«Энергетык» моцна абламаўся з «Арсеналам» і пакінуў «Дынама» Кавальчука на першым месцы. Лепшы снайпер ЧБ адмаўчаўся ў трэцім матчы запар

Усё вырашыў герой алкатэстарнай гісторыі.

Галоўная інтрыга нядзелі вырашылася: мінскае «Дынама» засталося на чале табліцы чэмпіянату Беларусі, хаця «Энергетык-БДУ» меў усе шансы пасунуць любімы праект так званага міністра спорту Сяргея Кавальчука з першага месца.

У суботу дынамаўцы не далі рады «Віцебску», які змагаецца за выжыванне, і супернік «студэнтаў» быў яшчэ больш сціплы, калі судзіць па набраных ачках, – навічок Д1 дзяржынскага «Арсенал», які ідзе яшчэ ніжэй за «Віцебск». Але ж здарылася сенсацыя.

«Энергетык-БДУ» прайграў і застаўся на трэцім месцы з 45 ачкамі. У «Дынама» – 47 ачкоў, у «Шахцёра» – 46. Шалі на карысць «Арсенала» схіліў дынамаўскі выхаванец Глеб Расадкін. 27-гадовы паўабаронца, спісаны вялікімі клубамі праз праблемы з рэжымам (не так даўно яго выперлі з «Віцебску» пасля алкатэстарнай гісторыі), да таго ж падпісант за Лукашэнку, забіў у вароты «студэнтаў» шыкоўны мяч – адваяваў на сваёй палове поля, працягнуў, ударыў.

Мінімальная перамога дазволіла Дзяржынску адарвацца ад «Дняпра» на пяць ачкоў. З важнага – лепшы бамбардзір «Энергетыка» і ўсяго чэмпіянату Бабур Абдзіхолікаў прамаўчаў трэці матч запар і быў зменены на 75-й хвіліне – неўзабаве пасля таго, як адзначыўся Расадкін. Раней Абдзіхолікаў не забіваў максімум на працягу аднаго матчу.

«Энергетык» не змог перамагчы другі матч запар, прычым да «Арсенала» не адужаў «Мінск», які знаходзіцца ў крутым піке. «Студэнты» губляюць ачкі там, дзе, меркавалася, здолеюць іх набраць. А на самым фінішы чэмпіяната ім гуляць з БАТЭ і «Дынама» Кавальчука, але ж да гэтага будуць і «Белшына», і «Днепр». На што здольныя мінчане? Ці здолее куратар праекту Анатоль Юрэвіч абудзіць у іх імпэт?

Ад «Энергетыка» па-ранейшаму залежыць многае ў гэтым чэмпіянаце, у тым ліку ці будзе Барысаў з медалямі або неяк абыдзецца без іх.

Фота: vk.com/arsenaldzerzhinsk