Аляксандр Куль: «Ніхто са спонсараў пакуль не адмовіў «Цмокам» з прычыны выкарыстання беларускай мовы»
Дырэктар цэнтра эканамічнага развіцця і спартыўнага маркетынгу мінскіх «Цмокаў» Аляксандр Куль заявіў, што клуб, які пашырае выкарыстанне беларускай мовы, не прайграў ад гэтага фінансава.
– «Цмокі», як і чэшскі «Німбурк» ці латвійскі ВЭФ, праводзяць паслягульнявыя прэс-канферэнцыі на нацыянальнай мове. З боку расійскіх калег не узнікала ніякіх пытанняў? Большасць каманд у лізе ВТБ прадстаўляюць вялікага суседа.
– Ніводнага пытання не было: ні з боку лігі, ні з боку трэнераў, ні з боку некага яшчэ.
– А партнёры клуба, спонсары? Не выдавалі дырэктываў, напрыклад, наконт рэкламавання ўласнай прадукцыі, паслуг? Маўляў, толькі па-расійску…
– Не. Пэўныя партнёры нават тэлефанавалі і прапаноўвалі даслаць нам інфармацыю пра сябе, свае прадукты па-беларуску. Лагатып, напрыклад, прапаноўвалі самі перарабіць.
– Выпраўце, калі памыляюся. Атрымоўваецца, што з эканамічнага погляду са зменай курса на беларушчыну нічога не змянілася ў горшы бок?
– Не, ніякіх праблем мы не заўважылі. Ніхто са спонсараў пакуль не адмовіў нам з прычыны выкарыстання беларускай мовы. Спадзяемся, што, наадварот, прыцягнулі да сябе ўвагу такім чынам, – сказаў Куль.
21 снежня Куль прыняў удзел у акцыі «Чытаем па-беларуску з Velcom», якая ладзілася ў сталічнай школе № 59.
