Перамога Dinamic Motorsport, чэмпіёнства Akkodis ASP Team і дзявочыя слёзы на фінале GT World Challenge Europe

Фота: gt-world-challenge-europe.com

На мінулых выхадных у Барселоне завяршыўся сезон серыі GT World Challenge Europe. Яе чэмпіёны за перамогу на этапе не змагаліся, затое змагаліся іншыя.

Расійска-фашысцкая пачвара, што напала на Украіну ў лютым, была перакананая, што ўсе яе злачынствы сыдуць ёй з рук. Яна руйнавала ўкраінскія гарады і забівала ўкраінцаў усіх узростаў, рабавала і гвалціла, захоплівала ўкраінскія тэрыторыі. Але нядаўна яна нарэшце пабачыла, з кім звязалася.

Ужо другі месяц Узброеныя сілы Украіны паспяхова вяртаюць сваё, вызваляюць сваіх грамадзян і ратуюць свет. І сённяшнія непрыемнасці агрэсара з крымскім мостам далёка не апошнія для яго.

Нельга ў дваццаць першым стагоддзі не паважаць суседзяў і ваяваць з імі. Не даваць ім скінуць дыктатара і ўцягваць іх у злачынную вайну таксама нельга. Беларусы не даруюць ні тутэйшай дыктатуры, ні расійскай, і жадаюць поспеху ўкраінцам. Слава Україні! Героям Слава! Верым! Можам! Пераможам! Жыве Беларусь!

Гоншчыкам да абаронцаў Украіны далёка, але многія з іх у самых розных чэмпіянатах  Украіну падтрымліваюць. Такія дакладна ёсць і ў серыі GT World Challenge Europe, якая на мінулых выхадных правяла свой фінальны этап у Барселоне. Праходзіў ён у фармаце Endurance, таму дуэль паміж Клаўсам Бахлерам, Алесіа Пікарыела і Матэа Кайролі з пяцьдзесят чацвёртага экіпажа Dinamic Motorsport і Алесанда П’ер Гуідзі, Алесіа Рэвэрай і Антоніа Фуока з семдзесят першага экіпажа Iron Lynx была працяглай.

З поўлу стартавалі якраз прадстаўнікі Iron Lynx, і іх экіпаж лідзіраваў фактычна ўсю першую палову дыстанцыі. Будучыя ж пераможцы, наадварот, сваю другую стартавую пазіцыю саступілі шэсцьдзесят трэцяму экіпажу Emil Frey Racing у складзе Мірка Барталоці, Джэка Эйткена і Альберта Косты. Аднак хуткасці Ferrari 488 GT3 гоншчыкаў Iron Lynx да пары хапала, каб трымацца ад Lamborghini Huracan GT3 Evo пераследнікаў на бяспечнай адлегласці.

Прынамсі, пакуль за стырном быў П’ер Гуідзі. А вось Равэра, які яго змяніў, падтрымліваць тэмп партнёра па экіпажы не здолеў і патрапіў пад уціск з боку Косты. Размен пазіцый паміж імі адбыўся пад канец другой гадзіны гонкі, але тут надышоў час другога піт-стопа, пасля якога Iron Lynx зноў апынуліся наперадзе. Але яшчэ болей удала згулялі ў Dinamic Motorsport, «падрэзаўшы» канкурэнтаў наперадзе раннім фінальным піт-стопам пяцьдзесят чацвёртага экіпажа. У выніку ў фінальную гадзіну яны на сваім Porsche 911 GT3-R уехалі лідарамі.

Семдзесят першая машына Iron Lynx, зрэшты, усё роўна была блізка, а за сорак хвілін да сканчэння часу пелатон спрасаваў аўтамабіль бяспекі – на трассе спынілася Ferrari восемдзесят трэцяга чыста жаночага экіпажа Iron Dames. Рахель Фрэй, Сара Баві і Мішэль Гацінг лідзіравалі ў заліку Gold Cup, але да фінішу не дажыла скрыня перадач іх машыны. На дзяўчат было балюча глядзець, плакалі яны шчыра і горка.

Затое калі праз дзесяць хвілін быў дадзены рэстарт, у Iron Lynx паспрабавалі адваяваць першую пазіцыю ў Dinamic Motorsport. Непасродна на рэстарце Кайролі лідарства ўтрымаў, але пазней дапусціў памылку, якой паспрабаваў скарыстацца Фуока. І хоць абгон так і не адбыўся, напружанасць захоўвалася да самага фінішу – семдзесят першы экіпаж фінішаваў у 0,873 ад пяцьдзесят чацвёртага. Пры гэтым Барталоці, Эйткен і Коста, якія занялі трэцяе месца, на фінішы саступілі пераможцам дзевяць секунд.

Рафаэле Марчэла Даніэль Хункадэла і Жуль Гунон з восемдзесят восьмага экіпажа Akkodis ASP Team стартавалі ў Барселоне восьмымі, а на фінішы замкнулі першую пяцёрку. Але пры гэтым каманда перамагла ў сваім заліку серыі, а Марчэла – у сваім. Калектыў за сезон набраў 237,5 ачка, на васямнаццаць апярэдзіўшы Team WRT якія занялі другое месца. Іх лепшым экіпажам на фінальным этапе стаў трыццаць другі – Дрыс Вантор, Рыкарда Фелер і Шарль Віртс, якія фінішавалі сёмымі. Каманда Sainteloc Racing са 108 ачкамі стала па выніках сезона трэцяй.

Марчэла, які зарабіў 200,5 бала, аднаасобна стаў чэмпіёнам GT World Challenge Europe у 2022 годзе. Гунон пры гэтым замкнуў першую тройку са 130,5 ачка, а Вантор і Віртс, якія набралі 174,5 бала, на пару сталі віцэ-чэмпіёнамі.

У гонках GT ёсць на што паглядзець, таму будзем чакаць наступнага сезона, які пачнецца 22 красавіка ў Монцы.