Дом Мілеўскага другі раз за год абшукалі – справа ў каламутным сябру, якога ўжо вінавацілі ў арганізацыі дагаварнякоў
«Ратавалі ад алкаголю, а трэба было ад атачэння».
Год таму Арцём Мілеўскі быў у цяжкім стане. У інтэрнэце рэгулярна з’яўляліся відэа і фота, на якіх экс-форвард брэсцкага «Дынама» быў нецвярозым, апухлым і проста не выглядаў здаровым чалавекам. Сябры і былыя партнёры сталі хвалявацца за стан Мілеўскага і ў выніку ўгаварылі яго легчы ў лякарню. Той пробыў там амаль тыдзень у коме, а пасля выпіскі прыняў рашэнне завязаць з алкаголем – і, здаецца, трымаецца да гэтага часу.
Яшчэ да лякарні Мілеўскага сталі заўважаць у кампаніі Сяргея Траццяка. Ва ўкраінскай прэсе яго называюць каперам – чалавекам, які займаецца прагнозамі на спорт. Ад гэтага таварыша быў не ў захапленні стары сябар Мілеўскага і яго экс-партнёр па кіеўскім «Дынама» Аляксандр Аліеў.
Сёння былыя футбалісты не камунікуюць, але Траццяк з Аліевым часам абменьваюцца публічнымі ўколамі. Напрыклад, у траўні Аліеў абурыўся, чаму Траццяк да гэтага часу не ў войску, бо ў краіне ідзе вайна. На гэта новы сябар Мілі адказаў, што ён дапамагае ўзброеным сілам фінансава, а яшчэ выказаў скепсіс наконт службы Аліева – з пачатку поўнамаштабнай вайны той уваходзіць у тэрытарыяльную абарону Абалоні. Мілеўскі ж выступае ва ўкраінскай медыялізе за IGNIS і разам з Траццяком вядзе стрымы на платформе Тwitch, дзе яны, у асноўным, гуляюць у анлайн-казіно або робяць стаўкі на спорт, што, здаецца, для іх сёння з’яўляецца асноўным спосабам заробку.
Траццяк сябе называе акцыянерам букмекерскай канторы ў Іспаніі. Пры гэтым ён сам рэгулярна йграе на стаўках. Напрыклад, падчас Еўра-2024 паставіў на зборную Украіны ў матчы з Румыніяй. Падапечныя Сяргея Рэброва тады буйна саступілі, а Траццяк расказаў, што прайграў 10 тысяч долараў, дадаўшы: «Гэта не самая вялікая мая стаўка ў жыцці, праўда, і не самая маленькая. Я гуляю на дыстанцыі, сваё на чэмпіянаце Еўропы зараблю». А зусім нядаўна Мілеўскі ў сацыяльных сетках хваліўся выйгрышам – яны з Траццяком паставілі сем тысяч долараў на внік першага тайма матча Д2 Бразіліі «Спартакс» – «Эшпарце». Першы тайм завяршыўся з лікам 0:1, дзякуючы чаму сябры атрымалі 16 485 долараў чыстага прыбытку.
Са стаўкамі Траццяк звязаны не толькі як акцыянер і гулец. Яго імя ўжо неаднаразова гучала ў кантэксце арганізацыі дамоўных матчаў. У 2018 годзе на YouTube-канале «Прафутбол» з'явіўся сюжэт, дзе яго абвінавачвалі ў тым, што ён прапаноўваў адной з моладзевых камандаў львоўскіх «Карпат» за восем тысяч долараў прайграць аднагодкам з кіеўскага «Дынама» з розніцай у два мячы, а ў выпадку адмовы пагражаў. Маўляў, «брыгада суддзяў можа дзве чырвоныя раптам даць», «заўтра суддзі вас заб’юць». У выніку футбалісты на здзелку не пайшлі, а суддзі сапраўды паказалі ў матчы дзве чырвоныя гульцам «Карпат». Пасля матчу футбалістам прыйшло паведамленне: «Трэба было па-добраму». У выніку Траццяку прыйшлося пакінуць Украіну, бо супраць яго пачалося следства. Аднак праз некаторы час ён змог вярнуцца, а вось што сталася са справай – пра гэта не паведамлялася.
І вось на днях у загарадны дом, дзе жывуць Траццяк і Мілеўскі, прыйшла паліцыя з ператрусам. У сетках нават распаўсюдзілася відэа часткі працэсу.
Мілеўскі каментаваць гэтую сітуацыю адмовіўся, а вось Траццяк сказаў наступнае: «Ператрусы звязаныя з дамоўнымі матчамі, мяне падазраюць у іх арганізацыі. Больш інфармацыі скажу потым. Ператрусы звязаныя з кіберспортам. «Мінай»? Я такую каманду нават не ведаю».
Пазней Траццяк дадаў: «Прыйшлі каля шасці гадзін, як паказана ў пратаколе, прасiлi нас адчыніць. Мы гэтага не чулі. Яны выбілі дзверы. На маю думку, яны проста памыліліся адрасам. Кіберспорт у мяне асацыюецца выключна з гульнямі на Sony PlayStation з Арцёмам Мілеўскім».
Чаму ў Траццяка запыталi пра «Мінай», апошнюю каманду ў кар’еры Мiлеўскага? Таму што вясною 2024 года гульцы клуба Яўген Скіба і Дзмітро Немчанінаў заявiлi, што iм паступала прапанова забяспечыць перамогу кiеўскаму «Дынама» ў вочнай сустрэчы за пяць тысяч долараў – ад чалавека, якi прадставіўся як «Сярожа, які вядзе стрымы з Мілям». Тая гульня завяршылася перамогай «Дынама», а Немчанінаў адзначыўся аўтаголам. Але, мяркуючы па заяве «Міная», у клубе правялi унутранае расследаванне, па выніках якога не знайшлi падстаў падазраваць футбалістаў у несумленнай гульні – маўляў, Скіба і Нямчанінаў прапанову не прынялі.
Траццяк агучыў сваё бачанне гэтай сітуацыі. Ён распавёў, што першапачаткова запрашаў Нямчанінава і Скібу на стрым да іх з Мілеўскім. Тыя адмовіліся, спаслаўшыся на трэнавальны рэжым. Аднак пазней Нямчанінаў пагадзіўся сустрэцца «на гарбату». На сустрэчы сябра Мілі нібыта пачаў расказваць футбалісту, што мае інфармацыю, што некаторыя гульцы «Міная» збіраюцца здаць матч. Нямчанінаў сказаў, што гэта няпраўда. Потым у Траццяка адбылася сустрэча са Скібам, якому ён расказваў прыкладна тое ж самае, а яшчэ нібыта паведаміў (бо ўсё вядома толькі са словаў Траццяка), што паставіў на перамогу «Дынама» з розніцай у два і больш мячоў. Скіба адказаў: «Я зраблю ўсё, каб твая стаўка не згуляла». Траццяк сцвярджае, што Скіба і Нямчанінаў распавялі яму, што ў матчы супраць «Дынама» гульцоў «Міная» збіраўся стымуляваць данецкі «Шахцёр», які на той момант змагаўся з кіяўлянамі за чэмпіёнства. За перамогу «Мінай» мусіў атрымаць на каманду 150 тысяч долараў, а за нічыю 100.
Траццяк растлумачыў і тое, навошта ён асабіста сустракаўся з футбалістамі пасля іх адмовы прыйсці на стрым:
«Я акцыянер букмекерскай канторы ў Іспаніі. У нас пайшлі анамальныя стаўкі на фору «-1.5» «Дынама». Я, каб не страціць грошы, вырашыў прамацаць – што адбываецца ў «Мінаі». Таму паехаў да Скібы і Нямчанінава, каб у іх спытаць: ці будуць яны змагацца?»
Таксама Траццяк дадаў, што ўсю перапіску з футбалістамі, якіх раней ведаў толькі завочна, перадаў ва Украінскую асацыяцыю футбола.
У тым жа інтэрв’ю Траццяк пракаментаваў абвінавачанні ў спробе арганізаваць дагаварны матч у 2018-м:
«Ёсць сур’ёзныя людзі, палітыкі, якія бачаць ува мне канкурэнта на будучых выбарах мэра Кіева. Яны хочуць сапсаваць маю рэпутацыю і ўсяляк распаўсюджваюць ілжывую інфармацыю, быццам я ўдзельнічаю ў брудных справах».
Траццяк удакладніў, што на мэра ён збіраецца балатавацца ў 2028-м. Цікава, што ў сваіх сацыяльных сетках мужчына часта крытыкуе дзейнага кіраўніка Кіева, экс-баксёра Віталя Клічко і прэзідэнта Украіны Уладзіміра Зяленскага. Напрыклад, у ліпені ён назваў апошняга «антыхрыстам» і абвінаваціў у пачатку вайны. Маўляў, перад пачаткам уварвання Зяленскаму было прапанавана пакінуць Данецк, Луганск, Крым і не ўступаць у НАТА, а той адмовіўся, чым «справакаваў» РФ.
Чым у выніку абярнуўся апошні ператрус для Траццяка і Мілеўскага, пакуль не зразумела. Цікава, што гэта не першая працэдура ў іх доме ў гэтым годзе. Упершыню паліцыя заявілася да іх з той жа справай яшчэ ў студзені. Тады Мілівескі казаў, што прычыны тых дзеянняў яму не патлумачылі праз «таямніцу следства». Але інсайдам падзяліўся ўкраінскі журналіст Сяргей Балотнікаў:
«Як мне ўдалося высветліць, крыніцы ў паліцыі распавялі, што справа не ў гэтым «Палычы» (мянушка Трацяка – Tribuna.com), ёсць яшчэ адзін каламутны персанаж, які падазраецца ў гандлі наркотыкамі і порна. Ён з’ехаў за мяжу, а свой дом здае Мілеўскаму.
І вось туды прыйшлі сілавікі з ператрусамі, таму Мілеўскі, вядома, ні ў чым не вінаваты, але замяшаны вось у такой гісторыі. Мілеўскага ратавалі ад алкаголю, а трэба было ад яго атачэння», – сказаў журналіст у эфіры ютуб-канала «КДК».
Іншыя пасты карыстальніка
