Мы жывем у матрыцы трэнера «Будзё-Глімт»? Яго кар’ерны шлях – ваў: ад настаўніка ў школе да 1/8-й ЛЧ

«Будзё-Глімт» – галоўная пакуль сенсацыя сезона Лігі чэмпіёнаў. Нарвежцы ўжо ў 1/8 фіналу пасля эфектных матчаў супраць «Інтэра» ў стыках (5:2 па суме матчаў).

Апроч развіцця самога клуба, захапленне выклікае і праца галоўнага трэнера Х’еціля Кнутсэна. А ў сетцы завірусіўся жарт, маўляў, усе мы жывем не ў рэальнасці, а ўнутры сімуляцыі сэйва Football Manager 57-гадовага спецыяліста.

«Спытаю яшчэ раз: мы цалкам упэўненыя, што існаванне ў тым выглядзе, як мы яго ведаем – гэта не сімуляцыя, але замест «Матрыцы» мы ўсё затрымаліся ў адным з сэйваў Football Manager Х’еціля Кнутсэна?»

Кар’ерны шлях Х’еціля сапраўды незвычайны.

📅 Кнутсэн ніколі не гуляў у футбол прафесійна. Яго максімум – аматарскія і паўпрафесійныя лігі ў маладыя гады, пра якія няма звестак. Адпаведна, нават профілю гульца на Transfermarkt не мае!

📅 Паралельна Х’еціль працаваў настаўнікам цягам 10-15 гадоў (звесткі адрозніваюцца). Ён выкладаў у пачатковай/сярэдняй школе, а таксама ў гімназіі, якую наведвалі дзеці акадэміі футбольнага клуба «Бран».

У 26 гадоў (у сярэдзіне 90-х) пачаў сумяшчаць педагагічную дзейнасць з трэнаваннем, але таксама на юнацкім/аматарскім узроўні ў ніжэйшых дывізіёнах.

Падрабязна пра выкладанне прадметаў Кнутсенам невядома, але ёсць інфармацыя, што гэта было звязана якраз з фізічным выхаваннем. Плюс фан-факт з нарвежскіх медыя: у яго вучылася Лісе Клавенес, якая пасля згуляла 73 матчы за жаночую зборную, а сёння наогул узначальвае мясцовую асацыяцыю футбола.

📅 Працаваць з дарослымі камандамі Кнутсэн пачаў толькі ў канцы нулявых – то бок калі яму было ўжо 40+ гадоў.

Таксама клубы з найнізкіх ліг – прычым з аднаго яго звольнілі пасля вылету. Праўда, з камандай «Асане» пазней было павышэнне ў класе і захаванне там месца.

📅 У 2017-м Х’еціль трапіў у штаб «Будзё-Глімт» асістэнтам трэнера Осмунда Б’ёркана. Праз некаторы час Б’ёркан стаў спартыўным дырэктарам клуба, а Кнутсен замяніў яго на пасадзе коўча.

Гэта быў пачатак 2018-га – пасля таго, як каманда фінішавала лідарам у другім дывізіёне і вярнулася ў эліту. Першы паўнацэнны сезон новага трэнера скончыўся 11-й пазіцыяй у эліце.

І так, гэта быў дэбют у вышэйшай лізе на пасадзе ў 50 (!) гадоў.

📅 На момант прызначэння Кнутсена «Будзё-Глімт» ні разу не выгульваў чэмпіянат Нарвегіі (толькі два Кубкі) і не даходзіў да позніх стадый плэй-оф еўракубкаў.

А з ім клуб напісаў новую гісторыю. Па-першае, узяў 4/6 тытулаў у перыяд з 2020-га па сёння. Саступіў золата толькі двойчы: у 2022-м «Мольдэ» і сенсацыйна летась, калі чэмпіёнам Нарвегіі ўпершыню з 1991-га стаў «Вікінг».

Лёс трафея вызначыў адзін бал.

📅 У еўракубках таксама імклівы прагрэс. У сезоне 2021/22 «Будзё-Глімт» дайшоў да чвэрцьфіналу Лігі канферэнцый (вылет ад «Ромы»), у сезоне 2024/25 – да паўфіналу Лігі Еўропы (вылет ад «Тотэнхэма»), а ў сезоне 2025/26 – упершыню ў гісторыі трапіў у асноўны раўнд Лігі чэмпіёнаў.

І не проста патрапіў, а па чарзе ў апошніх матчах абгуляў «Манчэстэр Сіці», «Атлетыка» і цяпер вось двойчы «Інтэр» на шляху адразу да 1/8 фіналу.

Фантастычная гісторыя.

Фота: інфографіка Tribuna.com, Diego Souto/Getty Images