Матчы АПЛ варта глядзець да канца – колькі галоў там ужо забілі на 90+ у сезоне 2025/26

Цэнтральны матч 7 тура АПЛ не расчараваў – «Чэлсі» абыграў «Ліверпуль» у цікавым паядынку, у якім абедзве каманды мелі добрыя моманты, але лонданцы апынуліся мацнейшымі. І ўсё дзякуючы галу ў кампенсаваны час. Эстэваа забіў свой дэбютны гол за «сініх» пасля перадачы Кукурэльі на 90+5-й хвіліне.

Развязка матчу на «Стэмфард Брыдж» прымусіла задумацца – а які гэта наогул па ліку гол на 90+ у матчах англійскай Прэм’ер-лігі ў гэтым сезоне? Мы паглядзелі – аказваецца, ужо ажно 22-і! Нагадаем, у разгары ўсяго толькі 7-ы тур, а згуляна па стане на 4 кастрычніка толькі 65 матчаў.

Часцей за ўсё пераможныя галы здараюцца пакуль што ў матчах «Ліверпуля». Каманда Слота класна правяла першыя пяць тураў, атрымаўшы пяць перамог, дзве з якіх былі здабыты менавіта ў кампенсаваны да другога тайма час.

А вось потым гэтая з’ява пачала гуляць ужо супраць мерсісайдцаў. У мінулым туры яны прапусцілі ад «Крыстал Пэлас» на 90+7, а праз тыдзень – ад «Чэлсі» на 90+5.

Варта адзначыць, што і самі лонданцы не так даўно пацярпелі ад таго, што прапусцілі ў самым канцы – у мінулым туры атрымалі ажно два галы ад «Брайтана» ў дададзены час.

Пакуль што АПЛ на першым месцы па паказчыку галоў на 90+ у бягучым сезоне. Французская Ліга 1 адстае ўсяго на тры мячы, а італьянцы, іспанцы і немцы далёка ззаду.

Калі ў гэтым сезоне Прэм’ер-лігі каманды будуць працягваць у такім жа тэмпе, то яны могуць пабіць рэкорд па колькасці забітых мячоў у кампенсаваны час. Ён, дарэчы, быў усталяваны не так даўно – у розыгрышы 2023/24 было ажно 112 такіх галоў.