Маладая беларуска – зорка пяціборʼя: у топе алімпійскага рэйтынга, натхнілася лукашысткай і абышла яе

У беларускім сучасным пяцібор'і, здаецца, з'явілася новая зорка. Марыя Гнедчык дэбютавала на этапах Кубка свету толькі сёлета, а ўжо ўзначаліла алімпійскі рэйтынг. На першым этапе Кубка свету ў Каіры дзяўчына паказаў 17-ы вынік, але ўжо на наступным у Анкары ўвайшла ў топ-5. Паспяховым для Гнедчык атрымаўся этап у Будапешце, дзе яна заняла першае месца, апярэдзіўшы бліжэйшую праследавацельніцу на 8 балаў. Ну а 28 траўня беларуска заваявала срэбра на фінальным этапе Кубка свету ў Анкары, што дазволіла ёй заняць першае месца ў кваліфікацыйным рэйтынгу на Алімпійскія гульні. Пуцёўкі ў Парыж мусяць атрымаць першыя дзевяць спартсменак.

Адабрацца на Алімпіяду Гнедчык можа не толькі дзякуючы пазіцыі ў рэйтынгу. З 9 па 16 чэрвеня пяціборцаў чакае чэмпіянат свету, які пройдзе ў кітайскім Чжэнчжоў. Турнір таксама будзе кваліфікацыйным да Алімпійскіх гульняў. Пуцёўку атрымаюць прызёры ЧС, а, мяркуючы па апошніх выступленнях, у Гнедчык нядрэнныя шанцы ўзысці на п'едэстал.

А што ўвогуле вядома пра маладую спартсменку?

Дзяўчына нарадзілася 23 сакавіка 2004-га ў сямʼі спартсменаў. Маму клічуць Аксана, яна – майстар спорту СССР па лёгкай атлетыцы. Бацька таксама майстар спорту, але па вольнай барацьбе. У адным з інтэрвʼю Марыя расказвала, што думала пайсці па слядах бацькі, але той адказаў: «Толькі праз мой труп». У Гнедчык ёсць яшчэ малодшыя браты Акім і Клім. Першы, як і сястра, займаецца пяціборʼем і, па словах маці, ужо станавіўся пераможцам рэспубліканскіх спаборніцтваў.

Цікава, што Гнедчык пачала займацца пяцібор'ем прафесійна толькі чатыры гады таму. Да таго спрабавала сябе ў плаванні, лыжах, біятлоне (станавілася пераможцам дзіцячага турніру «Снежны снайпер»), стыпль-чэзе (скачках верхам па перасечанай мясцовасці), вялікім тэнісе. Але выбар спыніла на пентатлоне, на што, паводле ўласнага прызнання, натхніла бронзавая прызёрка Алімпіяды-2008 і падпісантка за рэжым Анастасія Пракапенка.

[У дзіцячым узросце] прыехалі на чэмпіянат свету па лазер-ране ў Будапешт. Там праходзіў і чэмпіянат свету па сучасным пяцібор'і сярод дарослых. Ішоў канкур, Насця Пракапенка выступала на кані. Я проста не змагла адарваць вачэй. У той момант мне проста знесла дах. Зразумела, што гэта менавіта тое, чым я хачу займацца, і больш ні пра што не магла думаць, – расказвала Гнедчык.

А яшчэ Марыя называе актыўную прыхільніцу рэжыму Лукашэнкі прыкладам для пераймання.

«Насця, з-за якой я выбрала для сябе пяціборʼе, для мяне цяпер прыклад для пераймання: яна сапраўдны прафесіянал, у якой ёсць усе якасці чэмпіёнкі», – казала Гнедчык.

Сёння Гнедчык выступае куды лепей за калегу. На этапах Кубка свету ў Каіры, Анкары і Венгрыі Пракапенка завяршала выступленне на стадыі паўфіналу. У фінале Кубка свету падпісантка за рэжым паказала 16-ы вынік. У алімпійскім рэйтынгу Пракапенка 41-я.

Марай Гнедчык з'яўляецца золата Алімпійскіх гульнях. Пра гэта дзяўчына заявіла пасля перамогі на леташніх Гульнях краін СНД. А яшчэ падчас адхілення казала, што супернікам Беларусі і Расіі пашанцавала, што спартсмены з гэтых краін не ўдзельнічаюць у міжнародных спаборніцтвах: «Зборныя Беларусі і Расіі – фаварыты любых міжнародных стартаў, так што ўсім супернікам шчыра пашанцавала, што нас няма. Але мы абавязкова вернемся, і тады паглядзім, хто чаго варты».

Гнедчык любіць эксперыментаваць з валасамі. Дзяўчына расказвала: «Не была толькі зялёнай, як кікімора балотная, а так – сіні, фіялетавы, руды, чорны, белы». Зрэшты, і адценні зялёнага можна адшукаць:

Большасць фота ў інстастаграме Гнедчык – з трэнінгаў або спаборніцтваў:

Фота: Інстаграм _mariagnedchik_