Букмекер употайкі прыбраў з экспертаў Хацкевіча, Калюжнага і Кутузава без аніякіх тлумачэнняў. Стасевічу і тут дасталася

Такі вось рэбрэндынг.

10 кастрычніка букмекер Betera, які працуе ў Беларусі, аб’вясціў пра запуск «яркага праекта пра футбол» з назвай Football Space і двума вядомымі інсайдэрамі белфутбола – піяршчыкам кампаніі Мікалаем Івановым і каментатарам Уладзіславам Татурам. У апісанні таксама была прыпіска-анонс: «Betera плануе выпуск і ўласнай хакейнай праграмы – Hockey Space».

Але вось што цікава: першы выпуск Hockey Space быў выкладзены на YouTube-канале Betera яшчэ ў жніўні. Толькі цяпер яго не знайсці – як і шэраг іншых відэа, раней апублікаваных кампаніяй. І ў тым, што гэта за ролікі, можна адсачыць цікавую карэляцыю: іх героі аказаліся чымсьці непажаданыя для босаў белспорту.

Betera – брэнд ТАА «СТАТУСКВО», якое існуе з 1995 года. Шмат гадоў букмекерская кампанія існавала пад той жа назвай, пакуль у 2013-м яе не афіляваў буйны ўкраінскі букмекер Parimatch сямейнай пары бізнесменаў Эдуарда Швіндлермана і Таццяны Беларускай.

Калі ў 2020-м у Беларусі здарыліся фальсіфікацыя прэзідэнцкіх выбараў, беларускае падраздзяленне кампаніі працягнула працу ў звычайным рэжыме. Зрэшты, у сферы так дзейнічалі агулам (пры гэтым сілавікі Лукашэнкі не так даўно выклалі відэа пра затрыманне мужчыны, які назваў сябе вядучым інжынерам па абароне інфармацыі кампаніі Parimatch – яго прымусілі зубачысткай перарабіць бела-чырвона-белы сцяг на карціне ў белы – на знак капітуляцыі).

Змяніла пазіцыю татальнага нейтралітэту толькі вайна ва Украіне, якая з 24 лютага працягваецца Расіяй з выкарыстаннем тэрыторыі Беларусі, – хоць Швіндлерман і называў сыход з расійскага і беларускага рынкаў «самагубствам», але ў чэрвені Parimatch прадаў ТАА ў Беларусі тром мясцовым акцыянерамі. Новыя, прынамсi дэ-юрэ, уладальнікі адразу перавялі «СТАТУСКВО» пад новы брэнд Betera. Сацсеткі змянілі назвы і знішчылі ранейшы кантэнт, YouTube-канал проста стаў па-новаму называцца – відэа там даступныя з пачатку 2021 года. З сайтам цiкавей – з брэндавага адрасу адбываецца рэдырэкт на стары дамен, дзе таксама засталіся матэрыялы, навіны і прагнозы.

З апошнімі і звязаны прыкметныя змены апошняга часу. Проста зараз на старонцы, прысвечанай тым, хто дае для Betera прагнозы, засталося толькі два імя, акрамя ананімнай дзяўчыны, – экс-футбаліста зборнай Беларусі Сяргея Гурэнкі і байца ММА Андрэя Арлоўскага. І абодва падобныя тым, што ніяк не выказваліся ні пра вайну ва Украіне, ні пра паслявыбарчую сітуацыю ў Беларусі (прычым Арлоўскі адмовіўся ад гэтага загадзя).

Але ў канцы 2021-га ў «новы сезон» тады яшчэ Parimatch Беларусь уваходзіў з удвая большай камандай прагназістаў. Сваімі экспертамі кампанія называла таксама былых футбалістаў зборнай Беларусі Аляксандра Хацкевіча і Віталя Кутузава і экс-капітана хакейнай нацкаманды Аляксея Калюжнага.

А ў сакавіку 2022-га амбасадарам кампаніі быў аб’яўлены беларускі футбаліст Ігар Стасевіч.

Перавагай нейтральнасці Parimatch некаторы час была незалежнасць ад таго, як да вядомых і папулярных ў аўдыторыі атлетаў ставяцца чыноўнікі. Але зараз карціна выглядае інакш.

Стасевіч знаходзіцца ў чорным спісе міністэрства спорту – Сяргей Кавальчук не прымае таго, што ў жніўні 2020-га гулец падтрымаў арыштаванага аднаклубніка Антона Сароку, а ў лістападзе выставіў на аўкцыён футболку са сваім аўтографам, каб падтрымаць рэпрэсаваных. Цяпер Betera ні словам не згадвае супрацоўніцтва са Стасевічам (і ў гэтым, і ў іншых выпадках захаваліся толькі спонсарскія матэрыялы на пабочных сайтах), а відэа яго прадстаўлення на YouTube недаступнае.

Тройчы лепшы футбаліст Беларусі ледзьве не вярнуўся ў ЧБ: для гэтага запісаў «пакаяннае» відэа для так званага міністра спорту, але ў выніку не ў поўнай меры яго задаволіў

Хацкевіч у відавочнай няласцы беларускіх уладаў у прынцыпе – бо пасля пачатку вайны ва Украіне выразна асудзіў суагрэсію рэжыму Лукашэнкі. Цяперашнi трэнер кіпрскай «Карміятысы» знік з букмекерскіх зводак, як толькі Parimatch сышоў з рынка – у канцы чэрвеня яшчэ ўваходзіў у камісію па штотуравай намінацыі Fair Play у чэмпіянаце Беларусі, а ў наступных турах ужо не згадваўся ў складзе. Відэа з удзелам Хацкевіча таксама прыбраныя з YouTube, выдаленыя і публікацыі на сайце.

Кутузаў толькі ўвайшоў у «чорны спіс» «Прэсбола» (відавочна, з АБФФ) за крытыку метадаў кіравання ў белфутболе. Жывучы ў Італіі, ён адмаўляўся падпісацца за сумленныя выбары і выказацца пра вайну ва Украіне, пры гэтым без праблем размаўляе з белдзяржТБ. Відэа з экс-футбалістам засталіся на месцы.

Калюжны з лета 2020-га публічна выказваўся выключна пра спорт. Аднак яшчэ год таму «Трыбуне» стала вядома, што прагнозы Аляксея, нягледзячы на ​​супрацоўніцтва з Parimatch, ФХБ ігнаруе прынцыпова па ініцыятыве дыскваліфікаванага ІІХФ на пяць гадоў за палітычны ціск экс-кіраўніка федэрацыі Дзмітрыя Баскава.

Як бы там ні было, цяпер Betera зачысціла і Калюжнага – і з сайта, і з YouTube. Хаця яшчэ ў жніўні 2022-га экс-хакеіст не толькі ўваходзіў у лік экспертаў, але і быў удзельнікам ужо згаданага першага выпуску Hockey Space. А ў сваім Telegram Betera, выдаліўшы сам ролік, забылася прыбраць допіс з вынікамi праведзенага конкурсу.

– У Беларусі людзі знікаюць, ва Украіне – кожны дзень гінуць. Вось гэта страшна. А калі я знік як эксперт, не трэба на гэтым завострываць увагу. Звярніцеся па каментар у Betera, – пракаментаваў сітуацыю Хацкевіч.

– Мне здаецца, лепей удакладніць у прадстаўніка кампаніі. Я не маю інфармацыі, – адрэагаваў на наш зварот Кутузаў.

«Трыбуна» накіравала свае пытанні і на электронную пошту кампаніі Betera, але аператыўнага адказу не атрымалі. Як толькі ён з’явіцца, мы вас з ім азнаёмім.