Асанаў – яўны фаварыт, але ў суперніка нашмат больш досведу і накаўтаў. Галоўнае перад 13-м боем беларуса ў «профі»
Ці адаб’ецца «дзіця» ад «асы»?
У ноч з 4 на 5 чэрвеня ў Манрэалі адбудзецца чарговы бой Дзмітрыя Асанава ў прафесійным боксе – за тытул інтэркантынентальнага чэмпіёна IBF і кантынентальнага чэмпіёна Амерыкі WBC. Нараджэнец Маладзечна выступае ў лёгкай вазе – да 61,2 кг. Супернік – венесуэлец Роджэр Гуцьерэс. Напярэдадні прайшло ўзважванне і бітва позіркаў.
Што да антрапаметрыі, то ў апанентаў аднолькавая не толькі вага, але і рост – 177 сантыметраў. Абодва – праварукія. Гуцьерэс на год старэйшы – яму 31. Розніца ва ўзросце невялікая, але ў венесуэльца нашмат больш вопыта ў «профі». Ён правёў 37 баёў – 29 перамог (22 накаўтам), 7 параз і 1 нічыя.
У Асанава – серыя з 12 перамог, 6 з іх накаўтам. У прафесійным боксе беларус пакуль не саступаў, хаця з гэтым можна паспрачацца. У лютым бронзавы прызёр ЧС-2015 у прыгожым стылі разабраўся з Карласам Рамасам. Паядынак быў спынены пасля сёмага раунда – іспанец адмовіўся працягваць бой.
А вось Гуцьерэс не біўся больш за дзевяць месяцаў. Ды і апошні бой прагуляў канадцу Лукасу Бахдзі. Увогуле, у апошніх сямі паядынках у венесуэльца толькі тры перамогі. Выглядае, што кар’ера, якая пачыналася з 15 вікторый і нічыі, ідзе на спад.
Букмекеры аддаюць перавагу менш вопытнаму Асанаву, прычым даволі выразна. Верагоднасць поспеху беларуса ацэньваюць у 90%. І на накаўт каэфіцыент не такі нізкі – прыкладна 45%. Аднак Гуцьерэса нельга назваць простым супернікам. Нездарма ён у 2021-2022 гадах валодаў тытулам чэмпіёна свету WBA (другая паўлёгкая вага).
Падчас падрыхтоўкі да важнага бою Асанаў наведаў матч плэй-оф НХЛ «Манрэаль» – «Бафала» (6:2). У сваіх сацсетках беларускі баксёр прызнаўся, што гэта найлепшая гульня, якую ён бачыў.
Адзначым, што бой Асанава – не галоўная падзея подчас вечара бокса ў Манрэалі. Гэта толькі «разагрэў» паядынка паміж венесуэльцам Альбертам Рамірэсам і брытанцам Леронам Рычардсам за часовы тытул WBA у паўцяжкай вазе.
Фармат бою Асанаў-Гуцьерэс – 10 раўндаў па 3 хвіліны. Мянушка венесуэльца – The Kid. Беларуса – The Wasp. Неўзабаве даведаемся, ці адаб’ецца «дзіця» ад «асы».
