Рэкорд не атрымаўся. Замест пятай перамогі ў сезоне сусветнага ралі-кросу Йохан Крыстоферсан атрымаў штраф

Фота: fiaworldrallycross.com

Чатырохразовы чэмпіён свету па ралі-кросе Йохан Крыстоферсан і так ужо, здаецца, ўсталяваў рэкорд па колькасці перамог запар. Хіба што ён мог быць яшчэ больш уражлівым, але ў партугальскім Монталегрэ швед сам сабе перашкодзіў.

Звар’яцелы расійскі дыктатар не адмаўляецца ад жадання адпомсціць Украіне за тое, што яна вырашыла жыць без яго. Ён і катуе яе ўжо больш за паўгода, але ў сваёй подлай вайне сапраўдных поспехаў так і не дабіўся. Бо ўкраінцы абараняюць і вяртаюць сваё, а агрэсар прыпёрся па чужое. Быццам бы частковая, а на самой справе масавая і ўсеагульная мабілізацыя, якую пачвара абвясціла сёння, ёй не дапаможа. Як не дапаможа і ёй і яе калгасны паслугач, што сядзіць у Беларусі.

Апошні разумее, што беларусы, калі ім выдаць зброю, выкарыстаюць яе зусім не супраць украінцаў, сваіх суседзяў і сяброў, а супраць сапраўднага здрадніка, вінаватага ў злачынствах супраць двух народаў. Якія абодва абавязкова вызваляцца, каб у будучыні жыць у міры і асобна ад саўковай імперыі. Слава Україні! Героям Слава! Верым! Можам! Пераможам! Жыве Беларусь!

Сваімі злачынствамі бункерны дзед пазбавіў Расію прагрэсу і магчымасці развівацца. А расійскіх спартсмэнаў – бліскаць на міжнароднай арэне пад сваімі сцягамі. Некалі расіяне выступалі і ў ралі-кросе, аднак цяпер іх там не засталося, дый сама дысцыпліна змянілася, і яе галоўная катэгорыя стала электрычнай.

Змянілася і траса ў партугальскім Монталегрэ, куды чэмпіянат завітаў у мінулыя выхадныя. У гэтым годзе на ёй былі пераробленыя першы паварот і джокер-пятля, што, зрэшты, не паўплывала на расклад сіл. Збольшага таму, што сіл тых няшмат – не конскіх у рухавіках машын, а чалавечых.

Удзельнікаў у сусветным пяршынстве пакуль што мала, і нават двайны пракол, які чатырохразовы і дзейсны чэмпіён Йохан Крыстоферсан злавіў у адным з адборачных заездаў у суботу, этап яму не сапсаваў. Ну толькі што адабраўся швед у другі паўфінал, у якім перамог, не надта напружваючыся.

Хаця джокер-пятлю Йохан наведаў адным з першых ужо на першым кругу. Наскок на братоў Кэвіна і Цімі Хансэнаў не атрымаўся, і яны засталіся на першай і другой пазіцыях. Затое Крыстоферсан атрымаў перад сабой свабодную трасу і апярэдзіў спачатку Кэвіна, а затым і Цімі, калі кожны з іх заехаў на джокер-пятлю. Йохан перамог, Цімі фінішаваў другім, Кэвін трэцім.

Пракол у адборачных «хітах» перашкодзіў і напарніку Крытоферсана па камандзе – Оле Крысціану Вэйбі. Аднак ён у першым паўфінале захапіў лідарства ўжо ў першым павароце на першым жа кругу і ўпэўнена давёў справу да перамогі. Другім фінішаваў Густаў Бергстром, трэцяй – Клара Андэрсан.

А ў фінале Вэйбі прынёс камандзе пераможны дубль. Оле Крысціан прыкрыў Крыстоферсана на старце, прыкрываў затым і па ходу заезду. На джокер-пятлю яны адправіліся разам на апошнім кругу. Тады ж гэта зрабіў і Кэвін Хансэн, які ў выніку прапусціў Цімі і задаволіўся чацвёртым месцам.

Крыстоферсан атрымаў перамогу і рыхтаваўся паўтарыць поспех у нядзелю. Падставы для гэтага былі – Йохан у чарговы раз выйграў другі паўфінал, у якім Вэйбі ізноў быў другім. Цімі Хансэн фармальна фінішаваў трэцім, але праз паўразварот на джокеры саступіў Крыстоферсану трынаццаць з паловай секунд.

Яшчэ меней пашанцавала Кэвіну ў першым паўфінале. Яго развярнула на першым кругу пасля кантакту з PWR RX1e Нікласа Гронхольма, пасля чаго Peugeot 208 RX1e шведа стукнуўся задняй часткай аб бар’ер з шын і хутка канчаткова спыніўся са зламанай задняй падвескай. Дарэчы, праз паломку падвескі напярэдадні ў першым паўфінале з дыстанцыі сышоў і сам Гронхольм, які гэтым разам выйграў заезд. Яго напарніца Андэрсан фінішавала другой, трэцім адмашку клецістым сцягам атрымаў Рэнэ Мюніх.

Ну а перамогу на этапе Крыстоферсан Гронхольму падарыў. Цімі Хансэн захапіў лідарства на старце, а на другім кругу Йохан яго атакаваў перад першым паваротам і адправіў з трасы ў гравійную пастку. Цімі страціў пару пазіцый, а потым наогул адкаціўся на апошнюю, бо адразу адправіўся на джокер-пятлю. Апошнім ён і фінішаваў, але амаль адразу стаў перадапошнім, бо Крыстоферсану, які перасек фінішную лінію першым, суддзі налічылі 10 штрафных секунд за яго занадта смелую атаку.

Гронхольм жа, наведаўшы джокер рана, здолеў вярнуцца на асноўную трасу на трэцяй пазіцыі, якая пераўтварылася ў другую пасля таго, як па дадатковай пятлі праехала Андэрсан. Клара выехала ззаду Вэйбі і фізічна фінішавала чацвёртай, але пасля пакарання Крыстоферсана паднялася на ніжнюю ступень подыуму. Йохан, які стаў у выніку пятым, пры гэтым захаваў упэўненае лідарства ў чэмпіянаце, у якім ён мае 91 ачко. Вэйбі разам падняўся на другую пазіцыю і мае 70 балаў, на чатыры апярэджваючы Цімі Хансэна, які замыкае першую тройку.

У Партугаліі вызначыўся чэмпіён у катэгорыі Euro RX1, у якой тытул абараніў Антон Марклунд. Пры гэтым ён на сваім Hyundai i20 заняў толькі чацвёртае месца, а перамог Энца Ідэ на Audi S1. Другое месца заняў Яніс Баўманіс на Peugeot 208, а Ульрык Лінэман на Ford Fiesta замкнуў першую тройку. У Euro RX3 наймацнейшым стаў Кобэ Паўэльс, Даміан Літвіновіч заняў другое месца, Нуна Мігель да Кошта Араужу фінішаваў трэцім (усе трое выступаюць на Audi A1).

Сезон чэмпіянату свету па ралі-кросе працягнецца 8-9 кастрычніка на легендарнай трасе Спа-Франкаршам у Бельгіі.