ПСЖ ніяк не дамовіцца з Дэмбеле пра новы кантракт – клуб больш не патурае сваім зоркам
«У нас ёсць столь заробкаў, каманда і клуб – самае важнае».
Узімку «ПСЖ» быў актыўным на трансферным рынку, бо галоўная мэта клуба палягае ў захаванні тых, хто ёсць. Таму спартыўны дырэктар Луіш Кампуш і прэзідэнт Насер Аль-Хелайфі сканцэнтраваныя на прадаўжэнні кантрактаў.
Адным з іх з’яўляецца дзейны ўладальнік «Залатога мяча» – 28-гадовы Усман Дэмбеле. І перамовы ідуць не вельмі лёгка.
ПСЖ прапануе заробак у 30 млн, Усман хоча ўдвая больш
Перамога ў Лізе чэмпіёнаў была б немагчымая без унёску і самаахвяравання Дэмбеле дзеля каманды. Луіс Энрыке прыклаў багата намаганняў, каб француз стаў найлепшым і атрымаў «Залаты мяч». Здавалася, што Усман і «ПСЖ» створаныя адзін для аднаго. Зрэшты, любыя адносіны могуць даць расколіну, калі ў справу ўмешваюцца грошы.
Кантракт Дэмбеле заканчваецца ў 2028 годзе. Як і ў іншых выпадках, ПСЖ пачаў перамовы загадзя, каб не аказацца ў цяжкім становішчы. Усман атрымаў прапанову аб заробку ў 30 мільёнаў еўра. І яна была адхіленая, а бок гульца папрасіў амаль удвая больш. Як тут не ўспомніць «Барселону», якая таксама не змагла задаволіць фінансавыя апетыты француза.
Яшчэ ў кастрычніку, пасля таго як у Шале віншавалі Дэмбеле з «Залатым мячом», агент гульца наведаў штаб-кватэру клуба і заявіў, што яго кліент заслугоўвае фінансавыя бонусы. Пазіцыя Усмана ў перамовах сапраўды даволі моцная праз шэраг індывідуальных узнагарод, якія ён атрымаў за сезон-2024/25. Адказ «ПСЖ» выразны – кіраўніцтва не плануе выдаткоўваць больш, нават на лідара.
«У нас ёсць столь заробкаў, як усім вядома. Каманда і клуб – самае важнае. Усман – легенда клуба. Я люблю Усмана і як чалавека, і як гульца», – каментаваў перамовы Насер Аль-Хелайфі.
Публічныя каментары кіраўнік ПСЖ даў не проста так. Гэтае пасланне не толькі Дэмбеле і яго агентe. Гэта і папярэджанне для іншых: усё роўна, наколькі ты круты, каманда вышэй за ўсё.
Гэты тэзіс пацвярджае і сітуацыя, якая ўзнікла летам з Джанлуіджы Данарумам. Яго трансфер здзівіў шмат каго, але гэта следства новай палітыкі клуба. Агенты гульца патрабавалі больш грошай, стабільныя бонусы замест пераменных. ПСЖ дзейнічаў катэгарычна і ў выніку арганізаваў трансфер у «Манчэстэр Сіці» без нейкіх шкадаванняў.
ПСЖ цалкам змяніў палітыку ў дачыненні да трансфераў
Тое, што ў Парыжы будуць змены, стала зразумела яшчэ ў 2022 годзе, калі ў клуб прыйшоў Луіш Кампуш. Партугальскі функцыянер вядомы ўменнем перабудоўваць клубы і выводзіць іх на іншы ўзровень. Так было з «Лілем», а да гэтага – з «Манака». Што характэрна, абедзве каманды адбіралі чэмпіёнства ў парыжан, і архітэктарам усяго гэтага быў менавіта Кампуш.
Парыжскі клуб у эпоху Катара прыцягваў збіраць суперзорак, прапаноўваючы ім завоблачныя заробкі, недасяжныя для іншых каманд свету. Чаго вартая толькі гісторыя з Неймарам, за якога было выплачана 222 мільёны еўра клаўсулы.
Як паказаў час, грошы могуць гарантаваць унутраныя трафеі, але не міжнародныя. Акрамя таго, вялізныя заробкі прывялі да таго, што гульцы расслабіліся і замест прагрэсу дэманстравалі рэгрэс. З іншага боку, суперзоркі дапамаглі ў прасоўванні «ПСЖ» як брэнда.
Трыгерам для парыжан стала гісторыя з Кіліянам Мбапэ. Клуб танчыў вакол гульца, спрабуючы перашкодзіць яго сыходу. Да перамоў падключалі нават прэзідэнта Францыі Эмануэля Макрона. У выніку гісторыя завяршылася шматлікімі судовымі працэсамі, а ПСЖ прыйшлося адпускаць Мбапэ дарма.
Луіш Кампуш прывёз у Парыж Луіса Энрыке, і з гэтага моманту перабудова клуба зведала кардынальныя змены. Больш ніхто не патурае зоркам – наадварот, перад імі адчынілі дзверы на выхад.
Калі раней заробкі былі звышвысокімі, то цяпер кантракты ўключаюць пункты, якія прадугледжваюць павышэнне ўзнагароджання ў залежнасці ад вынікаў і колькасці згуляных матчаў. Не згодны – сыходзіш.
«Мне 59 гадоў (на момант інтэрв’ю – заўв.), я ў прафесійным футболе з 18, і я скажу вам абсалютна дакладна: каманда важнейшая, чым асобны гулец. І клуб важнейшы за каманду.
Вялікія зоркі не могуць выгульваць трафей у адзіночку. Яны могуць выгуляць матч, два ці некалькі матчаў. Але ім патрэбныя іншыя, гармонія», – тлумачыць сваю філасофію Кампуш.
Прыход партугальца супаў з развіццём скаўцкай структуры ўнутры клуба. На думку Кампуша, пры фармаванні каманды неабходна рабіць акцэнт на калектыўных, а не індывідуальных якасцях, а гулец павінен дакладна падыходзіць пад сістэму трэнера. Асобная ўвага надаецца ўніверсальным футбалістам.
Парыжане перасталі быць апошнім прыстанішчам для ветэранаў – зараз прыярытэтам стаў пошук маладых талентаў. Доказ: у матчы супраць «Баера» (кастрычнік 2025 года) Луіс Энрыке выставіў склад, сярэдні ўзрост якога складаў 23,1 гады, а 26-гадовы Ашраф Хакімі быў самым старэйшым гульцом на полі.
Адмысловая ўвага надаецца акадэміі. Ужо звыкла, што Уорэн Заір-Эмеры пастаянна выходзіць у стартавым складзе. Таксама Сені Маюлу, Кантэн Нджанту і Ібрагім Мбаі сталі часткай першай каманды, нягледзячы на юны ўзрост. Раней выхаванцы амаль не мелі шанцаў на аснову – іх ігнаравалі і адпускалі з клуба шукаць шчасця ў іншым месцы.
ПСЖ увёў з «Барсы» суперталенавітага гульца – хто такі 18-гадовы Дро
Вядома, ПСЖ дагэтуль траціць шмат, але гэта ўжо не хаатычныя набыцці, а мэтанакіраванае ўзмацненне канкрэтных пазіцый. Парыж больш не гатовы падладжвацца пад зорак, нават калі гаворка пра самыя гучныя прозвішчы. Новы курс просты і жорсткі: сістэма важнейшая за індывідуальнасць, дысцыпліна – важнейшая за эга, а кантракт – гэта ўзнагарода за вынік, а не аванс за рэпутацыю.
Усману Дэмбеле давядзецца або пагадзіцца на ўмовы, або пайсці. Выключэння не зробяць нават дзеля ўладальніка «Залатога мяча». ПСЖ, як паказала практыка, здольны пражыць без любога гульца – а ў асобных выпадках нават стаць лепшай за сваю папярэднюю версію.
Фота: Anthony Bibard/Icon Sport, Philippe Lecoeur/FEP/Icon Sport, Icon Sport/Baptiste Fernandez, LP/Arnaud Journois, LP/Frédéric Dugit
Іншыя пасты карыстальніка
