Французскі бенефіс у Іспаніі. Том Віаль і Максім Рэно пяршынствавалі на этапе сусветнага мотакросу ў Мадрыдзе

Фота: mxgp.com

Іспанскі Гран Пры чэмпіянату свету па мотакросе выдаўся складаным для Яга Гіртса і Ціма Гайсэра. І калі славенец мог дазволіць сабе такую раскошу, то бельгіец страціў лідарства ў сваёй катэгорыі.

З Расійскай Федэрацыяй пасля 24 лютага адбылося яшчэ горшае – яна страціла сваю будучыню. Канечне, страціла яна яе, калі дваццаць два гады таму яе кіраўніком стаў палкоўнік ФСБ, якія ніколі не бываюць былымі. Але некаторы час у яго атрымлівалася прыкідвацца чалавекам.

Толькі абсалютная ўлада можа абсалютна разбэсціць нават першапачаткова сумленнага і разумнага. Дык што казаць пра закамплексаванага невука, які ніколі не паважаў нікога? Ён ніколі не ўспрымаў сваіх суседзяў як сапраўды вольныя народы са сваімі ўласнымі мовамі і культурамі, і іх памкненні да свабоды разумеў як пагрозу для сябе асабіста.

Таму калі Украіна канчаткова выбрала рух да дэмакратыі і агульначалавечых каштоўнасцей, вар’ят пачаў помсціць ёй. Пачаў ён гэта не 24 лютага, але менавіта ў той дзень ён пайшоў на яе паўнавартаснай вайной. Верыў ён сам у тое, што там пануюць нацысты, а народ толькі і чакае вызвалення, зараз ужо не важна. А важна, што ахвярамі пачвары і яго арміі сталі простыя ўкраінцы, незалежна ад мовы, на якой яны размаўлялі.

Толькі запужаць і скарыць украінцаў у агрэсара не атрымалася. Замест гэтага яны аб’ядналіся незалежна ад сваіх палітычных поглядаў і моўных пераваг і пачалі даваць фашыстам па пысах. Да іх далучыліся і самыя смелыя з беларусаў, чыя краіна аказалася пад акупацыяй вельмі даўно, бо таксама дазволіла ўзначаліць сябе вар’яту.

Зараз нашы суайчыннікі дапамагаюць украінцам бараніць не толькі іх будучыню, а будучыню усёй чалавечай цывілізацыі. Мы можам быць добрымі суседзямі і сябрамі, а не ворагамі, якіх рускіх у адносінах да ўкраінцаў зрабіў іх дыктатар. І для нашай агульнай перамогі над нашым агульным ворагам увесь свет мусіць Украіне дапамагаць. Удзячнасць двух народаў, свабода і незалежнасць двух краін вартыя таго. Слава Україні! Героям Слава! Верым! Можам! Пераможам! Жыве Беларусь!

У свету павінна быць будучыня хаця б дзеля гонак. Справа гэта выключна мірная, займаецца ёй пераважна моладзь, для якой чужыя вайна і варожасць. Тым больш што моладзь гэтая з розных краін, калі гаворка ідзе пра сусветныя чэмпіянаты, як мотакросавы, напрыклад. Вось у яго малодшай катэгорыі MX2 лідары Яга Гіртс і Том Віаль хоць і размаўляюць на адной і той жа французскай мове, але француз толькі другі з іх, а першы – бельгіец. Ну а акрамя мовы іх агульнай рысай ёсць таксама гоначны талент.

Віаль дык нават чэмпіёнам успеў пабыць, але праз траўмы і нястрыманасць свайго суайчынніка з завадской каманды Monster Energy Yamaha Factory Racing Максіма Рэно ў мінулым годзе яму саступіў. Але таму надышоў час (споўніўся 21 год) ісці на павышэнне ў старэйшую катэгорыю. Затое адзін з яго партнёраў Яга Гіртс, які ў 2021-м таксама выдатна сябе паказваў, перахапіў камандны прапар.

Аднак і Віаль працягнуў годна абараняць колеры завадскога калектыву Red Bull KTM Factory Racing, і усе папярэднія восем этапаў не адпускаў суперніка далёка. А ў Іспаніі пайшоў у чарговае контрнаступленне і дамогся як мінімум тактычнага поспеху. Пачаў Том яшчэ ў суботу, атрымаўшы перамогу ў кваліфікацыйнай гонцы. Ну а ў нядзелю дамініраваў у абодвух асноўных, што і прынесла яму перамогу па выніках Гран Пры.

Вось Гіртсу гэтым разам прыйшлося цяжка. Першы заезд скончыўся для яго падзеннем на першым жа кругу. Ну, ён-та з дыстанцыі не сышоў, але не лічыць жа поспехам толькі дзявятае месца. Непрыемнасць Яга вывела ў лідары якраз Віаля, які да гэтага за некалькі паваротаў паспеў прарвацца на другую пазіцыю, абагнаўшы ў тым ліку аўтара хол-шота Рыка Элзінгу з Hutten Metaal Yamaha Racing.

З ім доўгі час змагаўся гоншчык F&H Kawasaki Racing Кэвін Хоргма, але нарвежац страціў пару пазіцый, таксама ўпаўшы, як і Ісаак Гіфцінг з Hitachi KTM Fuelled by Milwaukee. Праўда, і Элзінга на другой пазіцыі быў недоўга, хутка прапусціўшы гоншчыка Team Ship to Cycle Honda SR Motoblouz Стэфана Рубіні і Сімона Лангенфельдэра з Red Bull GasGas Factory Racing.

Пазней Рык ізноў сышоўся на трасе з Хоргма, але прапусціў яго ў спрэчцы і за чацвёртую пазіцыю, а фінішаваў дык увогуле трынаццатым. А Лангенфельдэр на дзясятым кругу абагнаў Рубіні і фінішаваў другім. Стэфан скончыў гонку следам за ім.

Другі заезд хол-шотам пачаў бельгійскі гоншчык Diga Procross KTM Racing Ліам Эвертс, але і ён хутка быў абагнаны Гіртсам, як і Віалем. Толькі Тома Яга стрымліваў ужо долей – тры першыя кругі. Аднак усё роўна прапусціў яго і не здолеў за ім угнацца, адстаўшы на фінішы амаль на адзінаццаць секунд. Затое хаця б фінішаваў другім. Лангенфельдэр скончыў гонку трэцім, яшчэ на шостым кругу абагнаўшы Эвертса, які задаволіўся чацвёртай пазіцыяй. Галоўнае ж для Сімона, што ён заняў другое месца па выніках Гран Пры Іспаніі, тады як Гіртс на ім стаў толькі трэцім, прапусціўшы Віаля наперад і ў чэмпіянаце.

Зараз Том мае 382 ачкі, на дзесяць апярэджваючы Яга. Лангенфельдэр захоўвае трэцюю пазіцыю з 287 баламі. Змяніўся лідар і ў заліку вытворцаў, дзе KTM цяпер, маючы 402 ачкі, на чатыры апярэджвае Ямаху. GasGas, у якога 337 балаў, па-ранейшаму трэці.

У старэйшай катэгорыі MXGP значных змен не адбылося, бо надта ўжо вялікай была перавага Ціма Гайсэра. Але завадскі гоншчык Хонды таксама выступае са старымі і не заўсёды залечанымі траўмамі. Дый фізічная стомленасць, абумоўленая шчыльнасцю календара, магчыма, дала пра сябе ведаць на даволі патрабавальнай трасе intu Xanadú-Arroyomolinos у Мадрыдзе.

На ёй Цім не быў хуткім ад самага пачатку, і кваліфікацыйную гонку скончыў толькі адзінаццатым. Што, аднак, не перашкодзіла яму выдатна прарвацца на другую пазіцыю ў першым заездзе ў нядзелю. На яго пачатку родныя трыбуны парадаваў хол-шотам завадскі гоншчык GasGas Хорхе Прада. Якога, зрэшты, даволі хутка пакінуў ззаду Рэно. Прада напэўна планаваў яго контратакаваць, але сам патрапіў пад атакі Гайсэра.

Той апынуўся на трэцяй пазіцыі ўжо пасля старту і спачатку вымушаны быў адбівацца ад нідэрландца Браяна Богерса з каманды Standing Construct Husqvarna Factory Racing. Але не толькі стрымаў яго, а і пакінуў ззаду Прада, які задаволіўся трэцяй пазіцыяй.

Яшчэ меней іспанцу пашанцавала ў другой гонцы, якую ён таксама пачаў хол-шотам, а скончыў адзінаццатай пазіцыяй на фінішы. Упаў Хорхе хутка пасля таго, як пяты круг праехаў хутчэй за ўсіх у пелатоне. Аднавіў для сябе гонку ён хутка і нават ізноў сустрэўся з Гайсэрам, але каб ізноў жа яго і прапусціць. Толькі і сам Цім выступіў ужо не так удала, як у першай гонцы, фінішаваўшы толькі шостым.

Рэно ж упэўнена лідзіраваў пасля падзення Прада, і, як і Віаль, атрымаў і другую перамогу. Хаця яго нідэрландскі партнёр па камандзе Глэн Колдэнхоф, які напярэдадні перамог у кваліфікацыйным заездзе, а ў другім нядзельным фінішаваў другім жа, адстаў ад маладога француза меней чым на 3,2 секунды. Нядрэнна выступіў і Богерс, які з другой спробы замкнуў першую тройку.

Менавіта ў такім жа парадку ўсе трое размясціліся і ў выніковым пратаколе Гран Пры Іспаніі, тады як Гайсэр упершыню ў сезоне не патрапіў на подыум, заняўшы чацвёртае месца. Што, зрэшты, не перашкодзіла славенцу захаваць камфортнае лідарства ў чэмпіянаце, дзе ён мае 404 ачкі. Рэно з 338 баламі другі.

Яшчэ адзін прадстаўнік завадской Ямахі Джэрэмі Сівер, нягледзячы на падзенне і адзінаццатую пазіцыю ў першай гонцы і дзякуючы чацвёртай у другім заездзе, застаўся трэцім у чэмпіянаце, дзе ў яго 292 ачкі. Што ўсяго на два болей, чым у Прада. Honda з 409 ачкамі лідзіруе ў заліку вытворцаў, Yamaha мае 393 балы і займае другую пазіцыю, GasGas, у якога 318 ачкоў (на васямнаццаць болей, чым у Хускварны), трэці.

Што Максіму Рэно, што Тому Віалю галоўнае захаваць пераможны імпульс да гэтых выхадных, таму што акурат заўтра на трасе ў Эрнэ пачынаецца іх хатні Гран Пры Францыі.