Вы ведалі, што Мірны валодаў алімпійскім рэкордам да Гульняў у Парыжы? Яго пабілі Джокавіч і двое аўстралійцаў

4 жніўня ў Парыжы завяршыўся алімпійскі тэнісны турнір у мужчын, пераможцам якога ў адзіночным разрадзе стаў Новак Джокавіч. У фінале серб ва ўпартым матчы абгуляў іспанца Карласа Алькараса 7:6, 7:6 і заваяваў першае ў кар'еры золата Алімпіяды. Да таго ў скарбонцы Джокавіча быў толькі адзін медаль з АГ – бронзавы ў адзіночцы ў Пекіне.

Цікава, што дзякуючы сваёй перамозе Джокавіч пабіў рэкорд, які пратрымаўся ўсяго адзін дзень. 3 жніўня дуэт аўстралійскіх тэнісістаў Мэцью Эбдана і Джона Пірса ўзяў золата ў парным разрадзе, у фінале абгуляўшы прадстаўнікоў ЗША Осціна Крайчака і Раджыва Рама 7:6, 6:7, 10:8. На момант трыўмфу ў Парыжы абодвум аўстралійцам ужо было 36 гадоў, што зрабіла іх на суткі самымі ўзроставымі тэнісістамі ў сучаснай гісторыі, каму ўдавалася браць золата на Алімпіядзе. Да таго рэкорд належаў беларусу Максіму Мірнаму, які стаў алімпійскім чэмпіёнам у міксце разам з Вікторыяй Азаранка на Гульнях у Лондане-2012 ва ўзросце 35 гадоў і 31 дзень. Джокавіч жа стаў алімпійскім чэмпіёнам у 37 гадоў і 73 дні!

У свой час Мірны ў пары сустракаўся з кожным з вышэйзгаданых уладальнікаў залатых медалёў Парыжа. Супраць Джокавіча гуляў у 1/8 фіналу турніру ATP у Цынцынаці. Тады серб разам з суайчыннікам Ненадам Зімонічам былі мацнейшымі за беларуса і шведа Ёнаса Б'ёркмана 7:6, 6:4, 7:6. У 2013-м Мірны мог яшчэ раз згуляць супраць Джокавіча на турніры ў Пекіне, але той зняўся праз траўму напарніка швейцарца Станісласа Ваўрынкі. У выніку беларус разам з румынам Хорыя Тэкеу выйшлі ў фінал, дзе ўдалося перамагчы італьянцаў Фабіа Фаньіні і Андрэаса Сэпі 6:4, 6:2.

З кожным з аўстралійцаў, у розных спалучэннях пар, Мірны сустракаўся па шэсць разоў. І па асабістых сустрэчах перавага на баку прадстаўнікоў ціхаакіянскага рэгіёну – 4:2.

Яшчэ раз Мірны ў пары з тайванькай Чань Хао-Чын гуляў супраць Пірса ў міксце на US Open-2014. Тады мацнейшым зноў аказаўся аўстраліец, які выступаў з суайчынніцай Эшлі Барці (6:3, 6:2).

***

6 ліпеня Мірнаму споўнілася 47 гадоў. Мінулы год для знакамітага беларускага экс-тэнісіста выдаўся няпростым. У кастрычніку ён даў «пакаяннае інтэрв'ю» за тое, што ў 2020-м выказаўся супраць гвалту сілавікоў Лукашэнкі. Верагодна, што ён пайшоў на гэты крок праз ціск рэжыму на бацьку Мікалая Мірнага.

Яшчэ не адзін беларус возьме прыклад з Мірнага. Што зробіш, калі патрапіўся ў рукі да маньяка

У снежні была інфармацыя, што ў Мірнага знайшлі злаякасную пухліну галавы, і яму прыйшлося перанесці ​​8-гадзінную аперацыю, якая прайшла паспяхова. Пасля яе тэнісіст разам з сямʼёй зʼехаў аднаўляцца ў Фларыду і больш у публічнай прасторы не зʼяўляўся.