– Я б не сказаў, што гульня была такой простай, як па ліку. У пэўны момант мы перавярнулі матч. Было вельмі цяжка ў другім тайме, калі селі ў абарону. Нічога не атрымлівалася. Лічу, што мы вытрымалі, гэты перыяд быў ключавым. Удалося забіць, перавярнуць гульню.

– Увогуле, ці можна сказаць, што чэмпіянат за апошнія пару гадоў выраўняўся?

– Я гэта кажу другі ці трэці год – так і ёсць. Гэты год паказвае, што сапраўды цяпер усе на плюс-мінус аднолькавым узроўні, і кожны можа абыграць кожнага. Так, ёсць нейкія каманды, якія крыху мацнейшыя фінансава і па асобах, але ўсё роўна большая частка табліцы ідзе вельмі роўна. Таму тут, думаю, самае важнае – не губляць ачкі і ісці ад гульні да гульні, набіраць як мага больш ачкоў. І гэта, думаю, прынясе станоўчыя эмоцыі ў канцы сезона.

– З пункту гледжання канкурэнцыі разабраліся. А як з цікавасцю гледачоў?

– Думаю, цяпер цяплей становіцца, людзі пацягнуцца, будуць больш прыходзіць. Плюс, думаю, што сваёй гульнёй мы прыцягнем яшчэ больш гледачоў.

– Гэта ўжо чацвёртая перамога запар, яна падымае вас на другую пазіцыю ў табліцы. Ці разумееце, што медалі, у цэлым, дасягальныя?

– Гэта дапушчальна. Адзінае – не трэба цяпер лятаць у аблоках. Трэба трымаць тую планку, якую мы цяпер задаём, і набіраць ачкі ў кожнай гульні.

– Вы ў цэлым ужо казалі, што некаторыя каманды больш фінансава стабільныя. Усе казалі пра «МЛ», што прыйшлі такія гульцы, а па сутнасці два трафеі ўжо прайграныя. Пра што гэта сведчыць?

– Ні пра што гэта не сведчыць. Проста, мне здаецца, і я цяпер без якіх-небудзь намёкаў кажу: калі ў цябе такія значныя па беларускіх мерках гульцы, з імі трэба асабліва працаваць, каб была і матывацыя, і каб ніхто нікому не саступаў, каб быў калектыў. Думаю, што гэта галоўнае. Бо гуляць усе ўмеюць.

– Што да калектыву. Вось у «Мінску» якая цяпер атмасфера пасля чатырох перамог?

– З кожным днём усё лепш і лепш. Увогуле, добрая атмасфера, – сказаў Ксенафонтаў.

Чытайце таксама

Аўтар: Яніна Рамановіч

Крыніца: sport5.by