Эндрык з нагі заляцеў у «Ліён» пасля забыцця ў «Рэале» – пабіў рэкорд і ўжо заваяваў сэрцы фанаў
«Як быццам Бог сказаў, што гэта правільнае месца для мяне».
19-гадовы нападнік Эндрык, які зімой перайшоў у «Ліён» з «Рэала» на правах арэнды, бліскуча стартаваў у Францыі, запісаўшы ў актыў ужо 4+1 па «гол+пас».
У 19-м туры ён аформіў хет-трык у браму «Меца». Бразілец адразу паказаў, што можа быць, калі ў яго вераць і даюць гульнявы час.
Як Эндрык апынуўся ў Фансекі
Старт сезона паказаў, што «Ліёну» проста неабходна зімой шукаць нападніка. Малік Фафана атрымаў цяжкую траўму, Марцін Сатрыяна не ўразіў, а іншай опцыі ў Паўлу Фансэкі проста не было.
Перамовы пра пераход Эндрыка пачаліся з «Рэалам» яшчэ ў лістападзе. За бразільцам паляваў шэраг клубаў, але ён сам абраў «Ліён» – і не пралічыўся.
Пад кіраўніцтвам Карла Анчалоці Эндрык згуляў 847 хвілін у дэбютным сезоне за мадрыдцаў, забіўшы сем галоў. Клубны чэмпіянат свету ён прапусціў праз траўму, якая фактычна паставіла крыж на яго гульні за «сметанковых», паколькі на турніры бліснуў Гансала Гарсія, а яшчэ ж ёсць Кіліян Мбапэ. Хабі Алонса перавёў юнага Гарсію ў першую каманду, а Эндрык сеў у глыбокі запас.
Бразілец атрымаў толькі каля 90 хвілін гульнявога часу пры Алонса. Стала зразумела, што калі нападнік хоча гуляць, варта пагаджацца на арэнду. Тым больш летам стартуе ЧС-2026 – і трэба даказваць Анчалоці, які кіруе зборнай Бразіліі, сваю вартасць, каб быць у заяўцы на турнір.
«Ліён» накрыла хваля Эндрыкаманіі
У «Ліёне» бразільцы ў асноўным добра прыжываліся. Старажылы ўспомняць Жуніньё, Фрэда і Соні Андэрсана, а яшчэ свежае – прыходы Лукаса Пакеты і Бруна Гімараэса.
Прыезд Эндрыка выклікаў небывалы ажыятаж. Відэапрэзентацыя ў Instagram сабрала 1,2 мільёна лайкаў, а колькасць праглядаў дасягнула пад 20 млн – абсалютны клубны рэкорд.
Нягледзячы на тое, што бразілец прыйшоў толькі на паўгода, футболка з яго імем распрадавалася як гарачыя піражкі, а кошт 143 еўра нікога не палохаў.
«Эндрык – адзін з найлепшых нападнікаў, якія ў нас ёсць. Нажаль, яму не вельмі пашчасціла ў «Рэале». Але ён цудоўны гулец, ён умее забіваць, у яго гэта ёсць. Я спадзяюся, што ў яго ўсё атрымаецца ў «Ліёне». Я з ім», – каментаваў трансфер нападніка Рамарыа.
Дэбют прыпаў на матч Кубка Францыі супраць «Ліля». Бразілец выйшаў у стартавым складзе, а ўжо на 42-й хвіліне святкаваў свой першы гол за «ткачоў». Асіставаў Эндрык Талісо. Здаецца, усяго некалькіх трэнінгаў хапіла для таго, каб француз і бразілец паразумеліся на полі.
«Эндрык вельмі хутка адаптаваўся, ён старанна трэнуецца. Яму трэба працягваць у тым жа духу: ён вельмі малады гулец. Калі будзе ўпарта працаваць кожны дзень, то будзе ўзнагароджаны і працягне прыносіць нам перамогі», – сказаў Талісо.
Супраць «Брэста» ў Лізе 1 нападнік вызначыўся выніковай перадачай. Але гэта яшчэ не ўсё: Эндрык быў адным з самых агрэсіўных у складзе «Ліёна», стварыўшы пяць галявых момантаў. Зусім заслужана ён атрымаў званне найлепшага гульца матчу.
Трэцяя гульня за «ткачоў», супраць «Меца», стала гістарычнай не толькі для клуба, але і для самога Эндрыка. Упершыню ў кар’еры нападнік аформіў хет-трык.
«Гэта мой першы хет-трык, я шчаслівы! Мне вельмі пашанцавала з «Ліёнам». Як быццам Бог сказаў, што гэта правільнае месца для мяне. Я нават уявіць не мог, што так можа быць - а цяпер гэта рэальнасць. У мяне выдатнае паразуменне з партнёрамі, заўзятарамі – з усімі ў клубе», – акзаў пасля гульні бразілец.
Эндрык пабіў рэкорд легендарнага для «Ліёна» Бернара Лякомба, стаўшы самым маладым гульцом з 1972 года, якому ўдалося забіць тры мячы ў адным матчы (19 гадоў і 188 дзён супраць 19 гадоў і 196 дзён). Па гэтым жа паказніку ён трапіў у кампанію Жэрэмі Менеза, Кіліяна Мбапэ і Усмана Дэмбеле.
Фансека пасля гульні з «Мецам» назваў Эндрыка «асаблівым». А сам нападнік ззяў ад шчасця, ужо другі раз трымаючы прыз найлепшаму гульцу матчу.
Вельмі яркі кантраст з перыядам у «Рэале». У бразільца было ўсяго пяць галоў за ўвесь 2025 год, прычым апошні - дзевяць месяцаў таму. Затое ў 2026-м – ужо чатыры галы за два тыдні ў Францыі.
«Я неаднаразова казаў, што нам не хапала ініцыятывы, глыбіні складу… Цяпер, з Эндрыкам, у нас гэта ёсць. Ён сам па сабе змяняе сітуацыю, але таксама вельмі камфортна пачуваецца ў камандзе. Не варта забывацца, што ў гэтым сезоне ён амаль не гуляў. Таму Эндрык будзе паляпшаць сваю фізічную форму і працягваць прагрэсаваць», – перакананы Фансека.
Перад трансферам бразільца «ткачы» займалі пятае месца ў Лізе 1, цяпер жа падняліся ў зону кваліфікацыі Лігі чэмпіёнаў. Апошні раз «Ліён» гуляў у ЛЧ аж у 2020 годзе. Калі Эндрык дапаможа вярнуць клуб у галоўны еўрапейскі турнір, гэта будзе прыгожая гісторыя.
У Лізе Еўропы «Ліён» ужо гарантаваў сабе месца ў 1/8-й. І зараз, з Эндрыкам, каманда мае козыр, які можа змяніць расклад сіл. Яго галы, азарт і юная энергія здольныя падарыць клубу шанц прайсці куды далей, чым чакалася.
Гледзячы на яго дэбют, немагчыма не ўспомніць гісторыю Марыяна Дыяс. Той таксама з першых матчаў у «Ліёне» стаў кумірам фанаў, але вяртанне ў «Рэал» абярнулася расчараваннем. Ці паўторыць Эндрык гэты шлях або напіша ўласную легенду – давайце назіраць. Але ўжо сёння відавочна: у «Ліёна» з’явіўся новы герой.
Фота: Icon Sport, Christophe Saidi/FEP/Icon Sport
Іншыя пасты карыстальніка
