Пушнякоў пра моцны дождж у матчы з «Баранавічамі»: «Гуляць прыемна – «мячышка» хутчэй ходзіць па мокрым газоне»
Паўабаронца «Нёмана» Сяргей Пушнякоў пасля гасцявой перамогі над «Баранавічамі» (2:1) у 9-м туры вышэйшай лігі ацаніў атмасферу ў горадзе і надвор’е падчас матчу.
– У другім тайме пачаўся моцны дождж. Наколькі гэта ўскладніла задачу?
– Добра, што пайшоў не лівень. Адзначу высокую якасць поля, яно выдатна сябе паказала пры змене надвор’я. Наадварот, «мячышка» хутчэй ходзіць па мокрым траўніку, гуляць прыемна. Плюс стала не так горача, як у першым тайме.
– Ці гуляў ты раней супраць «Баранавічаў»? Падзяліся ўражаннямі ад навічка лігі – яны змаглі чымсьці здзівіць?
– Раней гуляў супраць іх толькі адзін раз у «таварняку» за «Слуцк» – па-мойму, таксама забіў ім з пенальці. А так, «Баранавічы» - арганізаваная каманда. Хочацца, каб такіх клубаў з невялікіх мястэчкаў – Баранавіч, Слуцка, дзе людзі шчыра любяць футбол, у вышэйшай лізе было больш. Для іх схадзіць на матч у выходны – гэта вялікая падзея.
– На стадыёне быў сапраўдны аншлаг. Як табе атмасфера?
– Асобна хацелася б падзякаваць нашым заўзятарам. Вельмі шмат людзей прыехала нас падтрымліваць з Гродна. Іх было вельмі добра чуваць, і яны нам моцна дапамаглі, – сказаў Пушнякоў.
