыдзе. Ацэньваем сюжэтны твіст першага ў гісторыі Формулы-1 Гран Пры Саудаўскай Аравіі

Фота: formula1.com

Для інтрыгі ў чэмпіянаце лепей за тое, што мы пабачылі ўчора вечарам у гонцы на трасе ў Джыдзе, бадай, не прыдумаеш. Але чыстай, чэснай і прыгожай барацьбой назваць гэтыя падзеі язык не паварочваецца.

Не ламацца пад уціскам – гэта не толькі не здавацца да апошняга, але і паводзіць сябе па-джэнтльмэнску ў стаўленні да супернікаў нават у крытычных абставінах. І вось тут, як гэта ні дзіўна, кіраўніцтву двух топ-каманд Формулы-1 ёсць чаму вучыцца. Учора настала чарга Red Bull збіраць шышкі і рабіцца аб’ектам крытыцы з боку прыхільнікаў чэмпіянату свету.

Вось каму прыйшло ў галаву лезці да дырэктара гонкі Майкла Масі з прапановамі адносна размяшчэння гоншчыкаў на другім рэстарце? Тым больш, што брудны манеўр Ферстапена на рэстарце пасля першага перыяду чырвоных сцягоў, калі Макс апярэдзіў Льюіса Хэмілтана за межамі трасы, быў навідавоку. Масі са свайго боку і прапанаваў перамясціць нідэрландца на трэцюю пазіцыю, каб зняць пытанні наконт яго дзеянняў.

Да самога Макса прэтэнзій у той сітуацыі, дарэчы, асабіста ў мяне няма. Ён абараняўся як мог, у першым павароце было цесна, памыліцца было лёгка. А абараняць яму было што, бо калі б не другі рэстарт, стаць уладальнікам першага Вялікага прызу Саудаўскай Аравіі мог бы і ён.

Рызыкоўная тактыка Red Bull, Ферстапена, у адрозненні ад Хэмілтана, не заклікалі наведаць боксы і замяніць стартавы ужываны камплект шын Medium на новы Hard (кампаўнды C3 і C2 адпаведна) у рэжыме аўтамабіля бяспекі, да якога прывяла аварыя пілота Haas Міка Шумахера на дзясятым кругу, спрацоўвала. Чырвоныя Быкі, відаць, разумелі, што заезд могуць спыніць чырвонымі ж сцягамі, што і было зроблена на трынаццатым кругу.

У стане Mercedes занерваваліся, бо разумелі, што цяпер Ферстапена пераабуюць без усялякага сапраўднага піт-стопу, і ён так і застанецца на першай пазіцыі. Магчыма, нават да фінішу. Гоншчык Red Bull, дарэчы, мог бы з яе і стартаваць, бо на апошніх хвілінах фінальнага сегменту кваліфікацыі ён ішоў на абсалютны рэкорд трасы ў Джыдзе на доўгія гады (з наступнага году баліды Формулы-1 стануць павольней). Але памылка і кантакт са сцяной ў апошнім павароце пакінулі Ферстапена трэцім, а першы шэраг акупіравалі прадстаўнікі Mercedes – Хэмілтан на поўле (яго час і афіцыйны рэкорд 6 174-метровай трасы склаў 1:27,511), Валтары Ботас другі.

Стартавалі напарнікі на наступны дзень таксама добра, захаваўшы свае пазіцыі, але пачынаючы з першага рэстарту ў калгасе пачаліся брудныя танцы. Сам рэстарт лепей удаўся Хэмілтану, і Ферстапену прыйшлося адбівацца, зразаючы першы паварот. Льюіс у сваю чаргу паспрабаваў пазбегнуць кантакту з супернікам, прапусціўшы наперад яшчэ і героя Гран Пры Вугоршчыны Эстэбана Акона, які імгненнямі раней абагнаў Ботаса.

Верагодна, пазней сяміразовы і дзейсны чэмпіён абагнаў бы французскага пілота Alpine, і за перамогу з Ферстапенам змагаўся б сам-насам. Але ззаду іх адбылася яшчэ адна, цяпер ужо масавая аварыя: напарнік Макса Серхіа Перэс разбіў балід у выніку задужа смелай атакі на гоншчыка Ferrari Шарля Леклера і кантакту з яго балідам, а напарнік Міка Шумахера Мікіта Мазепін урэзаўся ззаду ў будучага напарніка Хэмілтана Джорджа Расэла з Williams, які раптоўна затармазіў у хуткім месцы, бо сам спрабаваў пазбегнуць сутыкненняў з супернікамі наперадзе.

Толькі аднавіўшыся, гонка была прыпыненая чырвонымі сцягамі зноў. Тут і настаў час цікавых прапаноў ад Red Bull дырэкцыі гонкі. Давайце, маўляў, адкоцім сітуацыю да стану на момант да рэстарту, калі Хэмілтан быў другім. У Майкла Масі знайшлася сустрэчная: а давайце Ферстапен на другім рэстарце будзе трэцім! Тады і ў маршалаў не будзе да яго пытанняў адносна яго бруднай абароны.

І ў Red Bull пагадзіліся! Ды яшчэ усталявалі на балід Ферстапена свежы камплект «медыума», што давала яму перавагу як мінімум на першых кругах. І на самой справе Макс стартаваў выдатна, чыста абагнаўшы Хэмілтана і Акона ў першым павароце. Але выбар больш мяккага тыпу гумы меў для яго і адваротны бок – яна хутчэй зношвалася, і Льюіс, чакана справіўшыся з Эстэбанам, накочваў і на яго.

Абараняцца нідэрландцу дапамагалі толькі рэжымы віртуальнага аўтамабіля бяспекі, што некалькі разоў аб’яўляліся праз абломкі ад іншых балідаў у розных месцах трасы. Аднак калі іх прыбралі, і гоншчыкі атрымалі магчымасць гнаць ва ўсю моц, Хэмілтан хутка наблізіўся да Ферстапена на адлегласць атакі і правёў яе на мяжы трыццаць шостага і трыццаць сёмага кругоў.

Макс ізноў адбіўся, і ізноў брудна, выціснуўшы Льюіса за межы трасы. Пасля чаго, гледзячы па ўсяму, здалі нервы і ў яго. Атрымаўшы загад з боксаў вярнуць Хэмілтану пазіцыю, ён на наступным кругу раптоўна затармазіў акурат перад носам у брытанца. Той быў вымушаны адрульваць, пашкодзіў пярэдняе антыкрыло свайго баліду аб карму Максавага і быў дужа незадаволены дзеяннямі суперніка. Які яшчэ і пазіцыю пры гэтым захаваў, а вярнуў яе толькі на сорак другім кругу, каб абагнаць Льюіса адразу ізноў!

Не хачу ўскладаць у дадзеным выпадку ўсю адказнасць на гоншчыка. У каторы ўжо раз паўтараю: кіруючы на хуткасцях за 300 км/г гоначным аўтамабілем і змагаючыся пры гэтым за чэмпіёнства, ён мысліць не так, як пераважная большасць з нас, якія глядзяць гонкі па тэлевізары. А тут яшчэ і нейкія незразумелыя канкрэтна для яго ў канкрэтна той момант загады з каманднага мосціку паступаюць. І барацьба пры гэтым ідзе з прынцыповым супернікам, з якім ужо бывалі вострыя моманту па ходу сезону (успамінаем Сільверстоўн і Монцу).

Але правілы Макс парушыў, і з гэтым таксама не паспрачаешся. За брэйк-тэст перад носам Хэмілтана, ён ужо пасля фінішу атрымаў штрафныя дзесяць секунд і два балы ў суперліцэнзію, а за атаку адразу пасля пропуску Льюіса яму налічылі пяць секунд адразу ж. Аднак у пратаколе ён так другім і застаўся – Ботас, які на апошнім кругу перад самай фінішнай лініяй абагнаў Акона ў спаборніцтве за ніжнюю ступень подыуму, быў далёка. Калі б не штраф, можна было б зрабіць бясплатны піт-стоп, перайсці на Soft і паставіць на прыканцы лепшы круг у гонцы, але тыя пяць секунд тады прыйшлося б адстаяць у боксах, і другое месца Максу не дасталася б.

Калі аб’ектыўна, то не дасталася б яму і першае – Хэмілтан усё роўна быў хутчэйшым, чаму спрыяў і той самы новы рухавік, што прынёс яму перамогу ў Бразіліі, а на трасе ў Джыдзе яго аддача мае важнае значэнне, і болей жорсткія шыны, якія вытрывалі долей. Таму тут больш пытанняў ізноў да каманды: калі вы разумелі ўсю сітуацыю – а вы мусілі яе разумець, вы ж таксама чэмпіёнская каманда! – то чаму не давялі яе да свайго падначаленага? Чаму не супакоілі яго і не параілі яму мінімізаваць страты, а не бессэнсоўна махаць кулакамі?

Так што да кіраўніка Mercedes Тота Вольфа, як і да Льюіса Хэмілтана, можна ставіцца па-рознаму, але ў тым, што першая гонка ў Джыдзе атрымалася яркай, але наўрад ці прыгожай, застаецца толькі пагадзіцца. Танцы на Гран Пры Саудаўскай Аравіі атрымаліся бруднымі, і спорт дакладна не ўпрыгожылі. А за наступныя чатыры дні да пачатку фінальнага Гран Пры Абу-Дабі мы яшчэ пабачым шмат з’едлівых каментарыяў і ўзаемных абвінавачванняў з абодвух бакоў канфлікту.

З чым поўны парадак, дык гэта з інтрыгай у чэмпіянаце! У Ферстапена і Хэмілтана перад апошнім этапам сезону роўная колькасць ачкоў – па 369,5! Не магу нават успомніць, калі такое было ў апошні раз. Расклад па гэтай прычыне просты: хто ў Абу-Дабі фінішуе наперадзе, той і стане чэмпіёнам 2021 года. Макс зараз на першай пазіцыі дзякуючы таму, што ў яго перамог у сезоне болей. Толькі Ботас, здаецца, гарантаваў сабе трэцяе месца – у яго 218 ачкоў супраць 190 у Перэса.

Кубак канструктараў жа, відаць па ўсяму, дастанецца Мерсэдэсу, які Саудаўскую Аравію пакідае з 587,5 ачка, што на 28 болей, чым у Red Bull. Ferrari з 307,5 бала нядрэнна спачуваецца на трэцяй пазіцыі – McLaren адстае на 38,5 ачка, і ўчора адыграла толькі адно, дзякуючы пятаму месцу Даніэля Рыкарда і дзясятаму Ланда Норыса, тады як Шарль Леклер і Карлас Сайнс фінішавалі сёмым і восьмым адпаведна.

Ну а на трасе Яс-Марына ў Абу-Дабі, куды Формула-1 прыедзе ўжо ў бліжэйшы ўік-энд, магчымае ўсё. Тым больш што канфігурацыя трасы, якая раней не надта спрыяла шчыльнай барацьбе і абгонам, у гэтым годзе была дапрацаваная. Павольныя павароты з пятага па сёмы замененыя адзінай левай шпількай, што выводзіць цяпер на зваротную прамую, а павароты з адзінаццатага па чатырнаццаты, таксама павольныя – адзіным зацяжным левым з невялікім профілем.

Таму ў мяне прагноз на надыходзячы фінал адзіны: будзе многа драмы і жорсткага супрацьстаяння. А вось хто выйдзе з яго пераможцам зараз не ведаюць нават гоначныя багі. Ім самім цікава, чым усё скончыцца! Балазе чакаць ім і нам засталося зусім нядоўга.