Яшчэ адна бягуха-беларуска робіць карʼеру ў Польшчы: зʼехала пры дапамозе беларускага трэнера, станавілася чэмпіёнкай

Змена спартсменкамі беларускага грамадзянства на польскае –з'ява на сёння не рэдкая, хаця яшчэ пяць гадоў такія падзеі былі даволі ўнікальнымі. Ужо некалькі гадоў з польскім пашпартам выступаюць лёгкаатлеткі Крысціна Ціманоўская і Марына Жодзік. У працэсе яго атрымання знаходзіцца парусніца Анастасія Валькевіч. А некалькі дзён таму польскім грамадзянствам пахвалілася лучніца Карына Казлоўская.

«Я вельмі шчаслівая, што мая мара здзейснілася і што я паўнавартасная полька. Радая, што ў маёй сямʼі я першая, у каго не толькі нацыянальнасць, але і грамадзянства польскае», – напісала ў сваім інстаграме дзяўчына.

Нягледзячы на ​​тое, што грамадзянства Казлоўская атрымала толькі што, яна ўжо прадстаўляла Польшчу на ​​афіцыйных міжнародных спаборніцтвах. Напрыклад, у чэрвені 2023-га з польскай нацыянальнай камандай узяла бронзу на Кубку Еўропы. У кастрычніку таго ж года Казлоўская заяўляла, што прыпыняе кар'еру праз канфлікт з дырэктарам і трэнерам клуба «Лучнік», які прадстаўляла, Янам Лахам. Спартсменка была незадаволеная нагрузкамі і ўвогуле стаўленнем да сябе. Па яе словах, дырэктар нават даходзіў да абраз па нацыянальнай прыкмеце. Казлоўскую звольнілі з клуба з фармулёўкай за прагулы, але дзяўчына падала ў суд з намерам змяніць фармулёўку. Нядаўна яна заявіла, што выйграла справу.

Казлоўская аднавіла карʼеру ў лютым 2024-га, прычым працягнула выступаць за той самы «Лучнік» з горада Жывец, але на міжнародныя спаборніцтвы летась зʼездзіла толькі раз – стала 35-й у асабістым першынстве на турніры ў Славеніі. У алімпійскі склад Казлоўская не патрапіла – як сцвярджае лучніца, яе ў клубе проста не адпусцілі на адбор у зборную.

Казлоўская казала, што пасля пазітыўнага рашэння суда будзе думаць, што рабіць са сваёй карʼерай далей. Змяніць клуб, у якім у яе канфлікт з дырэктарам, няпроста. У кантракце ёсць пункт, паводле якога ў выпадку сыходу або спартсменка, або яе новы працадаўца мусяць выплаціць вялікую кампенсацыю.

Тым часам ёсць яшчэ адна беларуска, якая спрабуе выбудаваць кар'еру ў зборнай Польшчы. Гаворка пра 26-гадоваю Маргарыту Качанаву, якая жыве ў Кракаве. Ураджэнка Гродна выступае ў бегу, яе спецыялізацыя – 400 і 800 метраў. У Беларусі станавілася прызёркай нацыянальных спаборніцтваў, прадстаўляла краіну на міжнародных юніёрскіх турнірах, дзе яе найлепшым вынікам былі чацвёртыя месцы: у 2015-м на летнім алімпійскім фестывалі моладзі ў Тбілісі ў бегу на 800 метраў і там же, але ў 2016-м на юніёрскім чэмпіянаце Еўропы ў шведскай эстафеце.

У Польшчу Качанава пераехала ў 2017-м – паступіла ў Акадэмію фізічнага выхавання імя Браніслава Чэха ў Кракаве. На рашэнне пра пераезд паўплывала польскае паходжанне і беларускі трэнер Качанавай, які, як пісаў tvp.sport.pl, яшчэ падчас Алімпіяды ў Рыа падышоў да польскага спецыяліста Збігнева Круля, вядомага па супрацы са шматразовым чэмпіёнам Еўропы і чэмпіёнам свету ў бегу на 800 метраў Адамам Кшчотам і бронзавым медалістам Гульняў у Токіа на той жа дыстанцыі Патрыкам Добекам, і спытаў: «Яна з Гродна, мае польскія карані, супер бегае. Ты б узяў яе да сябе?». Круль пагадзіўся, і з таго часу Качанава трэнуецца пад яго кіраўніцтвам.

Пасля пераезду ў Польшчу дзяўчына стала выступаць на ўнутраных турнірах, дзе прадстаўляе клуб AZS AWF Кракаў. А з 2022-га стала рэгулярна трапляць у медалі на дарослым узроўні: на чэмпіянатах Польшчы брала золата і срэбра ў бегу на 800 метраў, сабрала ўсе камплекты медалёў на гэтай жа дыстанцыі ў памяшканні, брала бронзу ў эстафеце 4х400.

Увесну 2021-га Качанава атрымала польскае грамадзянства і адмовілася ад беларускага, і ўжо ў ліпені таго года накіравалася ў складзе зборнай Польшчы на моладзевы чэмпіянат Еўропы ў Талін. Там яна рыхтавалася да старту, аднак у апошні момант дзяўчыну заблакаваў World Athletics. Нагодай стаў карантын, які не скончыўся: з моманту апошняга выступу Качанавай за Беларусь (11 ліпеня 2018-га) не мінула трох гадоў. Спаборніцтвы ў Эстоніі пачыналіся 8 ліпеня 2021-га.

Праз два гады Качанава ўсё ж прадставіла Польшчу на міжнародных спаборніцтвах. Спачатку выступіла на 800 метрах на чэмпіянаце Еўропы ў памяшканні ў Стамбуле, а потым паехала на чэмпіянат свету ў Будапешт. На абодвух спаборніцтвах Качанава не змагла прайсці першы этап кваліфікацыі. Затое поспех да яе прыйшоў на ўніверсіядзе ў кітайскім Чэнду, дзе былая беларуска ў складзе новай зборнай выйграла золата ў эстафеце 4х400. А яшчэ ў Кітаі Качанава стала чацвёртай у бегу на 800 метраў, пры гэтым паказаўшы час горшы (2:04.86), чым у Будапешце (2:03.23).

У мінулым годзе Качанава на міжнародных спаборніцтвах Польшчу не прадстаўляла. На чэмпіянаце краіны на 800 метрах фінішавала на пятым месцы (у фінале было 2:03.02), а найлепшым часам за сезон стаў паказнік 2:01.38 – то было паўтарэнне яе асабістага рэкорду. Для таго, каб прэтэндаваць на кваліфікацыю на Алімпіяду, трэба было прабегчы самае большае за 1:59.30. Адзначым, што ад Польшчы ў Парыжы ў бегу на 800 метрах была толькі Ганна Велгаш. Для 31-гадовай спартсменкі гэта была другая Алімпіяда пасля Токіа, дзе яна скончыла выступленне на этапе кваліфікацыі. У Парыж Велгаш адабралася, паказаўшы найлепшы вынік у кар'еры (1.59.07) у паўфінале чэмпіянату Еўропы ў Рыме. У фінале таго турніру Велгаш фінішавала з паказнікам 1:59.99 і заняла шостае месца. У Парыжы полька была далёкая ад сваіх вынікаў на ЧЕ – з дзвюх спроб не змагла прайсці кваліфікацыю: у першым забегу было 2:02.54, у другім – 2:05.77. Карацей, на фоне польскіх суперніц нараджэнка Гродна выглядае канкурэнтнай.

Калі б Качанава працягвала выступаць у Беларусі, то была б адным з лідараў на ўнутраных турнірах. На апошнім чэмпіянаце краіны, які адбыўся ў чэрвені 2024-га, золата ўзяла брастаўчанка Ангеліна Равіч, якая паказала 2:03.99. Толькі ў двух з васьмі афіцыйных забегаў летась Качанава мела горшы вынік.

У Качанавай ёсць інстаграм, які дзяўчына вядзе не вельмі актыўна. Апошні пост з'явіўся там у траўні мінулага года. У інстаграме Качанавай ёсць фатаграфіі і з трэнінгаў, і са штодзённага жыцця.

Першы даступны пост датаваны вераснем 2020-га. На ім дзяўчына на фоне свайго ўніверсітэта з дыпломам, які яна, мяркуючы па подпісе, паспяхова абараніла.