Ад Расіі – плот, тых, хто за вайну, не хочацца зваць беларусамі. Фанат мінскага «Дынама» ваюе за Украіну – вось што ён кажа пра мэту змагання і тых, хто застаўся

Віталь Пума быў вядомым у Беларусі фанатам – заўзеў за мінскае «Дынама», нейкі час быў лідарам фан-руху. Як прадстаўнік супольнасці, якая раздражняла сілавікоў Лукашэнкі, у лістападзе 2016 года атрымаў турэмны тэрмін – больш за два гады ў калоніі агульнага рэжыму (а яшчэ атрымаў падтрымку ад фанатаў па ўсім свеце).

Пасля вызвалення Віталь пакінуў Беларусь і пераехаў ва Украіну, дзе і жыў падчас пратэстаў 2020 года. Там жа яго заспеў напад Расіі ў лютым 2022-га. Пума пайшоў добраахвотнікам ва Узброеныя сілы Украіны і зараз з’яўляецца байцом батальёна «Тэрор», у якім ваюе багата беларусаў.

Нядаўна Віталь Пума даў інтэрв’ю YouTube-каналу «Гэта Мінск, дзетка», у якім падзяліўся думкамі пра вайну, стасункі з Расіяй, беларусаў, якія не хочуць думаць пра падзеі ва Украіне, і жаданне, з якім ён пайшоў у войска.

«Жаданне вызваліць Беларусь праз вызваленне Украіны»

«Батальён «Тэрор» – гэта абсалютна розныя людзі з рознымі палітычнымі поглядамі. Супольнасць беларусаў, якіх звязвае сяброўства, бо нават тыя людзі, хто не ведаў адзін аднаго да вайны, зараз прыцерліся і выразна разумеюць, для чаго і навошта яны там <…>

Усіх рабят у батальёне «Тэрор» аб’ядноўвае жаданне вызваліць Беларусь праз вызваленне Украіны <…>

Гэта апошняя магчымасць да супраціву таму рэжыму, якому я і супраціўляўся ўсё жыццё. Гэта апошняя магчымасць быць у складзе групы людзей, хто з тымі ж намерамі імкнецца дасягнуць агульнай мэты <…>

Права выйсці на баявую задачу маюць толькі тыя, хто не парушае дысцыпліну. Гэта шмат што кажа пра нашу матывацыю і наш вайсковы ўклад».

«У людзей няма нічога – ні прывязкі да сваёй нацыі, ні гонару»

«Рашка, гэты Савецкі саюз, куды яна ўцягнула Беларусь, са сваім гэтым ідэалагічным падмуркам на тле 9 мая… У людзей няма нічога – ні прывязкі да сваёй нацыі, ні гонару. Яна [Расія] апускала наш народ, не ведаю, з якіх гадоў, яшчэ ніжэй і ніжэй. Мы цалкам забыліся на сваю крэўнасць, і гэта зараз актыўна працягваецца. Глядзець на гэта і не разумець, хто твой вораг і супраць чаго трэба змагацца?..

На шчасце, ёсць такая дзяржава як Украіна, дзе народ больш агрэсіўна змагаецца за свае правы, за сваю мову, за свае культурныя каштоўнасці і агульначалавечае разуменне свабоды».

«Не хачу называць гэтых людзей беларусамі, хто хоць неяк падтрымлівае маразматычную вайну»

«У лютым звар’яцелы прыдурак вырашыў рукамі тысяч і соцень тысяч такіх жа замбаваных дэгенератаў, прычым уцягнуў у гэта прыдуркаватых дэгенератаў з Беларусі – яны вырашылі прайсціся пераможным маршам <…>

Не хачу называць гэтых людзей беларусамі, хто хоць неяк падтрымлівае маразматычную вайну або неяк спрабуе сябе агарадзіць ад гэтай вайны, кажа, што гэта не мая вайна, мы не хочам на гэта глядзець, нам надакучыла ці яшчэ нешта… Гэта ўсё прыйдзе да вас, назад, вельмі хутка і вельмі весела для вас усіх.

[Тыя, хто ўдзельнічае ў агрэсіі супраць Украіны] Баязліўцы, лайдакі, рабы – іншых словаў для іх проста няма <…>»

«Трэба, каб яны прачулі самі ўсе тыя муры, якія для кагосьці будавалі»

«У момант падзення [рэжыму Лукашэнкі], мне здаецца, у Беларусі людзі зноў выйдуць на вуліцу, і ўсе, хто паспее за Урал пераехаць, так званыя «доблесныя ваяры», тыя паспеюць. А хто не паспее – тых будуць судзіць. Трэба, каб яны прачулі самі ўсе тыя муры, якія для кагосьці будавалі. Большая іх частка – гэта звычайныя захопнікі, акупанты, прарасійскія нелюдзі – не больш за тое».

«Не думаю, што ў акупанцкай улады Беларусі хопіць яек, каб пасля падзення Пуціна даць нейкі адпор беларускаму народу. Зразумела, што гэта ўсё трымаецца толькі на Рашцы»

«Скінуцца па пяць долараў і плот шасцімятровы па ўсёй тэрыторыі, дзе ёсць Рашка»

«Самае першае, што варта зрабіць [пасля падзення рэжыму Лукашэнкі], усім беларусам, колькі нас ёсць, скінуцца па пяць долараў, купіць дзесьці ў Польшчы ў добрай будаўнічай кампаніі – і [паставіць] плот шасцімятровы па ўсёй тэрыторыі, дзе ёсць Рашка, двайны, з суперсучасным абсталяваннем – інфрачырвоным, лазерным. І толькі па пропусках [выпускаць адтуль людзей]. Тады можна нешта спакойна рабіць».

«Берагчы сваё здароўе, ведаць ворага»

«[Беларусам, які застаюцца на Радзіме, але не падтрымліваюць рэжым Лукашэнкі, трэба] Удасканальвацца. У тым ліку фізічна, бо фізуха – вельмі важная тэма. Берагчы сваё здароўе, займацца спортам. Вельмі добра ведаць сваю мясцовасць. Ведаць ворага ў сваёй мясцовасці».