Безальтэрнатыўны дубль. Экіпажы каманды Toyota дамінавалі ў гонцы 6 гадзін Фудзі

Фота: fiawec.com

Усё самае цікавае ў чэмпіянаце свету па аўтагонках на цягавітасць пачнецца ў наступным годзе. Пакуль жа ў ім па-ранейшаму ёсць Таёта і ўсе астатнія. Менавіта так і падзяліўся фінішны пратакол этапу на трасе Фудзі.

Добрыя навіны ў тым, што Украіна працягвае сваё контрнаступленне і паступова вызваляецца ад расійска-фашысцкіх захопнікаў. Нягледзячы на раны, якія нанесла і працягвае наносіць ёй пачвара-агрэсар, сваіх самых вялікіх іклоў яна ўжо пазбавілася.

Паспрыялі гэтаму і беларусы, якія таксама ўсталі на абарону волі і незалежнасці нашых суседзяў і сяброў. Іх перамога патрэбная нам, бо яна дапаможа нам самім вызваліцца ад акупацыі і ад здрадніка, які ўзурпіраваў уладу, прайграўшы выбары. Але вінаваты ён у злачынствах адразу супраць двух народаў, і ад адказнасці ўжо не адвярцецца. Слава Україні! Героям Слава! Верым! Можам! Пераможам! Жыве Беларусь!

Наперадзе светлыя часы і ў чэмпіянату свету па аўтагонках на цягавітасць, але тое наперадзе. Цяперашні ж перыяд пераходны, таму ў топавай катэгорыі гіперкараў штосьці цікавае адбываецца рэдка. Вось і на этап у Японіі не прыехала каманда Glickenhaus Racing. Японскі рынак гэтаму вытворцу эксклюзіўных спорткараў не цікавы, і яе заснавальнік Джэймс Глікенхаус вырашыў, што расходы на ўдзел у гонцы там сябе не апраўдаюць.

А вось Peugeot TotalEnergies прыехалі ў поўным саставе. Ім трэба даводзіць да розуму свой гіперкар 9X8, і кожны баявы кіламетр вельмі важны. Перад этапам на трасе Фудзі французы хваліліся, што ўжо значна дапрацавалі машыну пасля яе дэбюту ў Монцы. Але наколькі лепей яна стала, можна было б судзіць, калі б удзельнікаў у класе было болей.

Так-та Пол дзі Рэста, Мікел Йенсэн і Жан-Эрык Вэрнь з дзевяноста трэцяга экіпажа кваліфікаваліся чацвёртымі, а Лойк Дзюваль, Густава Менэзэс і Джэймс Росітэр, якія едуць на дзевяноста чацвёртым аўтамабілі, замкнулі першую пяцёрку. Толькі пяцёрка тая была не проста першай, а адзінай у катэгорыі гіперкараў.

Ну а ў гонцы працягнулі выяўляцца і праблемы з надзейнасцю, што крытычна ў доўгіх гонках. Вось і дзевяноста чацвёрты экіпаж праз дзве з паловай гадзіны пасля старту быў вымушаны адправіцца ў боксы, дзе правёў чатырнаццаць кругоў, пакуль механікі ўхілялі ўцечку алею. Фінішавалі Дзюваль, Менэзэс і Росітэр толькі дваццатымі ў абсалюце, нават ззаду ўсіх прызёраў катэгорыі LMGTE Pro. Прыйшлося рамантавацца і дзі Рэсце, Йенсэну і Вэрню, але не так доўга, як іх калегам, і яны скончылі гонку чацвёртымі.

Лідары заліку пілотаў класа гіперкараў Андрэ Нэгран, Нікаля Лап’ер і Мацьё Ваксів’ер з трыццаць шостага экіпажа Alpine ELF Team і стартавалі, і фінішавалі трэцімі. Іх машына адпрацавала без паломак, але пасля чарговай карэктыроўкі балансу прадукцыйнасці хуткасць яе паменшылася, і ад пераможцаў экіпаж адстаў на два кругі.

Перамаглі ж Себасцьен Буэмі, Брэндан Хартлі і Рыючы Хіракава з восьмага экіпажа. Пачыналі гонку яны другімі, але на доўгай дыстанцыі аказаліся хутчэйшымі за Майка Конвэя, Камуі Кабаяшы і Хасэ-Марыі Лопеса з сястрынскага восьмага экіпажа. Таму ў Таёце, як і заўжды ў такіх выпадках, прымянілі камандную тактыку. Так ці інакш, японскі калектыў на хатняй трасе (а Фудзі належыць кампаніі Toyota) дабіўся дубля.

Вось у катэгорыі прататыпаў LMP2 традыцыйна ўсё было цікавей. Барацьба тут, праўда, у асноўным ішла паміж Рабэрта Гансалесам, Антоніу Феліксам да Коштай і Уілам Сцівэнсам з трыццаць восьмага экіпажа Jota, якія стартавалі з першай пазіцыі і трыццаць першым экіпажам WRT – Шонам Гелаэлем, Робінам Фрайнсам і Дрысам Ванторам.

Апошнія стартавалі з чацвёртай пазіцыі, але хутка прарваліся на першую і перыядычна мяняліся ёй з канкурэнтамі з Jota. Тыя лідзіравалі на апошніх хвілінах, але ўсё ж такі вымушаныя былі адправіцца на кароткую дазапраўку і занялі ў выніку другое месца, а перамога дасталася экіпажу WRT. Замкнуў першую тройку дваццаць восьмы экіпаж Jota – Олівер Расмусэн, Эдвард Джонс і Джонатан Абердэйн.

Не удалася канвертаваць поўл у перамогу ў LMGTE Pro і дзевяноста другому экіпажу Porsche GT Team – Міхаэлю Крыстэнсэну і Кэвіну Эстрэ. Пяцьдзесят першая Ferrari 488 GTE Evo каманды AF Corse пад кіраваннем Алесандра П’ер Гуідзі і Джэймса Калада аказалася хутчэй. Хаця Калада з Эстрэ ўсё ж некалькі разоў абмяняліся пазіцыямі ў пачатку гонкі.

Аднак у выніку пяцьдзесят першы экіпаж выйшаў наперад, пачаў адрывацца і атрымаў перамогу. Дый Мігель Маліна і Антоніа Фуока на сястрынскай пяцьдзесят другой машыне таксама пакінулі Porsche 911 RSR-19 Крыстэнсэна і Эстрэ ззаду, таксама прынёсшы сваёй камандзе дубль. Дзевяноста другі экіпаж замкнуў першую тройку.

І толькі ў LMGTE Am уладальнікі поўлу першымі прыйшлі і да фінішу. Зрабілі гэта Бэн Кіцінг, Энрыке Чавес і Марка Сорэнсэн з трыццаць трэцяга экіпажа каманды TF Sport. Выступаць ім прыйшлося на шасі, якое каманда выкарыстоўвае ў Еўрапейскай серыі Ле Ман, бо асноўнае не паспелі адрамантаваць пасля сур’ёзнай аварыі падчас 6 гадзін Монцы.

Аднак і гэты Aston Martin Vantage AMR аказаўся дастаткова хуткім, каб стрымаць ззаду такіх грозных супернікаў, як дзяўчат Рахель Фрэй, Мішэль Гацінг і Сару Баві на восемдзесят пятай Ferrari каманды Iron Dames. І тут без іроніі – жалезныя дамы доўга не адпускалі далёка супернікаў, хаця ў выніку і адсталі на круг, заняўшы другое месца. На ніжнюю ступень подыуму падняліся Сатошы Хашына, Таманобу Фуджыі і Чарльз Фаг з семсот семдзесят сёмага экіпажа каманды D’Station.

У заліку гоншчыкаў катэгорыі гіперкараў пасля этапу 6 гадзін Фудзі утварылася двоеўладдзе, або, калі хочаце, шасціўладдзе. У Хартлі, Хіракавы і Буэмі, якія цяпер з’яўляюцца лідарамі, з Нэгранам, Ваксів’ерам і Лап’ерам роўная колькасць балаў – па 121. Лопес, Кабаяшы і Конвэй з 95 ачкамі трэція. Вось сярод вытворцаў Toyota лідзіруе аднаасобна – у яе 147 ачкоў. Alpine на другой пазіцыі са 121 балам, Glickenhaus па-ранейшаму трэці і мае 70 ачкоў.

Нягледзячы на другое месца ў Фудзі, да Кошта, Гансалес і Сцівэнс толькі замацавалі сваё лідарства ў заліку гоншчыкаў LMP2. У іх 114 ачкоў супраць 86 у Джошуа Пірсана і Олівера Джарвіса з United Autosports USA, якія разам з Александрам Лінам занялі ў Японіі пятае месца. Ад іх на шэсць ачкоў адстаюць прадстаўнікі Realteam Racing by WRT Фердзінанд Габсбург, Нарман Нато і Руі Андрадэ. Яны ў Фудзі фінішавалі чацвёртымі.

П’ер Гуідзі і Калада, маючы 120 ачкоў, працягваюць лідзіраваць ў заліку гоншчыкаў катэгорыі GT. Эстрэ і Крыстэнсэн, у якіх 109 балаў, на другой пазіцыі, трэцюю, адстаючы ад іх усяго на тры балы, займае Джанмарыя Бруні, які ў Фудзі не прыехаў. Ferrari і Porsche ў заліку вытворцаў раздзяляе ўсяго адно ачко – італьянцы лідзіруюць з 216. Chevrolet мае 75 балаў і займае трэцюю пазіцыю.

Наступны этап WEC будзе і апошнім у гэтым сезоне і пройдзе ў Бахрэйне 10-12 лістапада, прычым яго гонка будзе 8-гадзіннай. А яшчэ адначасова з чэмпіянатам свету па аўтагонках на цягавітасць там свой наступны этап правядзе сусветны Турынг, фінал якога адбудзецца 26-27 лістапада ў Джыдзе.