Кар'еру Бояна Кркіча зламалі панічныя атакі – ён скончыў у 32, так і не стаўшы новым Месі
Цяпер займаецца здаровым харчаваннем і роварамі.
Gràcies
Gracias
Grazie
Bedankt
Thank you
Danke schön
Eskerrik asko
Merci
ありがとうございます
Такі пост Боян Кркіч зрабіў у Instagram 23 сакавіка. 32-гадовы футбаліст афіцыйна абвясціў пра завяршэнне кар'еры і падзякаваў сваім былым клубам і заўзятарам на розных мовах свету. А фізічна іспанец развітаўся з футболам там, дзе ўсё пачыналася – на «Камп Ноу». «Барселона» зладзіла для свайго гадаванца адмысловае мерапрыемства.
«Такія рашэнні нялёгкія. Я быў удалечыні ад дома 12 гадоў, і я адчуваю сябе прафесійна рэалізаванам. Хачу атрымаць асалоду блізкасцю да сваёй сям'і. Справа не ў фізічным стане.
У мяне было тры траўмы, але я аднавіўся, гатовы на 100%. Але такая рэчаіснасць. Цяпер я больш рады займацца чымсьці іншым, чым працягваць гуляць у футбол. Удзячны за ўсё, што перажыў. Гуляў за «Барселону», быў на полі з выдатнымі гульцамі, выйграваў трафеі і гуляў у іншых лігах. Але я гатовы пачаць нешта новае зараз», — сказаў Кркіч.
Потым Боян выйшаў на поле «Камп Ноу», дзе сфатаграфаваўся побач з трафеямі, якія ўзяў з «Барселонай». На фотаздымках футбаліст выглядае шчаслівым і ўсміхаецца сваёй прамяністай усмешкай. Гледзячы на гэтыя фатаграфіі, цяжка паверыць, што кар'еру Кркіча зламалі панічныя атакі.
Дэбютаваў за «Барселону» у 17 і пабіў рэкорд Месі
Вядомасць прыйшла да Бояна ў 17 гадоў. Ён пабываў са зборнай Іспаніі на чэмпіянаце свету U-17, дзе стаў найлепшым бамбардзірам. Далей усё вельмі хутка закруцілася.
✅ Клуб падпісаў прафесійны кантракт з гульцом на суму 60 мільёнаў еўра.
✅ Трэнер Франк Райкард узяў гульца ў асноўную каманду, дзе Боян трэнаваўся разам з Раналдыньё, Это′О, Дэку і Іньестам.
✅ У дэбютным матчы супраць «Асасуны» (24 красавіка 2007) Кркіч пабіў рэкорд Месі, стаўшы самым маладым гульцом «Барселоны» ў Ла Лізе.
Цікава, што іспанскія СМІ сцвярджалі, што Боян, які мае сербскае паходжанне, з'яўляецца далёкім сваяком Месі. Мабыць, іх прапрадзеды былі братамі. Але гэта не дакладна.
Здавалася, што гэта неверагодны поспех і нараджэнне новай зоркі. Маладога гульца ўжо называлі новым Месі. Але замест эйфарыі Кркіч адчуў стрэс, моцнае галавакружэнне і канвульсіі. Адразу пасля дэбюту ён трапіў у госпіталь, дзе лекары дыягнаставалі моцную панічную атаку.
Цяпер у Беларусі больш увагі надаюць псіхічнаму здароўю праз выклікі пратэстаў, рэпрэсій і вайны. Таму беларусы дакладна ведаюць, што панічныя атакі – гэта не казкі, а рэальная і вельмі сур'ёзная праблема. Боян так і не змог яе вырашыць. Пігулкі, якія давалі лекары, часова дапамаглі, але потым прыступы аднаўляліся.
Кркіч знаходзіўся ў зборнай Іспаніі перад таварыскім матчам з Францыяй. Гэта павінен быў быць яго дэбют у нацыянальнай камандзе. Але на поле ён так і не выйшаў – моцнае галавакружэнне сігналізавала пра прыступ панікі. Журналістам паведамілі, што ў гульца здарыўся прыступ гастраэнтэрыту. Яго сапраўдныя праблемы не былі вядомыя па-за межамі зборнай і клуба.
Луіс Араганес хацеў узяць яго на Еўра-2008, але сам футбаліст адмовіўся.
«Мне балюча гэта казаць, але я не магу пагадзіцца. Я мару выступаць за Іспанію, але цела мяне падводзіць», – патлумачыў сваё рашэнне футбаліст.
Боян сапраўды дэбютаваў у нацыянальнай зборнай – ён адгуляў 25 хвілін супраць Арменіі ў адборы на чэмпіянат свету-2010. І на гэтым ўсё.
«Я не супакоюся, пакуль не зраблю Бояна найлепшым у свеце!»
На пачатку сакавіка Боян падтрымаў 20-гадовага Ансу Фаці, якім перажывае не найлепшыя часы. І ўспомніў, якія выпрабаванні выпалі на яго долю ў 17 гадоў. Дарэчы, менавіта Фаці ў 16 гадоў пабіў рэкорд Кркіча і стаў самым маладым дэбютантам «Барселоны» ў гісторыі. Цяпер гэта дасягненне належыць 15-гадоваму Ламіну Ямалу.
«Ёсць велізарная розніца ў тым, як абыходзяцца з гульцамі на пачатку, калі справы ідуць добра, і потым, калі справы ідуць не вельмі добра праз траўму або па любой іншай прычыне. Да футбалістаў ставяцца як да тавару. Вы ператвараецеся з чалавека ў персанажа.
Калі мне было 17, мне давялося змагацца з ярлыком «новага Месі». Вы вучыцеся ўсведамляць свае межы і прымаць іх. З гэтым цяжка справіцца. Вы здзяйсняеце мару дзяцінства і не разумееце маштабу таго, што адбываецца», – сказаў Кркіч у інтэрв'ю Marca.
Боян стаў гульцом ратацыі ў сваіх першых сезонах у «Барселоне» – забіваў 5-10 галоў, удала замяняў на полі Анры і Вілью, а таксама выдатна пасаваў на ролю Месі 2.0. Заўзятары, прэса і сам клуб жадалі большага.
«Я не супакоюся, пакуль не зраблю Бояна найлепшым у свеце!» – з энтузіязмам казаў Пеп Гвардыёла ў 2011 годзе.
Гэты ціск быў не па плячы Кркічу. «Людзі казалі: «О, гэта новы Месі!» Я нічога не мог з гэтым зрабіць. Я ведаў пра свае якасці і разумеў, што я не Месі. Я Боян».
Здаецца, у гульца развіўся сіндром самазванца, даволі распаўсюджаная з'ява сярод зорак і знакамітасцяў. Напрыклад, спявачка і ўладальніца «Оскара» Білі Айліш прызналася, што адчувае сябе так, нібы не заслужыла свайго поспеху.
У 20 гадоў у Бояна ўжо была цэлая калекцыя трафеяў – дзве Лігі чэмпіёнаў, тры чэмпіянаты Ла Лігі, Суперкубак УЕФА, Кубак і тры Суперкубка Іспаніі, перамога на клубным чэмпіянаце свету. Але замест радасці – згрызоты сумлення, што ўсё гэта не зусім заслужана.
«Пасля пераможнага фіналу Лігі чэмпіёнаў у 2009 годзе я размаўляў з Анры, і ён сказаў: «Я прыехаў сюды, каб упершыню выгуляць Лігу чэмпіёнаў». Я падумаў: «Ого, легенда выгульвае сваю першую Лігу чэмпіёнаў у 30 гадоў». А мне толькі 18».
Праз два гады пасля гэтай размовы Боян сышоў з «Барселоны». Яму так і не ўдалося выканаць ролю пераемніка Месі.
Змяніў 8 каманд, але нідзе не змог стаць топам
Боян правёў за «Барселону» 163 матчы і забіў 41 гол. Усяго за свае 8 каманд футбаліст правёў 264 гульні. Спачатку былі «Рома» і «Мілан». Пасля спроба перазагрузкі ў «Аяксе», дзе Кркіч выгуляў чэмпіянат і Суперкубак Нідэрландаў. Ён вылецеў у Чэмпіёншып са «Сток Сіці», вельмі мала гуляў у «Майнцы» і «Алавесе».
А потым увогуле пачаўся экзатычны футбол – канадскі «Манрэаль» і японскі «Вісэл Кобе». Боян правёў два гады ў Японіі з Іньестам, гуляючы па бамбукавым садзе і знаёмячыся з мясцовай культурай.
«Я хацеў бы падзякаваць усім, хто звязаны з «Вісэл Кобе», за магчымасць прыехаць у Японію і пазнаёміцца з гэтай краінай і лігай. Узаемадзейнічаючы з культурай гэтай краіны, я адчуваў любоў і павагу ўсіх. Дзякуючы гэтаму я змог хутка адаптавацца да навакольнага асяроддзя. Мая павага да Японіі значна вырасла», — напісаў футбаліст на развітанне з клубам.
Свой развітальны матч за зборную Каталоніі Боян правядзе 8 чэрвеня супраць Малі.
«Для мяне гэта будзе асаблівы дзень, калі я развітаюся з футболам у атачэнні майго народу. Я з нецярпеннем чакаю сустрэчы з усімі вамі», - сказаў ужо былы футбаліст.
Боян не сыходзіць з футбола ў нікуды – ён даўно шукаў сябе ў жыцці і развівае некалькі праектаў.
Займаецца здаровым харчаваннем і веласіпедамі, выступае з лекцыямі для маладых футбалістаў
У Кркіча ўжо ёсць ступень магістра спартыўнага менеджменту ў Інстытуце Ёхана Кройфа. Яго часта запрашаюць на розныя канферэнцыі, дзе абмяркоўваюцца інтэлектуальныя і ментальныя бакі футбола. Напрыклад, футбаліст правёў сустрэчу з выхаванцамі «Ла Масіі», дзе шчыра камунікаваў з маладымі хлопцамі.
Нядаўна Баон паказаў кадры са здымак дакументальнага фільма пра сябе. Яго часта называюць экспертам на такіх каналах, як ESPN і DAZN.
«Рабіць нешта іншае і выходзіць за межы зоны камфорту нашмат лягчэй, калі побач добрыя людзі. Для мяне гэта яшчэ адзін фінал, які застанецца ў прыемных успамінах», – падзяліўся ўражаннямі Кркіч.
У 2021 годзе іспанец далучыўся да рэстараннага бізнесу і стаў часткай каманды, якая запусціла сетку ўстаноў здаровага харчавання Nacked&Sated.
«Я вельмі веру ў філасофію здаровага ладу жыцця. Вы можаце есці, не адчуваючы віны. Важна прывіваць правільныя харчовыя звычкі. Цяпер я магу гэта рабіць разам з сябрамі», – анансаваў футбаліст адкрыццё рэстарана ў Більбаа.
Яшчэ адзін праект на стыку хобі і бізнесу – спартыўныя ровары.
«Разам з камандай мы сабраліся, каб стварыць найлепшы брэнд гравійных ровараў у свеце, зроблены ў Барселоне».
Здаецца, у Бояна шчаслівая пенсія і ён здолеў адолець панічныя атакі. А фанаты пішуць яму кранальныя каментары пасля рашэння завяршыць кар'еру.
«Дзякуй за ўсе ўспаміны пра «Барсу», Боба. Дзіўны гол у вароты «Атлетыка» з Більбаа. Выдатны выступ ў сезоне-2010, калі дапамог нам абараніць тытул у Ла Лізе, калі Златан не гуляў. Класны асіст у знакамітым разгроме мадрыдскага «Рэала» 5:0. За тры гады ў «Барсе» вы зрабілі тое, што многім гульцам не ўдавалася за ўсю кар'еру».
Толькі ў 2018-м Кркіч даў шчырае інтэрв'ю The Guardian, дзе распавёў пра страх і панічныя атакі, якія псавалі яму кар'еру і жыццё. І адказаў на галоўнае пытанне – чаму, нягледзячы ні на што, працягваў гуляць.
«Я люблю футбол – гэта маё жыццё».
Фота: інстаграм Баяна Кркіча, Global Look Press
Іншыя пасты карыстальніка
