Фінал, які амаль нічога не вырашаў, але штосьці ўсё ж вырашыў. Сезон MXGP фінішаваў у Турцыі

Фота: mxgp.com

На апошнім этапе чэмпіянату свету па мотакросе, што прайшоў на мінулых выхадных у турэцкім Аф’ёнкарахісары, заставалася вызначыць чэмпіёна ў малодшай катэгорыі MX2. Ім заслужана стаў гоншчык завадской каманды Red Bull KTM Factory Racing Том Віаль, які быў адным з нямногіх, хто змагаўся да канца.

Украіна ўжо дзвесце дзён супрацьстаіць агрэсіі з боку расійска-фашысцкіх захопнікаў, але яна будзе змагацца не да канца, а да перамогі. Які, зрэшты, усё ж такі будзе канцом імперыі, якую спрабуе ці то аднавіць, ці то ўтрымаць ад канчатковага заняпаду звар’яцелы дыктатар.

Вызваленне Украіны дапаможа вызваліцца і Беларусі, лепшыя з сыноў і дачок якой таксама набліжаюць перамогу нашых суседзяў і сяброў. Яны дапамагаюць УСУ у іх контрнаступленні і дораць нам у апошнія дні добры настрой, надзею і веру ў будучыню. Слава Україні! Героям Слава! Верым! Можам! Пераможам! Жыве Беларусь!

Як тут не ўспомніць Турцыю не толькі з нагоды таго, што ў яе для сканчэння свайго сезона завітаў сусветны мотакрос, але і за дапамогу Украіне. Найперш гэта тычыцца канкрэтна кампаніі Baykar, якая вырабляе знакамітыя «Байрактары». Ёсць у туркаў і свае выдатныя мотагоншчыкі, толькі пакуль што не ў кросе, а ў Супербайке. А вось свой этап сусветнага мотакросу у Турцыі ёсць.

Аф’ёнкарахісар у гэтым годзе закрываў сабою сезон, але паколькі збольшага ў чэмпіянатах усё было зразумела, на фінал прыехала няшмат удзельнікаў. Галоўныя дзейныя асобы, зрэшты, былі на месцы, таму што ў малодшай катэгорыі MX2 усё вырашалася менавіта на фінале. Том Віаль прыбыў у Турцыю ў ролі таго, хто даганяе, і быў у найменей выгадным становішчы.

Аднак пачаў француз з перамогі ў кваліфікацыйнай гонцы, а працягнуў (і скончыў) перамогамі ў абодвух нядзельных заездах. Пры гэтым першы ён пачаў хол-шотам і пралідзіраваў ад старту да фінішу. Другім адмашку клецістым сцягам адкрываў той, хто ў Аф’ёнкарахісар прыехаў лідарам чэмпіянату – гоншчык завадской каманды Monster Energy Yamaha Factory Racing Яга Гіртс.

Пры гэтым бельгіец спачатку апынуўся за гоншчыкам Nestaan Husqvarna Factory Racing Каем дэ Вольфам і Сімонам Лангенфельдэрам з Red Bull GasGas Factory Racing, якія фінішавалі трэцім і чацвёртым адпаведна. Яга вельмі пашанцавала, што ніхто з іх не паспеў дагнаць яго, калі ён паваліўся на дзясятым кругу.

Другім Гіртс стаў і па выніках другой гонкі, але яна прайшла ў нейкім сэнсе весялей. З Віалем у яго барацьба ішла ўжо болей шчыльная, тым болей што Яга адкрыў заезд хол-шотам. І не адпусціў Віаля далёка, пакуль той выйшаў наперад. На сваю бяду, на самой справе, таму што калі бліжэй да фінішу Том памыліўся і ўпаў, зрабіў ён гэта акурат перад Гіртсам, які таксама не ўтрымаўся на колах.

Падняўся раней француз, ён жа і перасек фінішную лінію першым. Трэцім па выніку гонкі і этапу стаў завадскі гоншчык Хускварны Роан ван дэ Моосдайк. Гіртс заняў другое месца і у абедзвюх гонках, і па выніках Гран Пры Турцыі, і па выніках сезону. Віалю, які стаў чэмпіёнам з 758 ачкамі, Яга саступіў усяго чатыры. Трэцяе месца заняў Лангенфельдэр, які набраў 596 балаў. Yamaha выйграла ў заліку вытворцаў у MX2, набраўшы 808 ачкоў. KTM з 797 баламі заняў другое месца, GasGas замкнуў першую тройку, у яго 652 ачкі.

У старэйшай катэгорыі MXGP усё даўно вырашана, і гоншчык завадской каманды Honda Цім Гайсэр стаў чэмпіёнам яшчэ па выніках Гран Пры Фінляндыі. На фінал ён мог бы і не ехаць, але прыехаў, як і ўсе фаварыты чэмпіянату.

Завадчанін Ямахі і цяпер ужо экс-чэмпіён MX2 Максім Рэно выйграў кваліфікацыйную гонку і першую з нядзельных. Хіба што ў ёй француз пазмагаўся са сваім партнёрам па камандзе Джэрэмі Сіверам, які стаў аўтарам хол-шоту. Пры гэтым на першым кругу лідарам пабываў і гоншчык Kawasaki Racing Team MXGP, і напарнік Гайсэра па Team HRC Мітчэл Эванс.

І калі Фэвра і Сівера Максім Рэно абагнаў хутка, то з Эвансам усё было нашмат скаладаней, і з ім француз справіўся толькі на восьмым кругу, калі шанцаванне аўстралійца скончылася і ён пачаў губляць пазіцыі. Фінішаваў Мітч толькі дванаццатым. Сівер перасек фінішны створ другім, а вось Фэвру ў першай тройцы ўтрымацца не ўдалася, ён адкаціўся на сёмую пазіцыю. Трэцім жа фінішаваў Гайсэр.

Другую гонку хол-шотам пачаў Рэно, які, зрэшты, ўпаў ужо на першым кругу, а да фінішу дабраўся на восьмай пазіцыі. Эванс, зрэшты, пасля свайго болей сур’ёзнага падзення наогул сышоў з дыстанцыі. Лідарства ж на першым кругу захапіў Фэвр, які на гэты раз памылак не дапусціў і першым жа і фінішаваў. Гайсэр скончыў гонку следам за ім, Сівер замкнуў першую тройку. Як і Ціму, яму ўдалася на трасе абагнаць іспанскага гоншчыка Red Bull GasGas Factory Racing Хорхе Прада.

Гайсэр пры гэтым атрымаў выніковую перамогу на турэцкім этапе, Сівер заняў другое месца, Фэвр падняўся на ніжнюю ступень подыуму. Сезон жа Цім скончыў з 763 ачкамі. Сівер стаў віцэ-чэмпіёнам, набраўшы 657 балаў, Прада заняў трэцяе месца, у яго 589 ачкоў. У заліку вытворцаў жа перамагла Yamaha, у якой прадстаўніцтва болей шырокае, што дазволіла ёй зарабіць 805 ачкоў, на трыццаць пяць болей, чым Honda, якая заняла другое месца. GasGas і тут стаў трэцім з 625 баламі.

Чэмпіянат свету па мотакросе 2022 года скончаны, але з мотакросам як дысцыплінай мы пакуль што не развітваемся. 25 верасня ў Б’юкенэне, штат Мічыган, ЗША, пройдзе Мотакрос Нацый.