Германія другі раз выйграла Еўрабаскет, саступаючы цягам большай часткі фіналу, – і ўвайшла ў гісторыю

Германія выйграла Еўрабаскет-2025, перамогшы ў фінале Турцыю 88:83.

Туркі вельмі бадзёра пачалі, здзейсніўшы рывок 13:2, у значнай ступені дзякуючы далёкім трапленням Джэдзі Асмана.

Пасля тайм-аўту Германію сваім эфектыўным адрэзкам вярнуў у гульню Ісаак Бонга. Немцы нават выйшлі наперад.

Далей гульня шла на роўных амаль да канца першай паловы, калі актывізаваўся Алперэн Шэнгун і серыяй дакладных кідкоў стварыў розніцу для сваёй каманды – туркі адправіліся адпачываць, маючы «+6».

Пасля перапынку немцы зноў аператыўна адгуляліся і зноў дзякуючы Бонге, а таксама Дэнісу Шродэру і Францу Вагнеру.

Далей рушыў працяглы адрэзак са спробамі турак адарвацца ў ліку больш як на 6 пунктаў, але немцы не давалі разагнацца, а часам вырываліся наперад. Так і дабраліся да завяршэння – каманды мусілі вызначыць пераможцу ў напружаным клатчы.

Менавіта тут на авансцэну выйшаў Шродэр, які рэалізаваў спачатку складаны праход, а затым – сярэдні стэб-бэк і два штрафныя, зафіксаваўшы канчатковы лік на табло.

Сумарна Германія лідаравала ў матчы ўсяго 10 хвілін, яе супернік – 24.

Германія другі раз выйграла Еўрабаскет пасля трыумфу ў 1993 годзе і заваявала чацвёртую медаль турніру агулам.

Немцы таксама сталі чацвёртай зборнай у гісторыі пасля СССР, Югаславіі і Іспаніі, якая выйграла чэмпіянат свету і Еўрабаскет запар.

Для Турцыі гэта ўсяго другі медаль ЧЕ пасля срэбра ў 2001 годзе.

Шродэр да 16 пунктаў дадаў 12 асістаў, устанавіўшы рэкорд па гэтым паказніку ў фіналах Еўра. Менавіта абаронца «Сакрамэнта» атрымаў узнагароду MVP турніру.

Самым выніковым у Германіі стаў Бонга, які набраў 20 пунктаў. Яшчэ 18 зарабіў Вагнер (+8 падбораў) і 13 – Трыстан Да Сілва.

У Турцыі больш за ўсё пунктаў выбіў Шэнгун – 28. 23 балы набраў Асман, 12 – Бона, 13+6+9 сабраў Шэйн Ларкін.

Фота: ФІБА