Трухаў пасля нічыёй з «Баранавічамі»: «Гэта найгоршая гульня, якую правёў Арсенал»
Галоўны трэнер «Арсенала» Ігар Трухаў пракаментаваў нічыю з «Баранавічамі» (1:1) у матчы 7-га тура вышэйшай лігі.
– Сёння той выпадак, калі двух меркаванняў быць не можа: гэта найгоршая гульня, якую мы правялі. У нападзе мала што атрымлівалася, да абароны таксама былі пытанні. Балазе ў нас ёсць футбалісты, чыё індывідуальнае майстэрства дазваляе ўплываць на вынік матча.
– Вы не былі гатовыя да таго, што «Баранавічы» так актыўна пачнуць матч з першых хвілін?
– Мы папярэджвалі рабят, але да канца не дастукаліся, што «Баранавічы» – гэта «хатняя» каманда. Яны добра гуляюць на сваім полі, паказваюць якасны футбол. Але заўсёды ёсць праблема з настроем, калі выходзіш супраць суперніка, які пакуль займае месцы ўнізе турнірнай табліцы. У гэтым і крыецца галоўная складанасць.
– Васін і Палякоў ужо выходзяць на поле. Ці можна чакаць іх у стартавым складзе?
– Раз яны сёння ўжо атрымалі гульнявы час, то, вядома, на іх можна разлічваць і ў далейшым, – сказаў Трухаў.
