Расійскі функцыянер Умар Крамлёў, які ўзначальвае Міжнародную федэрацыю бокса (IBA), падзяліўся меркаваннямі аб магчымым выключэнні бокса з праграмы Алімпійскіх гульняў.

«Больш за мільярд людзей любяць бокс. На мой погляд, ніхто не будзе маўчаць, калі бокс пастараюцца выключыць з Алімпіяды.

Як баксёрская супольнасць і арганізацыя мы зробім усё магчымае, каб бокс быў на Алімпіядзе», – сказаў Крамлёў.

Аматарскі бокс апынуўся пад пагрозай выключэння з праграмы Алімпійскіх гульняў 2028 года з-за шэрагу праблем з кіраваннем і сувязяў з «Газпромам».

Раней, 5 кастрычніка, Савет дырэктараў Міжнароднай федэрацыі бокса (IBA) прагаласаваў за адмену папярэдняга рашэння і дапусціў баксёраў Расіі і Беларусі да спаборніцтваў пад сваёй эгідай з неадкладным уступленнем у сілу.

Нагадаем, што беларускія баксёры былі адхіленыя ад міжнародных спаборніцтваў у адказ на вайну, якая з 24 лютага працягваецца Расеяй ва Украіне з выкарыстаннем тэрыторыі Беларусі.

У канцы верасня расеец Умар Крамлёў быў зацверджаны на пасадзе прэзідэнта Міжнароднай асацыяцыі бокса (IBA). Нагадаем, што IBA адказвае за аматарскі бокс, да якога адносяцца чэмпіянаты свету і кантынентаў, а таксама Алімпійскія гульні. Адзначым, што ў сакавіку 2022 года тры з чатырох прафесійных федэрацый WBC, WBO і IBF (за выключэннем WBA – заўв. Tribuna.com) адмовіліся санкцыянаваць чэмпіёнскія матчы з удзелам беларусаў і расіян.

Аўтар: bytribuna com

Крыніца: Inside the Games