Гайсэр можа расслабіцца, Гіртс і Віаль – не. Мотакросавы Гран Пры Фландрыі склаўся па-рознаму для кожнага з іх

Фота: mxgp.com

Сезон чэмпіянату свету па мотакросе пакрысе набліжаецца да фіналу. У яго старэйшай катэгорыі MXGP усё зразумела даўно, і Цім Гайсэр, які там упэўнена лідзіруе, можа дазволіць бліснуць і сваім канкурэнтам. А вось у фаварытаў MX2 права на памылку няма, хаця яны ўсё роўна памыляюцца.

Нападзенне на Украіну было той самай памылкай расійскага дыктатара, якая горшая за злачынства. Ад закамплексаванасці, дробязнасці і мсцівасці адной асобы на постсавецкай прасторы пакутуюць не толькі ўкраінцы, але менавіта ўкраінцы пакутуюць болей за ўсіх астатніх. І паўгода таму вар’ят вырашыў канчаткова паквітацца з суседнім народам за яго выбар.

Аднак ваенная авантура абярнулася супраць агрэсара і захоп чужых тэрыторый не ўратаваў яго ад ганьбы і не ўратуе ад паразы. Мужнасць і гераізм усяго ўкраінскага народа здзівілі і натхнілі ўвесь свет і сталі бар’ерам для акупантаў і галоўнай зброяй, якая іх знішчыць. Перамога ўкраінцаў прынясе радасць і беларусам, бо прынясе хуткае вызваленне і нам.

Расійская і тутэйшая калгасная дыктатуры – абое рабое, і другая трымаецца толькі на першай. Адказваць за ваенныя злачынствы яны таксама будуць разам, і тут перагарнуць старонку дакладна не атрымаецца. Несці адказнасць прыйдзецца і перад беларусамі, якіх катаюць з 2020 года і якія не спыняюць сваёй барацьбы і дапамагаюць украінцам. Слава Україні! Героям Слава! Верым! Можам! Пераможам! Жыве Беларусь!

Шкада, канечне, што перамога нашых суседзяў не такая блізкая, як фінал сусветнага мотакросавага чэмпіянату. Пачаўся ён усяго праз пару дзён пасля вайны ва Украіне, а ўжо і фінал на гарызонце бачны. І пасля Гран Пры Фландрыі, што ў мінулыя выхадныя прайшоў у бельгійскім Ломелі, застаецца ўсяго чатыры.

У малодшай катэгорыі MX2, як было адзначана вышэй, пакуль што нічога не зразумела. Хаця гоншчык завадской каманды Monster Energy Yamaha Factory Racing Яга Гіртс свой хатні этап можа запісаць сабе ў актыў, у адрозненні ад свайго галоўнага канкурэнта Тома Віаля з Red Bull KTM Factory Racing. Дома, як усе ведаюць, дапамагаюць і сцены, хаця шанцы ўсіх удзельнікаў сусветнага мотакросавага першынства гэтым разам былі зраўнаваныя – па вядомай ім усім трасе яны рухаліся ў адваротным кірунку.

Вось і ў кваліфікацыйнай гонцы MX2, а потым і ў першай у нядзелю бліснуў прадстаўнік Nestaan Husqvarna Factory Racing Кай дэ Вольф. Праўда, толькі ў суботу ён лідзіраваў ад старту да фінішу, а вось у нядзелю яму прыйшлося прадэманстраваць свае навыкі абгону. На старце, які выйграў Гіртс, нідэрландзец апынуўся на чацвёртай пазіцыі. Наперадзе апроч Яга былі яго суайчыннік і партнёр па камандзе Роан ван дэ Моосдайк, а таксама партнёр Гіртса Цібольт Беністан.

Прычым і Цібольт, і Роан пачалі гонку вельмі бадзёра: да канца першага круга француз паспеў абагнаць Гіртса, а нідэрландзец – іх абодвух. Аднак неўзабаве Яга і дэ Вольф пачалі адыгрывацца, і да трэцяга круга ўжо займалі першую і другую пазіцыі адпаведна. Іх барацьба за лідарства працягвалася да восьмага круга, на якім Кай нарэшце выйшаў наперад.

Гіртса на фінішы дэ Вольф апярэдзіў на пяць секунд, аднак яны абодва ўсё роўна былі значна хутчэй за ўсіх астатніх. І пераможца першага этапу ў Вялікабрытаніі Сімон Лангенфельдэр з Red Bull GasGas Factory Racing, які скарыстаўся барацьбой супернікаў і фінішаваў у выніку трэцім, зрабіў гэта амаль праз сорак секунд. А Том Віаль, якому зусім не хапала тэмпу – праз адну хвіліну і сорак секунд. Француз атрымаў адмашку клецістым сцягам толькі сёмым, што зусім не было карысна з турнірнага гледзішча.

У другой гонцы французу пашанцавала крыху больш – ён фінішаваў чацвёртым. А вось Гіртс і дэ Вольф ужо не былі такімі яўнымі пэйсмэйкерамі. Стартавалі абодва добра – Яга выйграў хол-шот, Кай апынуўся за яго спінай, скарыстаўшыся памылкай Беністана. На бельгійца ён пачаў аказваць ціск адразу, а абагнаў яго за першыя два кругі. Прычым Гіртс праз свае памылкі прапусціў яшчэ і Лангенфельдэра, які раней абагнаў гоншчыка каманды TEM253 Яна Панкара.

Аднак памылкі дапускалі і дэ Вольф з Лангенфельдэрам, што дазволіла Гіртсу абысці немца і пачаць ціснуць на нідэрландца, якога ён абагнаў на сёмым кругу і на гэты раз сам пачаў адрывацца. Кай пры гэтым пазней прапусціў Лангенфельдэра, але Сімон быў яўна стомлены, і не мог ісці ў адным тэмпе з дэ Вольфам. У выніку той за два кругі да фінішу абагнаў немца, які хутка пасля ўпаў і страціў трэцюю пазіцыю, якая дасталася Кэвіну Хоргма з F&H Kawasaki Racing.

Перамога ў другой гонцы прынесла Гіртсу і перамогу на хатнім Гран Пры. Другое месца заняў дэ Вольф, а Віаль здолеў падняцца на ніжнюю ступень подыуму. Але ў чэмпіянаце француз ужо даволі істотна адстаў ад Гіртса – у яго 567 ачкоў супраць 590 у бельгійца. Лангенфельдэр гераічна трымаецца на трэцяй пазіцыі, маючы 469 балаў. Yamaha лідзіруе ў заліку вытворцаў у MX2 з 631 ачком. KTM мае 606 і займае другую пазіцыю, GasGas на трэцяй, у яго 524 балы.

Аднак у малодшай катэгорыі яшчэ ўсё можа кардынальна змяніцца ў любы момант, тады як MXGP чэмпіёнства Ціма Гайсэра ўжо амаль гарантавана. Таму славенец з завадской Хонды жылы не ірве і за перамогамі не гоніцца. Хаця ў першай нядзельнай гонцы, якую хол-шотам традыцыйна пачаў завадскі гоншчык GasGas Хорхе Прада, ён некаторы час спрачаўся за лідарства, апынуўшыся на другой пазіцыі.

Праўда, хутка прапусціў завадчаніна Ямахі Джэрэмі Сівера, які выйграў напярэдадні кваліфікацыйны заезд, а таксама гоншчыка каманды Husqvarna Factory Racing Браяна Богерса. Пазней Цім абышлі яшчэ некалькі супернікаў, і першую гонку ён скончыў на сёмай пазіцыі. Прада, ізноў жа традыцыйна, не здолеў надоўга затрымацца наперадзе, і паступова адкаціўся на дзявятае месца. Сівер праваліўся не так моцна, але за межамі першай тройкі ўсё ж апынуўся.

Першым жа фінішаваў Богерс, а на другую пазіцыю прарваўся Калвін Влаандэрэн з каманды Gebben Van Venrooy Yamaha Racing. Замкнуў жа першую тройку першага заезду прадстаўнік Kawasaki Racing Team MXGP Рамэн Фэвр. Французу амаль удалася паўтарыць гэтае дасягненне ў другой гонцы, але ў ёй ён застаўся на парогу першай тройкі.

Прада і ў другім заездзе не здолеў канвертаваць хол-шот у перамогу, прычым з першай пазіцыі іспанец на гэты раз адкаціўся на дзясятую. Хутчэй за ўсіх жа быў завадскі гоншчык Ямахі Глэн Колдэнхоф, які захапіў лідарства на чацвёртым кругу, і ўжо нікому яго не саступіў. Другім нейкі час ішоў Фэвр, але на трынаццатым кругу яго абагнаў Влаандэрэн, які трыма кругамі раней апярэдзіў Богерса. Які крыху пазней у сваю чаргу абагнаў Фэвра і фінішаваў трэцім. Затое менавіта Браяну дасталася перамога на Гран Пры Фландрыі, якая стала яго першай у MXGP. Влаандэрэн заняў другое месца, Колдэнхоф трэцяе – увесь подыум апанавалі нідэрландцы.

Гайсэр у пратаколе этапу апынуўся на сёмым месцы, што зусім яго не засмуціла – лідзіруе ён па-ранейшаму ўпэўнена, маючы 605 ачкоў. Сівер застаўся другім, у яго 483 ачкі. Прада ўдалася ўтрымацца на трэцяй пазіцыі, у яго 465 балаў. А вось у заліку вытворцаў лідзіруе цяпер Yamaha, у якой 618 ачкоў. Шэсць ёй саступае Honda, якая апусцілася на другую пазіцыю. GasGas з 495 баламі па-ранейшаму трэці.

Наступны этап чэмпіянату свету па мотакросе 5-7 жніўня прыме шведская Удэвала.