Каманда з Фарэр згуляе ў групавым раўндзе еўракубкаў – упершыню ў гісторыі! «Клаксвік» прайграў толькі 1 матч за 365 дзён ва ўсіх турнірах

Кваліфікацыя еўракубкаў часам дорыць нечаканыя сюжэты. У гэтым сезоне галоўная каманда-зорка – «Клаксвік» (KÍ, Klaksvíkar Ítróttarfelag – «Спартыўны клуб Клаксвік»).

Чэмпіён Фарэрскіх астравоў адолеў «Ферэнцвараш» і «Хэкен» і выйшаў у трэці кваліфікацыйны раўнд ЛЧ. Гэта азначае, што месца як мінімум у групавым этапе Лігі канферэнцый гарантаванае!

Як гэта было: звольнілі Чарчэсава, тройчы адыграліся з «Хэкенам», серыю пенальці выйграў нядаўні абаронца з 5-га дывізіёна Нарвегіі – абодва супернікі ўжо бачылі сябе ў наступных раўндах

У першым раўндзе «Клаксвік» перамог «Ферэнцвараш» тады яшчэ Станіслава Чарчэсава – пасля 0:0 дома разграмілі венгерцаў 3:0 на іх жа полі:

Вынік гэтага матча быў зусім несуцяшальны для расіяніна – нягледзячы на тое, што ён адразу пасля паражэння сказаў, што не збіраецца ў адстаўку, кіраўніцтва яго імгненна звольніла.

Хоць венгерцы былі ўпэўненыя ў тым, што выйграюць матч у адказ. Калі супернік пары ў 2-м кваліфікацыйным раўндзе вызначыўся – «Хэкен» са Швецыі прайшоў валійскі «Нью Сейнтс», «Ферэнцвараш» у сваіх сацсетках паведаміў пра гэта так:

«У другім раўндзе нас чакае чэмпіён Швецыі. Таму што дакладна, што мы будзем рухацца далей».

З самім «Хэкенам» было цяжэй. Тыя ж 0:0 у Клаксвіку, а вось у Хатэнбургу чэмпіёны Швецыі ўжо далі бой. Уласна, «Хэкен» двойчы за матч выходзіў наперад, аднак «Кі» аднаўляў раўнавагу – апошні абмен галамі адбыўся ўжо ў экстратаймах.

Увагі варты другі гол «Клаксвіка» – зноў крыху фарту (як і з выхадам варатара «Ферэнцвараша») для каманды з Фарэр:

А трэці гол «Кі» супернік наогул забіў сам сабе. Нават крыху шкада – першапачаткова яго запісалі на нападаючага Фрэдэрыксберга, які такім чынам аформіў бы хет-трык:

У серыі пенальці госці былі крыху больш дакладныя – 4:3. Вырашальны сэйв здзейсніў брамнік Юнатан Юхансан.

Цікава, што яшчэ з месяц таму ён гуляў у аматарскім 5-м дывізіёне Нарвегіі цэнтральным абаронцам! А з прафесійным футболам завязаў яшчэ ў 2022-м (прынамсі, так думаў).

Аднак трэнер «Кі» Магнэ Хасэт, які калісьці гуляў з Юхансанам, паклікаў яго да сябе – рэзервовы галкіпер траўмаваўся, і Юнатан пагадзіўся яго «падмяніць» да канца жніўня. Зрэшты, асноўны брамнік «Кі» таксама вылецеў незадоўга да матчу з «Ферэнцварашам» – так што менавіта Юхансану даводзіцца гуляць у ЛЧ. І паспяхова!

«Хэкен» трапіў у тую ж пастку «самазаспакаення», што і «Ферэнцвараш». Пасля першага матча чэмпіёны Швецыі ў сацсетках напісалі наступнае: «Цяпер мы забярэм перамогу дома на наступным тыдні».

Эмоцый на стадыёне ў Клаксвіку пасля фінальнага свістка не стрымлівалі:

Наступны супернік на шляху да групавога этапу ЛЧ – чэмпіён Нарвегіі «Мольдэ».

«Клаксвік» – паўпрафесійная каманда, аднак апошнім часам — гегемон мясцовага футбола. За апошнія 365 дзён прайгралі адзін (!) матч ва ўсіх турнірах

«Клаксвік» – вельмі даўні клуб. Заснаваны быў яшчэ ў 1904-м (!), і па паспяховасці ён другі ў краіне пасля ХБ «Торсхаўн» – 20 чэмпіёнстваў. Гуляе ў мястэчку на поўначы Фарэрскіх астравоў, вядомых перш за ўсё як рыбалоўныя мясціны.

Пасля 16 тураў мясцовага чэмпіянату (гуляюць па сістэме вясна-восень па відавочных прычынах) «Кі» – безумоўны лідар: 16 перамог, 48 пунктаў – адрыў у 12 пунктаў ад другога «Б-36».

Наогул, калі браць усе матчы за апошнія 365 дзён, то «Клаксвік» прайграў адзін (!) раз – «Вікінгуру» ў фінале Кубка-2022 у кастрычніку мінулага года. Астатнія 32 матчы – 4 нічыі (з улікам матчу ў адказ з «Хэкенам»), 28 перамог.

У гульцоў клуба па-за футболам ёсць і асноўная праца. Так, напрыклад, Ёуанес Даніэльсен і Рэнэ Юнсэн па прафесіі электрыкі.

«Мы ўсе выконваем іншую працу, а затым увечары збіраемся на поле, каб патрэнавацца. Нас восем электрыкаў, але ёсць яшчэ сантэхнікі, будаўнікі і клеркі. Наш начальнік у кампаніі таксама з’яўляецца супрацоўнікам клуба. Пасля гэтай перамогі мы маглі б папрасіць у яго падвышэння!» – цытавалі аднаго з футбалістаў у італьянскай Corriere della Serra напярэдадні матчу ў адказ з «Хэкенам».

А так фанаты сустракалі каманду пасля перамогі над «Ферэнцварашам».

Трэнуе каманду Магнэ Хасэт, як ужо згадвалася раней. Нарвежац правёў амаль усю кар’еру гульца на Радзіме, а як галоўны трэнер да «Кі», які ўзначаліў напярэдадні старту сезона-2023, нідзе раней не працаваў! Адзіны досвед да гэтага – асістэнтам галоўнага ў нарвежскім «Крысціянсудзе».

А вось футбольнае мінулае Хасэта і «Кі» – вельмі сімвалічнае для супрацьстаяння менавіта з «Мольдэ». Магнэ – легенда клуба: 332 матча, 103 галы ва ўсіх турнірах, рэкорд па галах у чэмпіянаце. Прыкладна такіж статус мае ягоны асістэнт Даніэль Берг Хестад – 587 матчаў, 89 галоў, рэкорд клуба па матчах у чэмпіянаце. Вегард Фарэн, абаронца «Клаксвіка», таксама мае ў актыве 369 матчаў за будучага суперніка – ён другі па матчах за «Мольдэ» ў лізе пасля Хестада.

Свае хатнія матчы «Клаксвік» праводзіць на стадыёне «Віт Джупумірар», самым паўночным у лізе. Там жа і згулялі свае хатнія 0:0 у першых раундах еўракубкаў. Арэна месціць да 2600 чалавек і выглядае прыкладна так:

Аднак болей матчаў еўракубкаў у гэтым сезоне стадыён не ўбачыць, бо не адпавядае мінімальным патрабаванням для 3-га раунда кваліфікацыі ЛЧ і далей. Так што «Мольдэ» ўжо будуць прымаць на нацыянальным 6,5-тысячніку «Торсвалур».

Фарэры нарэшце будуць прадстаўленыя ў групавым этапе. Засталіся толькі 8 краін, якія яшчэ не гулялі ў восеньскай стадыі еўракубкаў – сярод іх няма Гібралтара

Гістарычнасць дасягнення «Клаксвіка» палягае ў тым, што ніколі раней клубу з Фарэрскіх астравоў не ўдавалася дайсці да групавога этапу еўракубкаў.

Цяпер краін, якія яшчэ ніколі не былі прадстаўлены на групавым этапе еўракубкаў, засталося ўсяго восем. Гэта Паўночная Ірландыя, Боснія і Герцагавіна, Ісландыя, Мальта, Чарнагорыя, Уэльс, Андора і Сан-Марына.

Што цікава, ужо ў гэтым сезоне іх колькасць дакладна паменшыцца да 7. У трэцім кваліфікацыйным раундзе ЛЕ лёсаванне звяло «Зрынскі» з Босніі і Герцагавіны і «Брэйдаблік» з Ісландыі – хтосьці з іх дакладна выйдзе ў плэй-оф і гарантуе сабе як мінімум групу ЛК.

А вось некаторыя іншыя краіны са «дна» табліцы каэфіцыентаў ужо адчулі крыху еўракубкавай восені. Напрыклад, 54-ы па рэйтынгу Гібралтар у сезоне 2021/22 меў прадстаўніка ў групе ЛК – «Лінкольн Рэд Імпс» занялі апошняе месца ў квартэце з ПАОКам, «Капенгагенам» і «Слованам» з Браціславы.

«Вардар» з Паўночнай Македоніі (50-я) гуляў у групавым этапе ЛЕ яшчэ ў сезоне 2017/18 – таксама апошняе месца з «Рэал Сасьедадам», «Русенборгам» і «Зенітам».

У тым жа сезоне адзін з двух разоў Албанію (48-я) прадстаўляў «Шкендэрбещ» – тады клуб нават здолеў адолець кіеўскае «Дынама».

Фота: StadiumDB.com stadium database, TT News Agency