Беларускія футбалісты займаюцца ў фізіятэрапеўта з Ірана – ён файны матыватар і працаваў з чэмпіёнамі свету па адзінаборствах

Эхсан Фірузі – фізіятэрапеўт з Ірана. У інстаграме пазіцыянуе сябе як трэнер па футбольным фітнэсе, які працаваў з больш як 50 футбалістамі з прэм’ер-лігі (здаецца, мае на ўвазе пад гэтым азначэннем прадстаўнікоў элітных дывізіёнаў). Сярод іх нямала беларусаў. Вось, напрыклад, мілая фатаграфія з Дзмітрыем Падстрэлавым, які ўзімку змяніў мінскае «Дынама» на албанскі «Партызані»:

А вось гулец зборнай Беларусі U-19 і мінскага «Дынама» Арцём Сакалоўскі:

Гульцы БАТЭ Данііл Жульпа і Аляксандр Ануфрыеў:

Абаронца маскоўскага «Лакаматыва» Арсеній Агееў:

Да прыезду ў Беларусь Фірузі працаваў фізіятэрапеўтам у Іране, дзе таксама меў справу з футбалістамі: напрыклад, паўабаронцамі Хамедам Бахіраем, Эхсанам Пахлаванам і абаронцам Абузарам Сафажадзехам – усе трое на сёння гуляюць за клубы іранскага Д1.

Фірузі не прывязаны толькі да футболу. У 2018-м ён працаваў са зборнай Ірана па тайскім боксе, у якой быў тытулаваны Масуд Мінаі па мянушцы «Бясшумны забойца» – пераможца некалькіх прамоўшэнаў, чэмпіён Еўропы і Азіі.

За кар’еру Мінаі правёў 44 паядынкі – перамог у 39, 18 разоў накаўтам, у пяці прайграў. Аднойчы Мінаі біўся з беларусам – у красавіку 2017-га ў кітайскім прамоўшэне EM Legend яму супрацьстаяў Максім Спадарэнка. Іранец тады перамог аднагалосным рашэннем суддзяў.

Яшчэ адзін тытулаваны спартсмен (дакладней, спартоўка) з кліентаў Фірузі – Захра Кіяні. Дзяўчына шмат разоў перамагала на чэмпіянатах свету і Азіі па ўшу. У чэрвені яна прыязджала ў Казань на непрызнаныя МАК Гульні Брыкс-2024, якія па задуме расійскіх арганізатараў мусілі стаць альтэрнатывай парыжскай Алімпіядзе. У Казані Кіані ўзяла срэбра ў стылі цяншу – гэта комплексы практыкаванняў без зброі, стылізаваныя спаборніцкія выступленні, у якіх удзельнік дэманструе тэхніку і выразнасць у баі з адным ці некалькімі ўяўнымі апанентамі.

Прыклад выступу Кіані можна паглядзець тут. На Радзіме яна даволі папулярная – мае ў інстаграме больш за 474 тысяч падпіснікаў.

Але вяртаемся да Фірузі. У Беларусь ён прыехаў вучыцца – наша краіна даволі папулярны кірунак для студэнтаў з Ірана. Фірузі атрымаў у Беларусі ступень магістра, але навучанне далося яму нялёгка. Пад адным з пастоў у інстаграме ён расказваў, што адным з самых нецікавых этапаў падчас навучання для яго стала напісанне дысертацыі. Маўляў, давялося факусавацца на тым, што ўжо даўно даказалі, а тэмы, якія змяшчалі новыя ідэі, былі забракаваныя. Але Фірузі ўсё роўна даў рады і скончыў ВНУ з чырвоным дыпломам:

Наогул Фірузі любіць нешта напісаць пад пастамі ў інстаграме. Часамі ён хваліць сваіх падапечных, а часамі расказвае пра трэнінгі або пакідае матывацыйны цытаты. Вось некалькі прыкладаў:

«Існуе невялікая розніца паміж марай і мэтай. Мара – гэта тое, што прыходзіць нам у галаву, калі мы спім, а мэта – гэта тое, дзеля чаго мы прачынаемся».

«Замест таго, каб зважаць на словы іншых, мы павінны засяродзіцца на нашых мэтах. Людзі заўсёды кажуць пра свае мары».

«Галоўны сакрэт у тым, каб мець упартасць і настойлівасць, заключаецца ў веры і даверы да мэты, дзеля якой вы церпіце ўсе цяжкасці».

А яшчэ ён вядзе тэлеграм-канал DRFOOTBALLI, у якім дзеліцца не толькі матывацыяй, але і рознымі праграмамі трэнінгаў і харчавання. Праўда, практычна ўсе пасты там на персідскай мове.