Раванпэра змог тры разы! А вось другой бітвы двух Себаў на Ралі Партугалія не атрымалася

Фота: wrc.com

Ну а чаму б Кале не змагчы? Ён малады і таленавіты – яму і карты ў рукі. Шкада толькі, што абодвум Сесбасцьенам – Лёбу і Аж’е – у Партугаліі не пашанцавала.

Беларускамі і ўкраінскаму народу абодвум не пашанцавала мець на ўсходзе суседа, які ставіцца да нас толькі як да малодшых і дурнейшых братоў (або сясцёр). І любыя нашыя памкненні жыць на сваёй зямлі сваім розумам і быць незалежнымі і вольнымі ён успрымае як абразу і небяспеку для сябе.

Роўна тры месяцы таму ён пачаў страшна і бязлітасна помсціць Украіне за яе выбар. Але зламаць і скарыць яе не змог, хоць і захапіў частку яе тэрыторый. Прага зрабіць Украіну цывілізаванай і сучаснай у яе грамадзян аказалася мацнейшай за бомбы і крылатыя ракеты. Мужныя і прафесійныя ўкраінскія ваяры ўжо вызвалілі значную частку сваёй зямлі і вызваляць і астатнія.

Цяпер ужо можна з упэўненасцю казаць, што іх перамога прынясе свабоду і беларусам. Нашу зямлю расійскі дыктатар збіраецца далучыць да сваёй імперыі разам з бандыцкімі рэспублікамі на ўсходзе Украіны. Таму любая ваенная дапамога нашым сябрам і суседзям – гэта дапамога і нам. Тым больш што нашы суайчыннікі зараз дапамагаюць украінцам са зброяй у руках. Зычым ім поспеху ў іх гістарычнай справе. Слава Україні! Героям Слава! Верым! Можам! Пераможам! Жыве Беларусь!

Ёсць, канечне, некаторыя сумневы, што стары дзед у крамлі зможа другі раз. Тым больш што справу сабе ён абраў брудную, няўдзячную і небяспечную для яго імперыі. Не ведаю, які з яго выйшаў бы гоншчык, але калі б ён стаў ім, гэта было б як мінімум бяспечна для навакольных. Верагодна, там ён бы змог бы і тры разы, як гэта атрымалася ў Кале Раванпэры ў WRC.

Спачатку не было падобнае на тое, што юны лідар чэмпіянату з каманды Toyota ізноў падымецца на вяршыню подыуму. За першыя пазіцыі на ранішняй секцыі пятніцы (першы суперспэшл, асфальтавы, дарэчы, хоць ралі было гравійным, прайшоў яшчэ ў чацвер увечары ў Каімбры) у асноўным яго партнёр па камандзе Элфін Эванс і гоншчык Hyundai Цьеры Нэвіль. Паблізу быў і трэці прадстаўнік Таёты, васьміразовы і пакуль яшчэ дзейсны чэмпіён Аж’е, а яго цёзка, дзевяціразовы чэмпіён свету па ралі па прозвішчы Лёб дык нават узначаліў партугальскую гонку пасля чатырох спецучасткаў.

Але ўжо на пятым ён на самым старце, памыліўшыся ў левым павароце, француз ударыўся задняй правай часткай свайго Ford Puma Rally1 аб каменную агароджу і разбіў падвеску. Себ сышоў, але ў суботу вярнуўся па сістэме Rally2, каб сутыкнуцца ўжо з праблемамі з электронікай сваёй машыны. Не пашанцавала і яго цёзку Аж’е, прычым таксама і ў пятніцу, і ў суботу. У першым выпадку ён злавіў пракол, у другім вылецеў з трасы і захрас у кювеце.

Нэвіль у пятніцу доўгі час трымаўся блізка ад Эванса, але ўжо ўвечары на дарожнай секцыі паміж сёмым і восьмым спецучасткамі на яго i20 N Rally1 узніклі праблемы з левым пярэднім колам, што пазбавіла яго хуткасці і адкінула з другой пазіцыі на сёмую па выніках дня. Пасля гэтага галоўным пераследнікам Эванса і стаў Раванпэра, які да таго моманту ўжо раскаціўся і саступаў валійцу 13,6 секунды.

Барацьба паміж імі працягнулася ў суботу. Разрыў то рос, то памяншаўся, але ізноў жа ўвечары Кале пайшоў у атаку і перахапіў лідарства па выніках пятнаццатага допа. Моцна адарвацца адразу ў фіна не атрымалася – Элфін па выніках дня і шаснаццаці спецучасткаў саступаў яму ўсяго 5,7 секунды, і іх бітва мела працягнуцца ў нядзелю. Але Раванпэра не дапусціў памылак і атрымаў трэцюю запар перамогу. Эванс фінішаваў другім.

За ніжнюю ступень подыуму, пачынаючы з суботы, спрэчку вёў японскі прадстаўнік Таёты Такамота Катсута і іспанец Дані Сорда, які на партугальскім этапе быў трэцім гоншчыкам Hyundai. Змаганне было напружаным, і ў гэтым выпадку досвед аказаўся эфектыўнейшым за маладосць, таму Такамота задаволіўся чацвёртым месцам.

Нэвіль гэтым разам замкнуў першую пяцёрку, затое ў чэмпіянаце ён другі з 60 ачкамі, у сарака шасці ад Раванпэры. На трэцюю пазіцыю падняўся Катсута, у якога 38 балаў, але гэта ўсяго на адзін болей, чым у Ота Цянаца, які ў Партугаліі заняў шостае месца, на два, чым у Эванса і на чатыры, чым у Крэйга Брына, які ў нядзелю сутыкнуўся з праблемамі з тармазамі і фінішаваў восьмым. Сярод каманд камфортна, маючы 175 ачкоў, лідзіруе Toyota. Hyundai са 116 ачкамі на другой пазіцыі, M-Sport Ford, у якога 94 балы, на трэцяй.

Йохан Русэль у Партугаліі стаў пераможцам у катэгорыі WRC2. На сваім Citroën C3 Rally2 француз не быў самым хуткім. Проста фін Цеэму Сунінен, які перад фінальным суперспэшлам апярэджваў яго на 57,1 секунды, на тым самым суперспэшле патрапіў у аварыю і не фінішаваў наогул. Таму другое месца дасталася паляку Каетану Каетанавічу на Škoda Fabia Rally2, а трэцяе заняў брытанец Крыс Інграм, які выступае на такім жа аўтамабілі.

Катэгорыя WRC3 гэтым разам ізноў была аб’яднаная з юніорскім чэмпіянатам свету, таму ва ўсіх былі аднолькавыя пярэднепрывадныя Ford Fiesta Rally3. Хутчэйшым за ўсіх, нягледзячы на пракол у пятніцу раніцай, стаў фін Самі Паяры. Яго суайчыннік Лаўры Йоона заняў другое месца, які ў суботу таксама не пазбег праколу, трэцім фінішаваў эстонец Роберт Вірвес.

Наступным этапам WRC стане Ралі Сардынія, якое пройдзе 2-5 чэрвеня.