Бітва за Урал

У аўторак, 18 лютага, у екацярынбургскім Палацы гульнявых відаў спорту "Цмокі" паспрабуюць выканаць адразу чатыры задачы: узяць рэванш за крыўднае паражэнне ў першым крузе, упершыню ў сезоне адолець клуб з Расіі, аформіць пуцёўку ў чвэрцьфінал Еўрачэленджа, а таксама гарантаваць сабе першае месца ў групе "L" па выніках стадыі топ-16. Сустрэча пачнецца а 16.00 па беларускім часе.

Да нябачанай дагэтуль вехі - чвэрцьфіналу Еўрачэленджа - нашай камандзе застаўся ўсяго крок. Улічваючы, што падапечныя Данальдаса Кайрыса ўжо маюць у актыве тры перамогі ў чатырох паядынках Топ-16, для выхаду ў плэй-оф ім дастаткова атрымаць адну вікторыю ў двух пакінутых сустрэчах. Першую спробу ў дасягненні мэты мінчукі распачнуць ужо заўтра, у паядынку з "Уралам". Камандай, з якой на дадзены момант "драконы" дзеляць першае месца ў групе L.   Перад дуэллю гэтых калектываў на "Мінск-Арэне" мы згадвалі пра тое, што на карысць "Цмокаў" можа згуляць геаграфічнае размяшчэнне Екацярынбурга. Адносна доўгі пералёт, вымушаная адаптацыя да трохгадзіннай розніцы ў часе - ва ўмовах шчыльнага календара гэты фактар здольны згуляць немалую ролю. Зрэшты, на родным паркеце Ульянку і кампаніі ён не дапамог.

Цяпер жа няпросты ваяж на чужую тэрыторыю чакае нашых улюбёнцаў. Пры гэтым дадатковыя цяжкасці звязаныя з тым, што ў нядзелю беларускі калектыў правёў найцяжэйшы матч з "Азаўмашам", які, нагадаем, расцягнуўся да двух авертаймаў. У выніку хвацкай закруткі сюжэту і працягласці сустрэчы адразу пяць гульцоў нашай каманды - Ульянка, Трасцінецкі, Міркавіч, Харпер і Бэнсан - правялі на пляцоўцы больш за паўгадзіны. Тут бы перавесці дух, але магчымасці для паўнавартаснага аднаўлення фізічных і маральных сіл, паўторымся, мінчукі пазбаўленыя.

У гэтым сэнсе "Уралу" пашанцавала больш. Апошні матч у рамках Суперлігі калектыў праводзіў у пятніцу, на родным паркеце перамогшы "Універсітэт Югру" аж на 41 ачко. Што цікава, і наступныя чатыры сустрэчы - у рамках што ўнутранага першынства, што Еўрачэленджа - наш супернік правядзе на родным паркеце.   Асцярогі ўзнікаюць яшчэ і ад згадкі пра першы матч. Нагадаем, у той дуэлі, якая расцягнулася на 45 хвілін гульнявога часу, вікторыю атрымалі госці. Пры гэтым пераможны, па сутнасці, кідок з-за дугі Фліс рэалізаваў аж за 1.15 да сірэны. Тая няўдача, як вы памятаеце, стала адзінай асечкай мінчукоў у Топ-16.

Зрэшты , па слядах паядынку "Урала" з "Бакен Бэарс" на мінулым тыдні можна смела канстатаваць: наш будучы апанент усё ж уразлівы. Прымусіўшы суперніка здзейсніць 18 страт і вымусіўшы таго перманентна, але не занадта паспяхова, атакаваць з перыметра (толькі 8 з 29 "траячак" дасягнулі мэты), дацкі клуб хай і перашкодзіў "Цмокам" у датэрміновым афармленні выхаду ў чвэрцьфінал, але затое злёгку падмог у барацьбе за першае месца ў групе. Зараз вікторыя з розніцай у 2 і больш ачкі гарантуе мінчукам першынство ў пуле. Хай пакуль і не зусім зразумела, хто з лідараў групы "K" - турэцкі "Газіянтэп" ці расійскі "Трыумф" - выглядае больш зручным супернікам па плэй-оф. Стадыі, ад якой беларусаў, паўторымся, аддзяляе ўсяго адзін поспех.