Трызненне прапагандыстаў, агляд старых турніраў, меладрамы і шмат гімнастыкі. Што беларусам пакажуць замест Алімпіяды

Тыдзень застаецца да старту летніх Алімпійскіх гульняў, якія сёлета пройдуць Парыжы. Першыя спаборніцтвы – па рэгбі і футболе – адбудуцца ўжо 24 ліпеня, а афіцыйная цырымонія адкрыцця мае прайсці 26-га. Беларусь на гульнях прадставяць толькі 16 спартсменаў, якія выступяць у 9 відах спорту. Яны прайшлі праверку з боку Міжнароднага алімпійскага камітэту на нейтральнасць (хаця па некаторых ёсць пытанні), а лукашэнкаўскі камітэт па алімпійскіх пытаннях пагадзіўся накіраваць іх ува Францыю.

Адмаўляючыся ехаць у Токіа, Азаранка казала, што хоча выступіць у Парыжы. Але і туды не едзе, хоць і мае допуск

Яшчэ ўвесну Сабаленка хацела на Алімпіяду, а тут нібыта сама адмовілася, каб крыху адпачыць

Але нават за выступамі гэтых нешматлікіх атлетаў-беларусаў суайчыннікам сачыць будзе няпроста – у сетцы вяшчання рэжымных каналаў «Беларусь 1» і «Беларусь 5», якія транслявалі Алімпіяду ў мінулыя гады, няма ні намёку на спаборніцтвы ў Парыжы. Апошні раз такое адбывалася ў 1984 годзе, калі Савецкі Саюз байкатаваў летнюю Алімпіяду ў Лос-Анджэлесе.

Алімпійская праграма распачнецца 24 ліпеня ў 16.00 футбольнымі матчамі Узбекістан – Іспанія і Аргенціна – Марока. У гэты час «Беларусь 1» прапануе гледачам серыял «След». А спартыўны «Беларусь 5» паказваць праграмы «Як гэта было» (праект, у якім робяць рэтрагляды выступленняў беларусаў у розныя годы) і «Спорт-цэнтр».

Цырымонія адкрыцця распачнецца на наступным тыдні (26 ліпеня) у пятніцу ў 20.30 па мінскім часе. Упершыню ў гісторыі мерапрыемства пройдзе не на стадыёне, а на фоне знакавых славутасцяў Парыжа, што месцяцца ўздоўж ракі Сены.

Замест гэтага беларусы змогуць ухапіць кавалак меладрамы «Разам назаўжды», працягнуць праглядам лукашэнкаўскіх навін у «Панараме» і зачапіць шоў адыёзных прапагандыстаў «Клуб рэдактараў» – вось такая прапанова ад «Беларусь 1».

Альтэрнатывай можа стаць прагляд спаборніцтваў па змяшаных адзінаборствах і праграмы «Спорт-цэнтр» на «Беларусь 5».

Дэбютныя камплекты медалёў разыграюць ужо ў суботу, 27 ліпеня. Першымі мы даведаемся ўладальнікаў золата ў стральбе з пнеўматычнай вінтоўкі з 10 метраў у міксце і пераможцаў спаборніцтваў па скачках у ваду (сінхронны трамплін, 3 м). Фіналы запланаваныя на 12.00, у гэты час «Беларусь 1» пачне трансляцыю дзённых навін, якую працягне фільм «Аперацыя Баграціён» і меладрама «Спатканне ўсляпую».

На «Беларусь 5» гледачам пакажуць спаборніцтвы па мастацкай гімнастыцы.

У 15.30 у шашэйных гонках стартуе індывідуальная «раздзелка» ў жанчын, следам за якой рушыць мужчынская. Замест гэтага «Беларусь 1» «парадуе» гледачоў выпускам шоў «100 пытанняў да дарослага» і «новым праектам уласнай вытворчасці «Адзін дзень», а «Беларусь 5» ізноў пакажа мастацкую гімнастыку.

З 18.00 барацьба за золата пачнецца ў скейтбардыстаў, а з 18.18 – у дзюдаістак у вазе да 48 кілаграмаў. У вячэрняй праграме на дзяржТБ месца занялі меладрама «Цудоўныя стварэнні» па «Беларусь 1» і матч пляжнай Еўралігі паміж Малдовай і Турцыяй па «Беларусь 5».

Суботнім вечарам медалі таксама разыграюць дзюдаісты ў вазе да 60 кілаграмаў, плыўцы вольным стылем (як мужчыны, так і жанчыны) на дыстанцыі 400 метраў і ў эстафеце 4х100, а яшчэ рэгбісты. Адбудуцца фіналы ў асабістай шпазе ў жанчын і асабістай шаблі ў мужчын.

Але замест гэтага беларусы змогуць паглядзець на «Беларусь 1» «Панараму», праграму «Добры вечар» і камедыю «Крывое люстэрка», а «Беларусь 5» зноў захопіць мастацкая гімнастыка і бразільскі футбол.