Ідэальны ўік-энд Гайсэра і Віаля ў П’етрамураце. Як славенец і француз узялі максімум ачкоў на Гран Пры Трэнціна

Фота: mxgp.com

ГОНКІ ПРАХОДЗІЛІ 9-10 КРАСАВІКА. ПРАЗ ТЭХНІЧНЫЯ ПРАБЛЕМЫ, ШТО ЎЗНІКЛІ ПА ПРЫЧЫНЕ, ЯКАЯ АД АЎТАРА НЕ ЗАЛЕЖАЛА, АРТЫКУЛ АПУБЛІКАВАНЫ СА СПАЗНЕННЕМ. ШЧЫРА ВЫБАЧАЮСЯ ПЕРАД ЧЫТАЧАМІ.

Першы з італьянскіх этапаў сусветнага мотакросу, што ў мінулыя выхадныя прайшоў у П’етрамураце, склаўся ідэальна для Ціма Гайсэра і Тома Віаля. А вось галоўны супернік француза Яга Гіртс сутыкнуўся з цяжкасцямі.

Галоўная цяжкасць усяго свету зараз – пуцінская Расія. Дробная закамплексаваная казурка ўявіла сябе імператарам, які можа ажывіць мёртвую імперыю. Сваёй галоўнай ахвярай дыктатар, з’ехаўшы з глузду, абраў Украіну, на якую папёр вайной. Толькі планаваны бліцкрыг абярнуўся крывавым сорамам і ганьбай.

На вялікі жаль, шмат пралілася і крыві ўкраінцаў усіх узростаў, якія размаўлялі і на ўкраінскай мове, і на рускай, якую дыктатар быццам бы пайшоў бараніць. Аднак нават цяжкія і незаменныя страты, якія панеслі нашы суседзі і сябры, не зламалі іх дух. У захапленні ад іх самаадданасці і мужнасці зараз знаходзіцца ўвесь свет.

Аднаго захаплення мала, і свет гэты мусіць дапамагаць украінцам, якія зараз бароняць усё добрае, што існуе на Зямлі. Бяда прыйшла да іх, але яна збіраецца рухацца і далей. Захад быццам бы зразумеў сур’ёзнасць сітуацыі, але па-ранейшаму ўхіляецца ад рашучых дзеянняў. Тым не менш я кажу дзякуй усім дзяржавам, якія ўжо так ці інакш дапамаглі Украіне.

Я таксама кажу дзякуй нашым суайчыннікам, якія зараз абараняюць украінскую зямлю і чысцяць яе ад ворага. Вораг у нас агульны, і калі зломіцца яго галава, свабода прыйдзе і на нашу зямлю. Украінская перамога дапаможа нам дарабіць тое, што мы не дарабілі ў 2020 годзе, калі ў нас скралі наш выбар. Слава Україні! Героям Слава! Верым! Можам! Пераможам! Жыве Беларусь!

Украіне дапамагае ў тым ліку Італія, у якой гоначныя традыцыі старыя і моцныя. І яна ў мінулы ўік-энд прыняла першы з этапаў сусветнага мотакросу, што запланаваныя на яе тэрыторыі. Проста ідэальна яго правялі Цім Гайсэр з завадской каманды Honda і Том Віаль з завадской жа Red Bull KTM Factory Racing, якія б’юцца за тытулы ў старэйшай і малодшай катэгорыях.

Толькі сярод прэтэндэнтаў на перамогу ў MX2 адразу апынуўся яшчэ і гоншчык завадской каманды Monster Energy Yamaha Factory Racing Цібольт Беністан, які перамог у кваліфікацыйнай гонцы. Яго партнёр і лідар чэмпіянату Яга Гіртс пры гэтым фінішаваў толькі васямнаццатым! Канечне, стартавая пазіцыя ў мотакросе не вырашае ўсяго, але, відавочна, бельгійца чакалі складаныя асноўныя заезды.

Што стартавая пазіцыя – не галоўнае, у першай гонцы даказаў Віаль, які выйграў хол-шот. Гіртс жа ўжо на старце адыграў шмат пазіцый, падняўшыся на адзінаццатую. І пакуль Віаль абараняўся ад хуткага прадстаўніка Big Van World MTX Kawasaki Мікеля Хаарупа, які ад пачатку заскочыў на другую пазіцыю, Яга паступова прарываўся наперад.

Ужо на сёмым кругу Гіртс, абагнаўшы таго самага Беністана, падняўся на чацвёртую пазіцыю. А на сямнаццатым кругу пакінуў ззаду і Андрэа Адама з каманды SM Action Racing Team YUASA Battery, прарваўшыся на трэцюю. Да Віаля з Хаарупам не дацягнуўся, але хаця б мінімізаваў страты. Том з Мікелем таксама не далі гледачам засумаваць. На апошніх кругах паміж імі развярнулася напружаная барацьба, але француз устаяў і фінішаваў першым. Хааруп замкнуў першую тройку.

Другую гонку Віаль таксама пачаў хол-шотам. Толькі непасроднымі яго пераследнікамі былі ўжо іншыя. У прыватнасці, той жа Беністан і гоншчык Hutten Metaal Yamaha Racing Рык Эльзінга. Апошняга, праўда, хутка абагнаў Кай дэ Вольф з завадской каманды Nestaan Husqvarna Factory Racing, які пазней пакінуў ззаду і Беністана, фінішаваўшы другім.

Для Гіртса да пэўнага моманту другая гонка складалася нядрэнна. Ён прарваўся быў на пятую пазіцыю, але спачатку яго абагналі абодва прадстаўнікі Red Bull GasGas Factory Racing, Маціа Гуаданьіні і Сімон Лангенфельдэр, потым Яга страціў яшчэ некалькі пазіцый, адкаціўшыся на дзявятую, а пазней увогуле ўпаў і фінішаваў толькі трыццаць першым.

Віаль, выйграўшы абедзве гонкі, выйграў і Гран Пры Трэнціна. Другое месца заняў дэ Вольф, трэцім стаў Хааруп, які фінішаваў шостым у другім заездзе. Том жа яшчэ і чэмпіянат узначаліў! Ён мае цяпер 208 ачкоў, на 14 апярэджваючы Гіртса, які апусціўся на другую пазіцыю. Хааруп застаўся трэцім і мае 169 балаў. KTM у сваю чаргу захапіў лідарства ў заліку вытворцаў у MX2, дзе ў яго 224 ачкі. Yamaha з 216 баламі займае другую пазіцыю, у GasGas, які па-ранейшаму трэці, 196 ачкоў.

Гайсэр у старэйшай катэгорыі ў П’етрамураце таксама дамінаваў, і з самай кваліфікацыйнай гонкі, у якой славенец перамог. Ну а на старце першай нядзельнай бліснуў ямахаўскі завадчанін Глэн Колдэнхоф, які выйграў хол-шот. Гайсэр размясціўся следам, а ў яго апынуўся завадскі гоншчык GasGas Хорхе Прада. Якому з адзінаццатага круга прыйшлося ціснуць на Колдэнхофа, якога тады абагнаў Гайсэр, каб потым на першай пазіцыі і фінішаваць. Іспанец спрабаваў атакаваць нідэрландца, але не змог, задаволіўшыся трэцяй пазіцыяй.

Прада паспрабаваў адыграцца ў другой гонцы, і нават, як ён любіць, пачаў яе хол-шотам. Але на першым жа кругу рухавік матацыкла іспанца заглух, і гоншчык згубіў некалькі пазіцый. Хаця чацвёртым у выніку ўсё ж фінішаваў. Лідарства пасля яго праблем перайшло да Гайсэра, які так да самага фінішу першую пазіцыю нікому і не саступіў. За другую амаль увесь час бароліся партнёры па завадской Ямахе – Сівер і дзейсны чэмпіён MX2 Максім Рэно. Спрэчка скончылася на карысць маладога француза, які фінішаваў другім, непасродна перад Джэрэмі.

Гайсэр, вядома, перамог і на этапе, Рэно заняў другое месца, Прада заняў трэцяе. Іх размяшчэнне ў турнірнай табліцы не змянілася: Цім з 236 ачкамі лідзіруе, Хорхе мае 203 балы і знаходзіцца на другой пазіцыі, Рэно трэці, у яго 184 ачкі. Honda лідзіруе ў заліку вытворцаў, маючы тыя ж 236 балаў, што і Гайсэр. Yamaha на другой пазіцыі з 213 баламі і на дзесяць апярэджвае GasGas, які па-ранейшаму замыкае першую тройку.

Чэмпіянат свету па мотакросе працягнецца цяпер ужо праз тыдзень – 22-24 красавіка ў Латвіі. Гонкі прыме вядомы аматарамі мотадром Кегумс.