Хвіча ў «ПСЖ»: атрымаў у 5 разоў большы заробак і нумар, пад якім гуляў Мбапэ

Галоўны трансфер гэтай зімы афіцыйна адбыўся. «ПСЖ» у вечар пятніцы абвясціў пра падпісанне грузінскага вінгера Хвічы Кварацхеліі, які прыйшоў з «Напалі».

Лідары Лігі 1 прадставілі зорнага навічка – першага грузіна ў сваёй гісторыі – без лішняга пафасу.

Сабралі найважнейшыя дэталі гэтага трансферу.

💸 Афіцыйна кошт гульца бакі не агучылі. Аднак у французскай і італьянскай прэсе паведамлялася пра 70 млн еўра.

Хаця больш важная фінансавая дэталь – тое, наколькі павялічыўся заробак Хвічы ў Парыжы ў параўнаньні з Неапалем. Калі ў Італіі Кварацхелія зарабляў 1,8 млн. еўра за год, то ў Францыі, як сцвярджаюць медыі, гэтая сума павялічыцца ў пяць разоў.

23-гадовы гулец зборнай Грузіі падпісаў з парыжскім грандам кантракт на чатыры з паловай гады – да лета 2029-га.

У «ПСЖ» Хвіча атрымаў 7-ы нумар, пад якім некалі выступаў Кіліян Мбапэ.

💸 Каментуючы свой прыход на «Парк дэ Прэнс», Кварацхвелія сказаў:

«Апынуцца тут – мара. Я чуў пра «ПСЖ» шмат станоўчых рэчаў. Адчуваю велізарны гонар, далучаючыся да гэтага вялікага клуба. Чакаю з нецярпеннем моманту, калі змагу апрануць новыя колеры».

Сваё меркаванне пра падпісанне выказаў і прэзідэнт парыжан Насер Аль-Хелайфі:

«Хвіча – адзін з найцікавейшых гульцоў у сусветным футболе. Гэта фантастычны талент, але таксама гулец, які мае мужнасць і змагаецца за каманду больш за ўсё.

Хвіча быў поўны рашучасці стаць часткай нашага вялікага клуба. Ведаю, што ён даб'ецца ўсіх сваіх мэт разам з намі».

За тры гады выступаў у Неапалі Кварацхелія зарэкамендаваў сябе як адзін з найлепшых атакавалых гульцоў Еўропы, забіўшы за гэты перыяд 30 галоў і аддаўшы 29 асістаў, што дапамагло «Напалі» ў сезоне 2022/23 выйграць Серыю А – усяго толькі ў трэці раз у гісторыі.

💸 Яго трансферу папярэднічала заява галоўнага трэнера «Напалі» Антоні Контэ. На мінулым тыдні ён сказаў, што Кварацхелія, на якога прэтэндаваў «Ліверпуль», папрасіў неапалітанскі клуб прадаць яго.

Сыход Хвічы на ​​гэтым фоне абурыў заўзятараў клуба з поўдня Італіі. Некаторыя з іх выказалі свой пратэст тым, што выкідвалі кардонную выяву грузіна на сметніцу.

Пасля гэтага Хвіча апублікаваў відэазварот да прыхільнікаў «Напалі» са словамі:

«Гэта цяжка для мяне, але час сказаць да пабачэння. Я правёў неверагодны час тут. Мы разам падзялілі шмат успамінаў, зведалі шмат неверагодных эмоцый. Неапаль быў маім домам, дзе я выдатна пачуваўся дзякуючы кожнаму з нас. Шлях, які мы прайшлі, па-ранейшаму ў маіх думках, і гэта вельмі эмацыйна. Я памятаю свой першы гол і адчуванні, якія ніколі не забуду.

Кажу да пабачэння, але вы заўсёды будзеце ў маім сэрцы. Спадзяюся, мы сустрэнемся зноў. Ведаю, што цяпер у вас разбітае сэрца, але аднойчы я вам усё раскажу. Зычу вам удачы».

💸 «ПСЖ» спрабаваў падпісаць Кварацхелію яшчэ летам мінулага года, і Хвіча нават пагадзіўся на пераход, абмеркаваўшы з парыжанамі дэталі асабістага кантракту. Зрэшты, абураны гэтым фактам «Напалі» тады адмовіўся прадаваць гульца за менш як 150 млн еўра.

Мінулай восенню ўжо паведамлялася пра перамовы паміж «Напалі» і Кварацхеліяй наконт падаўжэнні кантракту, які заканчваўся ў 2027 годзе. Размова ішла таксама пра тое, што неапалітанцы ўсё ж прададуць грузіна, калі дамовіцца не ўдасца.

Фота: ПСЖ