Палоў перамог на Лагуна Сэке, Паўэр – у чэмпіянаце. Гран Пры Мантэрэя завяршыў сезон IndyCar

Фота: indycar.com

Пілот Chip Ganassi Racing Алекс Палоў быў непераможны на легендарнай трасе ў Каліфорніі, аднак шанцаў на тытул ужо не меў. Таму Уіл Паўэр моцна не напружваўся і стаў у выніку чэмпіёнам IndyCar 2022 года. А яго партнёр па Team Penske Джозэф Ньюгардэн проста малайчына.

Галоўныя малайчыны свету зараз – гэта Узброеныя сілы Украіны і іншыя яе абаронцы. Агрэсар меркаваў знішчыць іх, іх дзяржаву і ўзяць Кіеў за тры дні, я цяпер сам стогне ўжо які тыдзень. Усё чужое, што было адабранае сілай, прыходзіцца вяртаць законнаму ўладальніку і адчуваць пры гэтым сорам і ганьбу.

Раней ці пазней пакідаць акупантам прыйдзецца і Беларусь, якую тутэйшы здраднік аддаў яму, каб усядзець на троне. Чым пахне справа для яго гаспадара, ён ужо зразумеў, але крытычна важна будзе не паверыць ягоным кракадзілавым слязам, якія ён абавязкова будзе ліць. Вінаваты ён перад двума народамі, перад двума і мусіць несці адказнасць. Слава Україні! Героям Слава! Верым! Можам! Пераможам! Жыве Беларусь!

Украіна правільна робіць, што беражэ сваіх ваяроў. Вайна – гэта не гонкі, спаборніцтва тут недарэчна, бо цана – не кубкі, тытулы і прызавыя, а чалавечыя жыцці. Гонкі ж пакінем уласна гоншчыкам, у тым ліку серыі IndyCar, якая ў мінулую нядзелю завяршыла свой сезон на трасе Лагуна Сэка ў Каліфорніі.

Уіл Паўэр прыехаў на Гран Пры Мантэрэя лідарам чэмпіянату і зрабіў заяўку на лідарства ў кваліфікацыі, выйграўшы поўл. Аднак у гонцы за першую пазіцыю аўстраліец не надта трымаўся, тым больш што Алекс Палоў у гоначным рэжыме ўсё адно быў хутчэй і, стартаваўшы адзінаццатым, ужо на шаснаццатым кругу захапіў лідарства.

Іспанец узначальваў пелатон агулам 67 кругоў з 95, і на фінішы «прывёз» бліжэйшаму пераследніку палову хвіліны. Толькі пераследнікам тым быў не Паўэр. Як і Алексу, правільная тактыка дапамагла партнёру Паўэра па Team Penske Джозэфу Ньюгардэну. Праз памылку ў кваліфікацыі стартаваў ён толькі дваццаць пятым, але ў гонцы стрымаць яго не здолеў ніхто, асабліва ў знакамітым павароце Corkscrew – Штопары.

Таму, верагодна, стартуй ён вышэй, менавіта ён бы і перамог, а можа, і тытул заваяваў бы. А так жа Ньюгардэн задаволіўся другім месцам і ў гонцы, і ў чэмпіянаце, дзе ён набраў 544 ачкі. Трэцім стаў у выніку партнёр Палоў па Chip Ganassi Racing (дарэчы, іспанец з камандай памірыўся і застанецца ў ёй і ў наступным годзе) Скот Дзіксан. Ён на Лагуна Сэке фінішаваў дванаццатым, а за сезон набраў 521 ачко, на адзінаццаць болей чым Алекс, які замкнуў першую пяцёрку. Скот МакЛафлін, дарэчы, набраў тыя ж 510 балаў, але стаў чацвёртым.

Паўэр жа на Гран Пры Мантэрэя заняў трэцяе месца, чаго яму хапіла для чэмпіёнства, ужо другога ў IndyCar. Сезон ён скончыў з 560 ачкамі, прытым што, у адрозненні ад Ньюгардэна, МакЛафліна і Дзіксана перамог толькі аднойчы – у Дэтройце. Так ці інакш, віншуем яго і яго прыхільнікаў. Ну і чакаем наступнага сезона, як хутчэйшай перамогі Украіны.