Сусветныя СМІ ў шоку ад вайсковага спорту Беларусі – хоць ён даўно такі: ручная язда на лыжах, кіданне бервяна, гіра на зэдліку ў зубах

У канцы 2022-га спорт з Беларусі трапіў у сусветныя СМІ - у прыватнасці, напісаў пра яго вядомы брытанскі таблоід Daily Mail. Праўда, загаловак у матэрыялу аказаўся такім: «Што ж, гэта не можа быць горш за далучэнне да вайны Пуціна ва Украіне!». Усё таму, што сусветныя СМІ зацікавіліся фота практыкі рукапашнага бою і іншых актыўнасцяў (больш за ўсё ў Daily Mail былі «шакаваныя», што на здымках «падпальваюць адзін аднаго і б“юць па таварышах падпаленымі кавадламі») на мерапрыемстве ў гонар 60-годдзя 5-й асобнай брыгады спецыяльнага прызначэння ў Мар“інай Горцы - хтосьці змог зрабіць здымкі і адправіць іх турэцкаму агенцтву, якое выклала іх у глабальныя фотабанкі, зрабіўшы прыкметнымі па ўсёй планеце. І, трэба сказаць, кадры атрымаліся сапраўды яркімі - ну і куды ў цяперашняй рэжымнай Беларусі без дзяржфлагаў, вядома.

У шэрагах спецпрызначэнцаў нават знайшоўся чалавек, які папрактыкаваўся ў дзівоснай разнавіднасці гіравага спорту - гіра знаходзілася на зэдліку, які салдат трымаў зубамі.

Зрэшты, такія здымкі могуць здзівіць толькі тых, хто не сочыць за беларускім войскам - там пастаянна практыкуюць своеасаблівыя фізічныя і спартыўныя актыўнасці і выкладваюць іх у інтэрнэт. Вось хто мае пра іх уяўленне – дык гэта ўкраінскія СМІ, якім пасля кожнага фота ці відэа, якіх у 2022-м было шмат, усё смяшней уяўляць, што на іх могуць пайсці вайной такія хлопцы. Як дарэчы ўспаміналі ўкраінцы ў подпісы да кастрычніцкага відэа з размінкай спецпрызначэнцаў (чамусьці ў асяроддзі фаераў), «каб уступіць у рукапашны бой, трэба ######## [страціць] аўтамат, пісталет, нож, лапатку, знайсці роўную пляцоўку і такога ж ########## [безадказнага]».

Мы ж пакапаліся ў архівах - і яшчэ раз пераканаліся, што вайсковы спорт асаблівы з даўніх часоў.

Паехалі!

Беларускія курсанты кудысьці цягнуць "Запарожац" на святкаванні Дня горада ў Мінску ў 2003-м. Незвычайная дысцыпліна!

Упадабаная форма праявы сваёй «моцы» - разбіць аб галаву блок або дошку, пажадана падпаленыя. Такіх фота можна знайсці шмат - вось вам з 2005-га.

Зрэшты, можна і не трымаць блокі ў руках, а пакласці на зэдлічкі.

Масленічныя гульбішчы з 2006-га - з масавымі ж, назавем гэта так, адзінаборствамі пры гледачах. Такіх фота розных гадоў таксама хапае.

А ў 2006-м яшчэ абліваліся ледзяной вадой (апярэдзілі на некалькі гадоў сусветны чэлендж) і лезлі ўверх па вертыкальным бервяне.

У апісанні да гэтых фота з 2007-га сказана, што гэтак святкавалі Дзень здароўя. Праўда, не заўсёды голая прабежка з ныраннем у палонку спрыяюць умацаванню гэтага самага здароўя.

А гэта сумна знакамітыя Печы і вайсковы лагер для "цяжкіх падлеткаў" з 2007-га. Метады відавочна максімальна жорсткія - прыйшлося вымакнуць і выкачацца ў брудзе напоўніцу.

Яшчэ адна варыяцыя дысцыпліны "бег па таварышах", 2008-ы. Украінцы кажуць, што пад Бахмутам расіяне наступаюць па трупах сваіх жа салдат. Ці няма сувязі з гэтым практыкаваннем?

А пасля гэтага можна і MMA заняцца - UFC адпачывае.

Заход на кікбоксінг - збіць з галавы таварыша сінюю вадкасць.

Вельмі дзіўны зімовы від спорту з 2009-га – унутраныя войскі ў Мінску паказваюць новы спосаб выкарыстання лыжаў (зрэшты, пад назвай «суровы беларускі спецназ» па інтэрнэце ходзіць увогуле фота забегу на лыжах па асфальце).

Самы арыгінальны забег? Ёсць канкурэнт на чатырох кропках апоры з дзіўна выгнутымі нагамі ды яшчэ і сцяжком у зубах. Чалавека на заднім плане відавочна да такога жыццё не рыхтавала.

Яшчэ крыху пра чатыры пункты апоры - пагранічнікі ў Смаргоні становяцца бар'ерам для сабачага спорту, 2009 год (дарэчы, сабакам таксама ў арміі часам зусім несалодка).

Перацягванне каната - адзін са звыклых для войска відаў спорту. Вось пара кадраў з 2010-х - не змаглі выбраць, на якім выразы твараў больш эмацыйныя.

Кіданне дзіды - лёгкая атлетыка. У войску цяжэй - шпурлянне бервяна! Фота зроблена 23 лютага 2013-га пад Мінскам.

Ну і, вядома, кувалды ў беларускім войску выкарыстоўваюць таксама даўно (дзякуй, што не як «вагнераўцы»). Эмоцыі ў таго, хто б'е, зашкальваюць, справа адбываецца ў 2008-м.

Сеанс паралельнага ўздыму гір з 2021-га - у 103-й асобнай паветрана-дэсантнай брыгадзе святкавалі 91-годдзе савецкіх ПДВ. Паднімалі 91 раз. Адгадаеце, колькі было гір? 103, вядома - але галоўнае, што ўсё з чырвона-зялёным афармленнем.

Пераходзім да 2022-га. Вось танк каманды Беларусі страляе ў індывідуальнай гонцы танкавага біятлону - як пісалі ў Мінабароны, ні разу не прамахнуліся. Але палігон у Расіі - гэта не гарантыя поспеху ў рэальных дзеяннях (некаторыя бураты-чэмпіёны могуць пацвердзіць).

У чэрвені ў Жыткавічах прадстаўнікі "сіл спецыяльных аперацый" (ССА адзначыліся ў забойстве пратэстоўцаў у 2020-м) паказвалі "баёўку" прама на мясцовым футбольным полі.

"Спартыўнае свята" ўнутраных войскаў у Мінску - гэта бег і проста так, і з "чамаданчыкам" (але там былі і перацягванне каната, і гіры, і іншая "класіка").

У кастрычніку пад «Барысаў-Арэнай» святкавалі 80-годдзе ўтварэння Паўночна-заходняга аператыўнага камандавання – з нейкімі элементамі чырлідынгу (заўзеюць гэтыя хлопцы, вядома, за рэжым).

Яшчэ тамака пераасэнсавалі фехтаванне - узялі тонкія брусы і проста разбівалі іх аб суперніка. Ды і без прабіцця блокаў (зараз з надпісам "За спецназ") не абышлося - але выкананне відавочна было не ідэальным.

ВИДЕО

Цуды нэймінгу назіраліся ў Гродне – у лістападзе там прайшоў «фестываль зімовага купання і загартоўвання «Закалфест», і прабелы ў назве здольныя падарыць яму дадатковы сэнс. Каля 80 амаль голых удзельнікаў бегалі і акуналіся ў ледзяны Нёман, ну а пра дэсантнікаў нагадаў удзельнік з адпаведным сцягам - яго напарнік нёс дзяржсцяг, як без гэтага.

А ўсё тая ж 5-я асобная брыгада спецпрызначэння, з якой мы пачыналі матэрыял, незадоўга да эпіка ў Мар'інай Горцы выступіла ў мінскім ГЦ - асноўнымі элементамі стала пераскокванне праз таварыша, які стаіць у нязручнай позе (такая сабе спартыўная гімнастыка), і нейкі бой з чалавекам-невідзімкай з пафасным ударам паміж уласных ног на самым фінішы.

ВИДЕО