Сяргей Чэрнік: «Калі ў БАТЭ гуляў, думаў, што 70 км у адзін бок – гэта шмат. А тут, аказваецца, і 300 у дзень нармальна заходзіць»

37-гадовы беларускі галкіпер Сяргей Чэрнік узгадаў пра штодзённыя паездкі на трэніроўкі з Мінска ў Слуцк і Салігорск.

– Дзе цяпер твой дом?

– Складана адказаць адназначна. Жыву ў Мiнску, дачка ходзіць тут у школу. Жонка з Гродна, яе бабуля ў маёй вёсцы жыве, у Лунна, у Мастоўскім раёне. Бацькі да гэтага часу там жывуць.

Мне і ў Мінску добра, і ў Гродне. У мяне там цешча, брат, шмат сваякоў. Калі едзем туды, заўсёды імкнуся патрапіць у Лунна. Пакуль не стаўлю сабе пытанне, што лічу сваёй хатай.

– Калі гуляў у «Шахцёры» і «Слуцку», шмат часу праводзіў у Салігорску і Слуцку?

– Не, у большасці выпадкаў катаўся, практычна штодня. То бок, у мяне 300 кіламетраў атрымлівалася да Салігорска, да базы і назад, і 240 туды-назад у Слуцку.

Калі і заставаўся на базе ці ў Слуцку, то толькі ў выпадку двухразовых трэніровак і на заездах, а так стараўся дадому вярнуцца.

Накалясіў нармальна. Калі ў БАТЭ гуляў, думаў, што 70 км у адзін бок – гэта шмат. А тут, аказваецца, і 300 у дзень нармальна заходзіць, – сказаў Чэрнік.