Усе выгоды. Чаму варта наведаць матч «Цмокаў» з «Енісеем»

1 сакавіка а 17.00 "Цмокі-Мінск" на родным паркеце згуляюць з краснаярскім "Енісеем". Сустрэча старых знаёмых, дэбют аднаго з лепшых сяброў Крыса Пола, зручнасць апанента і помста за Еўрачэлендж - сярод прычын, па якіх варта наведаць Мінск-Арэну вечарам нядзелі.

ПЕРШАЯ ПЕРАМОГА

За апошнія некалькі месяцаў "Цмокі" тройчы сустракаліся з "Енісеем". Прычым менавіта ў двубоі з краснаярцамі мінчукі атрымалі першую вікторыю ў сезоне. Здарылася гэта яшчэ 16 лістапада. Менавіта тады беларуская дружына збудавала ўражлівы "камбэк" на мяжы трэцяй і заключнай чвэрцяў, па волі выпадку адкрыла ў Пастухове добрага "персанальшчыка", а таксама паспадзявалася на індывідуальнае майстэрства Міркавіча ў эндшпілі.  На шчасце, у той сустрэчы серб не падвёў і прынёс "драконам" першыя станоўчыя эмоцыі ў бягучым баскетбольным годзе.

ПОМСТА ЗА ЕЎРАЧЭЛЕНДЖ

Некалькімі днямі пазней, праўда, "Цмокі" усё ж саступілі "Енісею", але ўжо ў рамках Еўрачэленджа. Менавіта тая крыўдная параза і стала перашкодай, што аддзяліла падапечных Ігара Грышчука ад выхаду ў наступны раўнд. Дамажыся сталічная каманда вікторыі - глядзіш, і выйшла б у топ-16. Але, на жаль, яна спатыкнулася яшчэ на першай стадыі. Так, у апошнім туры мінчукі другі раз у сезоне адолелі красноярцаў. Але статус-кво той вынік не змяніў - і горкі асадак ад сустрэч з сібіракамі ўсё ж застаўся. Асабліва калі ўлічыць, што апошнія прабіліся і ў чвэрцьфінал трэцяга турніру Еўропы.

ЗРУЧНЫ СУПЕРНІК

У цэлым жа "Цмокі" маюць станоўчы баланс перамог і параз у матчах з "Енісеем" у бягучым сезоне - у трох сустрэчах мінчукі атрымалі дзве вікторыі. У гэтай сувязі ўзгадваецца і сезон-2011/12 - мабыць, горшы ў гісторыі "драконаў" з пачатку выступленняў у лізе ВТБ. Тады Кудраўцаў і кампанія ўсяго раз апынуліся са шчытом у групавым раўндзе. У ролі жа пераможаных выступілі менавіта краснаярцы.

ЛЕПШЫ АСІСТЭНТ ЛІГІ ВТБ

Адным жа з лідараў "Енісея" сёння з'яўляецца Донэл Купер - лепшы асістэнт лігі ВТБ (8,7 перадачы ў сярэднім за гульню), які займае другое месца ў Еўрачэленджы ў аналагічнай катэгорыі. Тым самым "малыш" даўно развянчаў міф аб усюдыісным заакіянскім эгаізме. У чым, несумненна, пераканаюцца і мінскія заўзятары, якія змогуць паназіраць за лепшым "распасоўшчыкам" розыгрышу. Застаецца толькі спадзявацца, што Купер праявіць міласэрнасць - і не раздасць 23 (!) перадачы, як у двубоі з "Астаной" месячнай даўнасці.

НОВЫ "ЦМОК"

Апекаваць жа Купера час ад часу будзе новы "дракон" Джасцін Грэй, які не так даўно замяніў Стэнлі Барэла. Першапачаткова меркавалася, што адзін з лепшых сяброў Крыса Пола выступіць за "Цмокаў" яшчэ ў гульні з УНІКСам. Але фізічныя кандыцыі абаронцы адклалі дэбют да матчу з "Енісеем".

СУСЕДЗІ

Два тыдні таму чэмпіёны Беларусі сустракаліся з "Німбуркам", які размяшчаўся па суседстве ў табліцы лігі ВТБ. З тых часоў чэхі, роўна як і "Байзанс", палепшылі турнірнае становішча - і сёння на 15-м радку апынуўся... менавіта "Енісей". На дадзены момант сібіракі апярэджваюць "драконаў" на дзве перамогі (пры гэтым, праўда, і правялі на адну дуэль больш). Што ў сваю чаргу павышае значэнне бліжэйшага паядынку. Бо ў выпадку патэнцыйнага поспеху падапечныя Ігара Грышчука ўшчыльную падбяруцца да Купера і таварышаў.

БЫЛЫЯ АДНАКЛУБНІКІ

Да таго ж у аднаго з лідараў "драконаў" ёсць дадатковая матывацыя. Так, у мінулым сезоне Аляксандр Кудраўцаў і форвард "Енісея" Тэрыка Уайт выступалі ў адной камандзе - "Газіянтэпе". Праўда, абодва ў Турцыі не затрымаліся. Ды і разам так і не выйшлі на паркет. Але ўсё ж сустрэча са старым знаёмым павінна надаць сіл абаронцу "Цмокаў".