Жудасная аварыя беларускага экіпажа на ралі ў Расіі – патрапілі ў прамыіну і кульнуліся праз нос

Апошні дзень спаборніцтваў ралі-рэйду «Пагоркі Расіі», у якім брала ўдзел і беларуская каманда «МАЗСПОРТаўта», скончыўся для яе сур'ёзнай аварыяй. Падчас чацвёртага этапа экіпаж Віталя Мурылёва на заключным спецучастку патрапіў у прамыіну і перавярнуўся праз нос.

«Трэба было да лесу даехаць і ўзяць лявей у поле. Мы ж адразу нацэліліся на поле, а там аказалася прамыіна шырынёй у машыну. Ну і перавярнуліся праз «пысу», – распавёў штурман Аляксандр Швед.

Акрамя Шведа і Мурылёва ў кабіне знаходзіўся механік Андрэй Копцік. Увесь экіпаж быў дастаўлены ў лякарню – на шчасце ніхто сур’ёзна не пацярпеў. А вось стан машыны выклікае вялікія пытанні.

Пасля трох этапаў экіпаж Віталя Мурылёва займаў чацвёртае месца ў агульнай табліцы ралі-рэйду. Адставанне ад трэцяга месца складала крыху больш за хвіліну.

Аварыя беларускай каманды – не адзінае здарэнне на турніры. Падчас другога дня спаборніцтваў загарэўся грузавік каманды з Чэлябінскай вобласці Расіі., з-за чаго машына выбыла з гонкі.