Легендарная Крысціна Козел (помніце, як яна рухала белфутбол праз лёгкую эротыку?) сышла з ТБ. Яе шоу закрылі – і тут няма ніякай палітыкі
Зараз без працы.
Заўважылі знікненне з радараў спартыўнай медыяпрасторы Беларусі Крысціны Козел? Апошнім разам яе аўтарская перадача «Козел пра футбол» выйшла ў эфір «Беларусь 5» больш за год таму – 5 сакавіка 2020 года. Выпуск быў прысвечаны перамозе брэсцкага «Дынама» ў Суперкубку краіны. Пры гэтым карцінка на экране не суправаджалася голасам вядучай.
Маўчыць і Instagram перадачы. За апошні амаль год, з фiналу Кубка, акаўнт штосьцi апублiкаваў ўсяго раз, калі памёр дырэктар РЦАП-БДУ Уладзімір Пігулеўскі.
«Трыбуна» ўспамінае гісторыю прыкметнай фігуры ў белфутболе і знікненнi перадачы з «Беларусь 5».
Прарвалася на ТБ з iнтэрнэт-версii
Да з’яўлення на тэлебачанні вопыт Козел у футболе абмяжоўваўся працай карэспандэнтам у газеце «Усё аб футболе». Па словах Крысціны, любоў да гэтага віду спорту ў дзяцінстве прывіў бацька.
«Для мяне глядзець футбол гэтак жа натуральна, як для некаторых дзяўчынак прычэсвацца і гатаваць ежу. Бацька ганяў з мужыкамі мяч на аматарскім узроўні і пастаянна браў мяне з сабой. Я дома апранала татавы буцы, і мне здавалася, што гэта нешта вельмі крутое. Калі мы глядзелі футбол, ён мне спрабаваў тлумачыць, што адбываецца на полі», – узгадвала Козел.
У 2012-м дзяўчына з двума вышэйшымі адукацыямі (БНТУ – «Сусветная эканоміка і міжнародныя эканамічныя адносіны» і Акадэмія кіравання – «Дзяржаўнае кіраванне і права») прайшла кастынг тэлевядучых у Белтэлерадыёкампаніі. У тым жа годзе Крысціна пачала працаваць на інтэрнэт-тэлебачанні БТРК, а з пачатку 2013 года ёй даверылі аўтарскі праект пра белфутбол. Першы выпуск «Козел пра футбол» выйшаў у сакавіку – прэм’ера адбылася ў інтэрнэце.
Неўзабаве перадача паралельна з’явілася на «Беларусь 5», што зрабіла яе ўнікальнай у сваім родзе – раней у Беларусі праграмы не пераходзілі з сеціва ў тэлеэфiр. На працягу ўсіх сезонаў Козел заставалася нязменнай вядучай і аўтарам праекта.
Фірмовай фішкай «Козел пра футбол» стала падморгванне вядучай у канцы кожнага выпуску.
Здымалася ў гарачых календарах
Каб павялічыць аўдыторыю праекта, Крысціна раз у год выпускала для прыхільнікаў свайго таленту каляндар, у якім прысутнiчала эротыка рознай ступенi лёгкасцi. Першая праца выйшла ў пачатку 2014 года – перад стартам другога сезона перадачы. Паведамлялася, што наклад календара быў абмежаваны і проста так яго не атрымаць – неабходна было выйграць у конкурсе. Пост з календаром ажно да 2020-га заставаўся самым заплюсаваным у гiсторыi «Трыбуны».
Поўная версiя эратычнага календара ад Крысцiны Козел
У наступным годзе здымкі атрымаліся не менш гарачымі.
Пачатак 2016-га белфутбол таксама сустрэў з новым календаром ад Крысціны. «Эратычны» – слова, якое моцна гучыць. Я б сказала, што каляндар яркі, магчыма, з нейкай разыначкай. Прыгажосць футбола можна прыраўнаваць да прыгажосці жаночага цела. Але гэта не значыць, што варта рабіць агаленне. Агаленне – гэта анатомія. А ўсё павінна быць прыгожа, эстэтычна і смачна. У гэтым сэнс нашага праекта», – каментавала выхад календара Козел.
У апошні раз Крысціна цешыла прыхільнікаў перад 2017 годам. На гэты раз фатаграфіі з журналісткай атрымаліся не такімі адкрытымі.
Часам календары вядучай станавіліся прадметам народнай творчасці. Для гэтага дастаткова было базавых навыкаў Photoshop.
Як Крысцiна Козел шукала «Бога фоташопа»
Казала, што футбалiсты не цiкавяць як мужчыны, а потым пайшла за гульца БАТЭ, маладзейшага на 11 гадоў
Пра асабiстае жыццё Козел напачатку было вядома мала. У 2013-м годзе яна ў iнтэрв’ю goals.by распавяла, што «даўным-даўно несвабодная, i несвабода ніяк не звязана з футболам». У 2014-м журналiстка таксама сказала, что калі б муж быў супраць, яна не стала б ствараць календара, i адзначыла яго ўнёсак: «Падчас здымак ён заўсёды быў побач, не кантраляваў, але дапамагаў. Цяпер павесіў каляндар над сваёй падушкай».
Аднак у сярэдзіне 2015 года здарылася нечаканае. Пра развод журналiсткi чуваць не было, аднак пачалі казаць пра раман Козел і паўабаронцы БАТЭ Яўгена Яблонскага, маладзейшага за яе на 11 гадоў. Гэта асаблiва здзiўляла з-за таго, што ў згаданым iнтэрв’ю з 2013-га Козел казала, што яе «наогул не цікавяць футбалісты як мужчыны», а тым больш не патрэбны ёй гулец у якасцi сужэнца. Аднак аказалася, што Крысціна радыкальна памяняла свае погляды.
Пару сталi заўважаць на футболе...
...і ў іншых кропках Мінска.
У пачатку лета 2017 года Козел і Яблонскі распісаліся. Пра цэрэмонiю было невядома – шлюб засведчыў чарговы выпуск «Козел пра футбол» з матча мінскага «Дынама» супраць «Іслачы» 16 чэрвеня. У кадры засвяцiўся пярсцёнак, якi з’явiўся на безыменным пальцы дзяўчыны.
Прызналася, што «мацярынскі інстынкт спіць» – праз год нарадзіла
У першых чыслах 2017 года Крысціна ў адным з інтэрв’ю распавяла, чаму яшчэ не нарадзіла.
«Я не адчуваю гатоўнасці ўзяць і страціць сваю цяперашнюю свабоду. Магчыма, гэта ўсяго толькі ілюзорная штука. Але яна мне падабаецца. Мой мацярынскі інстынкт спіць. Таму ва мне пакуль не ўзнікае ўнутранага канфлікту. І я магу шчыра сказаць, што за 33 гады яшчэ ні разу не здарылася, каб гэты інстынкт прачнуўся», – прызналася Козел.
У другой палове таго ж года журналістка нечакана пачала хадзіць у свабодных сукенках.
А потым і зусім перастала з’яўляцца на футболе, пры гэтым перадача працягвала выходзіць – вядучая начытвала тэкст дома, пакуль аператары здымалі матч без яе ў кадры. Справа аказалася ў тым, што Крысціна зацяжарыла ад Яблонскага. У пачатку 2018 года Козел нарадзіла дачку Веру, а ўсяго праз месяц вярнулася на працу. Адздымаўшы ўвесь 2018-ы и частку 2019-га, журналістка ўсё ж такi пайшла ў дэкрэт.
Вярталася ў iнтэрнэт
Аднак без камеры Крысціна не вытрымала. У чэрвені 2019 года яна запусціла яшчэ адзін аўтарскі інтэрнэт-праект пад назвай «Футболка». У ім Козел інтэрв’юiравала вядомых прадстаўнікоў беларускага футбола. Усяго на YouTube выйшла дзевяць размоў – героямi сталi Ігар Шытаў, Ян Цігараў, Ягор Філіпенка, Іван Маеўскі, Дзмітрый Камароўскі, Сяргей Гурэнка, Аляксей Бага, Пётр Качура і Сяргей Паліцевіч. Але вялікай папулярнасці праект не атрымаў. Больш за ўсё праглядаў сабрала інтэрв’ю з Цігаравым – 14 тысяч.
У кадры Крысціна запомнілася экстрэмальна кароткай вопраткай, якая часам бянтэжыла суразмоўцаў.
Звольнiлася з БТРК, аднак з палiтыкай сувязi няма (Козел наогул маўчыць пра яе)
У пачатку 2020-га Козел мела намер выйсці з дэкрэту, каб падтрыхтавацца да запуску «Козел пра футбол» у сезоне-2020. Але калі вядучая вярнулася на працу ёй паведамілі, што праекта не будзе – па нашай iнфармацыi, тлумачэння пра прычыны такога рашэння Козел атрымаць не ўдалося. Ёй прапанавалі працу над чымсьцi iншым, але яна не пагадзілася i сышла дабываць дэкрэт. Тэрмiн скончыўся ў пачатку 2021 года – Козел вырашыла не заставацца ў БДТРК і забрала працоўную кніжку.
З палiтыкай знiкненне «Козел пра футбол» дакладна не звязанае – гэта вынiкае ўжо з дат рашэння пра закрыццё праекта. Што тычыцца падзей, якія адбываюцца ў Беларусі з лета, то журналістка ніяк не рэагуе на іх. Да апошняга часу маўчаў і яе муж Яблонскі. Футбаліст не стаў здымацца у відэазаяве супраць гвалту, якое знялі белгульцы (было i чатыры аднаклубнiка з БАТЭ) увосень. Але ж днямi пазiцыя Яблонскага стала вiдавочнай – яго подпiс з’явіўся пад прарэжымным лiстом сярод яшчэ дзясяткаў ад калег.
***
Сёння, у нядзелю, сайты TUT.BY, «Анлайнер» і «Трыбуна» адмыслова выдаюць тэксты па-беларуску, каб нагадаць і сабе, і сваім чытачам пра тое, якое вялізнае значэнне мае беларуская мова для нацыянальнай культуры і для фарміравання беларускай нацыі. Вось iншыя гісторыі, пра якія «Трыбуна» распавядае сёння па-беларуску:
Анлайн галоўнага матча тура: «Шахцёр» – «Рух»
Сацыяльныя сеткі «Трыбуны» сёння таксама будуць весціся па-беларуску – далучайцеся да нас у Telegram, Instagram, УКантакце, Facebook, Twitter.
Вось якія беларускамоўныя гісторыі можна пачытаць на TUT.BY:
«Быў Іосіф — стаў Осіпам». З-за памылкі сям’я амаль 80 год не ведала аб лёсе свайго бацькі і мужа
«Страшна, калі на цябе ідзе такі натоўп». Сілавікі і пратэстоўцы ўзгадваюць «гарачую вясну» 1996-га
А вось якія тэксты падрыхтаваў «Анлайнер»:
Што адбываецца з канцэртамі ў Беларусі і ці вярнуліся «чорныя спісы»?
Бестселер, якім зачытваецца ўся Еўропа, і раман пра мядзведзя-пярэваратня. Кніжны агляд Onliner
Іншыя пасты карыстальніка
