Скончыў кар'еру адзін з самых статусных легіянераў у гісторыі «Дынама»: з процьмай рэкордаў у НХЛ, але без Кубка Стэнлі

16 ліпеня легендарны форвард Джо Павелскі ў эфіры праграмы NHL Morning Skate аб'явіў пра завяршэнне карʼеры. Такі намер ён анансаваў яшчэ адразу пасля заканчэння сезона-2023/24, на фінішы якога разам з «Даласам» саступіў у фінальнай серыі Заходняй канферэнцыі 2:4.

Практычныя ўсю прафесійную карʼеру Павелскі выступаў у НХЛ: з 2006-га па 2019-ы за «Сан-Хасэ», а з 2019-га па 2024-ы за «Далас». Адзіным неамерыканскім клубам у яго карʼеры стала мінскае «Дынама», дзе ён паспеў адгуляць некалькі месяцаў на старце сезона 2012/13. Тады ў НХЛ здарыўся лакаўт – ліга і прафзвяз гульцоў не змаглі дамовіцца пра новае калектыўнае пагадненне, так што прызначаны на 11 кастрычніка пачатак рэгуляркі быў адкладзены. Бакі прыйшлі да кансенсусу толькі на пачатку 2013-га – першыя гульні адбыліся 19-га студзеня.

На час прастою НХЛ многія хакеісты паехалі па гульнявую практыку ў Еўропу – у тым ліку ў мінскае «Дынама». Адным з такіх «практыкантаў» стаў Павелскі. З «Дынама» ён падпісаў кантракт у сярэдзіне кастрычніка 2012-га. Першы выніковы бал зарабіў толькі ў чацвёртым матчы (асіст супраць «Барыса»), а затым атрымаў нязначнае пашкоджанне. Вярнуўшыся на лёд, пачаў паказваць узровень: у лістападзе стаў трэцім у камандзе па выніках галасавання заўзятараў за найлепшага гульца месяца. У снежні выдаў магутны перфоманс: у шасці матчах набраў 10 пунктаў, пасля чаго з'ехаў святкаваць Каляды на Радзіму, і ў Мінск ужо не вярнуўся (якраз падаспела пагадненне па новай калектыўнай дамове). Сумарна ў «Дынама» форвард правёў 17 матчаў, у якіх набраў 15 (7+8) пунктаў. Кароткага адрэзка ў «Дынама» хапіла, каб карыстачы тады яшчэ Goals.by прызналі Павелскі самым каштоўным гульцом сезона ў камандзе.

Сам гулец пазней у інтэрв'ю дзяліўся ўражаннямі пра жыццё ў Мінску. Паводле яго слоў, у Беларусі ён «асвоіўся хутка і ніякіх праблем не адчуваў», хоць прызнаваўся, што мінскае надворʼе пасля каліфарнійскага для яго было нязвыклым. Таксама ён адзначыў заўзятараў «Дынама»: «У Беларусі хакей і каманду вельмі і вельмі любяць. 15 тысяч гледачоў за нас з імпэтам перажывалі на кожным матчы, і гэта выдатна». А яшчэ інтэрвʼюер спытаў Павелскі пра Аляксандра Лукашэнку, на што той адказаў, што ніколі асабіста не сустракаўся з ім, але «не раз чуў, як ён любіць хакей, мінскае «Дынама», яго гульцоў».

Пасля вяртання з Беларусі нападнік працягнуў гуляць у «Сан-Хасэ», дзе стаў сапраўднай легендай: за 13 сезонаў правёў 881 матч у рэгулярным чэмпіянаце, у якіх набраў 761 пункт (355+406) па гол+пас, і 121 матч у плэй-оф – там 100 выніковых балаў (48+52). У 2016-м Павелскі дайшоў з «акуламі» да фіналу Кубка Стэнлі, дзе стаў з 14 шайбамі найлепшым снайперам таго розыгрышу, але каманда саступіла «Пітсбургу» (2:4 у серыі).

У амаль 35-гадовым узросце Павелскі вырашыў кінуць сабе новы выклік і летам 2019-га падпісаў кантракт у статусе неабмежавана свабоднага агента з «Даласам». «Сан-Хасэ» зладзіў годныя праводзіны для клубнай легенды – выкупіў старонку ў двух газетах, на якіх размясцілі падзяку, а сам хакеіст не адмаўляў магчымасці вяртання ў клуб у будучыні.

У «Даласе» ужо ў шаноўным узросце Павелскі працягнуў выступаць ярка: за пяць сезонаў правёў 369 матчаў у рэгулярцы (121+186 па гол+пас) і 67 (26+17) у плэй-оф, а ў дэбютным сезоне зноў дапамог сваёй камандзе дайсці да фіналу Кубка Стэнлі. Праўда, і тут перамагчы не ўдалося – мацнейшай была «Тампа» (2:4 у серыі). У мінулым сезоне «Далас» спыніўся за крок ад вырашальнай стадыі – у фінале Заходняй канферэнцыі саступілі «Эдмантану» (2:4 у серыі), пасля чаго Павелскі сказаў: «З мяне хопіць. У маіх планах няма працягу кар'еры ў наступным сезоне НХЛ».

Калі кар'ера Павелскі толькі пачыналася, наўрад ці нехта мог прадказаць, што яна будзе настолькі паспяховай. У 2003 годзе «Сан-Хасэ» выбраў на той момант 18-гадовага форварда ў сёмым раўндзе драфта пад 205-м агульным нумарам. У выніку з 263 задрафтаваных толькі 118 засвяціліся ў НХЛ. Павелскі - лідар па па галах і пунктах у рэгулярных сезонах (476 і 1068 адпаведна) і ў плэй-оф (74 і 143 адпаведна) сярод усіх хакеістаў, каго калі-небудзь выбіралі ў 7-м раўндзе драфта.

Яшчэ адно ўнікальнае дасягненне – з дэбютнага сезона ў НХЛ Павелскі займае пятае месца па галах і сёмае па пунктах у рэгулярным сезоне, але ён першы па галах і чацвёрты па пунктах у плэй-оф. У гісторыі НХЛ экс-дынамавец займае 13-е месца па колькасці галоў у плэй-оф (74), адстаючы на ​​дзве шайбы ад Марыё Лемʼе. Рэкардсмен у гэтым рэйтынгу – Уэйн Грэцкі (122).

У 2023-м Павелскі зрабіў покер у першым матчы серыі другога раўнда Кубка Стэнлі супраць «Сіэтла» (4:5 АД), стаўшы самым узроставым (38 гадоў 295 дзён) гульцом у гісторыі лігі з 4+ шайбамі ў матчы плэй-оф – такім чынам пабіў 66-гадовы рэкорд Морыса Рышара («Манрэаль», 1957 год). У таго было чатыры шайбы ў першым матчы фіналу Кубка Стэнлі з «Бостанам» (5:1) у 35 гадоў 245 дзён.

А яшчэ Павелскі двойчы выступаў за зборную ЗША на Алімійскіх гульнях: у 2010 выйграў срэбра ў Ванкуверы (у фінале саступілі ў авертайме Канадзе 2:3), у 2014-м стаў 4-мі (у матчы за бронзу перамагла Фінляндыя 5:0).

Пасля завяршэння спартыўнай кар'еры Павелскі можа вярнуцца ў «Сан-Хасэ», але ўжо не хакеістам.

«Я размаўляў з [генеральным менеджарам «Шаркс»] Майкам Грырам. Цяпер у клубе мяняецца сітуацыя з улікам іх драфт-пікаў і тых хакеістаў, якія яны падпісалі.

Для мяне гэта былі выдатныя 13 гадоў у «Сан-Хасэ». Асаблівае месца. Яно заўсёды будзе такім, бо мы пачыналі там. Гэта заўсёды будзе часткай мяне», – сказаў Павелскі.

Хакей – не адзіны спорт у жыцці Павелскі. На днях ён удзельнічаў у турніры па гольфе American Century Championship – штогадовыя спаборніцтвы, у якім бяруць удзел найбуйнейшыя зоркі спорту. Экс-форвард мінскага «Дынама» заняў другое месца, саступіўшы пераможцу – экс-тэнісітсу Мардзі Фішу 4 пункты (79 супраць 83).

ВІДЭА

У 2022-м ён таксама стаў другім, саступіўшы толькі былому гульцу клуба НФЛ «Далас» Тоні Рома.

Але гольф-трафей, у адрозненні ад Кубка Стэнлі, Павелскі яшчэ можа ўзяць.