Сабаленка выбіла з US Open дачку аднаго мільярдэра – і ў фінале згуляе з дачкой другога. Увогуле, беларуска дамінуе на хардзе
А б'е мацней за мужыкоў!
Здаецца, што беларуская тэнісістка Арына Сабаленка пакінула ўсе свае праблемы ў мінулым. Яе бяспройгрышная серыя доўжыцца ўжо 11 матчаў, а да перамогі на прэстыжным турніры ў Цынцынаці дадаўся выхад у фінал US Open – і нейтральная спартсменка на гэтым можа не спыніцца.
На хардавых «Шлемах» апошнія два гады Сабаленка наогул дамінуе – узяла два запар тытулы на Australian Open і вось другі раз запар прабілася ў фінал US Open. Чатыры хардавыя фіналы за два сезоны на турнірах «Вялікага Шлема» раней збіралі толькі Штэфі Граф, Моніка Селеш, Марціна Хінгіс і Вікторыя Азаранка. Праўда, апошняй так і не ўдалося ўзяць тытул на амерыканскім корце. У 2013-м Азаранка саступілі Серэне Уільямс (7:5, 6:7, 6:1), а ў 2020-м – японцы Наомі Осаке (6:1, 3:6, 3:6).
На US Open рэжымная спартсменка дамінавала практычна ў кожным сваім матчы – толькі 31-й ракетцы Кацярыне Аляксандравай удалося забраць у беларускі адзін сэт (у 1/16 фіналу 6:2, 1:6, 2:6).
Акрамя таго Сабаленка ўстанавіла незвычайнае дасягненне на цяперашнім турніры – сярэдняя хуткасць форхенда другой ракеткі свету складае 128,7 км/г. Па гэтым паказніку беларуска пераўзыходзіць тэнісістаў топ-3 мужчынскага рэйтынгу. Так, у Карласа Алькараса, які выбыў у другім коле US Open, ён складае 127,1 км/г, у Яніка Сінера, які працягвае барацьбу, – 125,5 км/г, а ў Новака Джокавіча, які прайграў у трэцім раўндзе, – 122,3 км/г.
Не дзіўна, што пасля кожнай перамогі Сабаленка не толькі дзякуе публіцы за падтрымку, але і шмат жартуе. Выбіўшы 7-ю ракетку кітаянку Чжэн Цыньвэнь (6:1, 6:2), беларуска адказала на пытанне, ці ведала яна, што на трыбуне падчас матчу прысутнічаў Роджэр Федэрэр. Сабаленка адказала, што бачыла экс-тэнісіста на вялікім экране, але сумняецца, што той прыйшоў менавіта на яе:
«Я амаль упэўненая, што ён прыйшоў паглядзець на Тыяфа і Дзімітрава, але ўсё роўна я падумала: «Добра, я павінна паказаць свой найлепшы тэніс, каб яму спадабалася». Я павінна паказаць свае навыкі. Так, гэта быў прыемны момант. Прыемна бачыць яго побач».
А калі тэнісістцы нагадалі, што летась яна прайграла ў фінале амерыканцы пры шалёнай падтрымцы родных трыбун, і прапанавалі неяк прыцягнуць фанатаў на свой бок, Сабаленка не разгубілася і прапанавала ўсім выпіўку за яе кошт.
У паўфінале US Open Сабаленка сустракалася з 23-гадовай дачкой амерыканскага мільярдэра Эмай Навара, чый бацька Бэн зарабіў свае грошы на фінансавым рынку – яму належыць кампанія Sherman Financial Group, якая займаецца інвестыцыйнымі сэрвісамі (капітал прадпрымальніка ацэньваецца ў 3 мільярды долараў).
Бэн Навара сам нарадзіўся ў спартыўнай сям'і – яго бацька Фрэнк быў трэнерам па амерыканскім футболе. Мужчына з дзяцінства трэнаваў сваіх дзяцей, а іх у сям'і было сямёра, і таму кожны мусіў самастойна аплочваць навучанне ў каледжы. Бэн з маладосці прывык сам сябе забяспечваць – напрыклад, апошнія два гады аплачваў навучанне з даходу ад уласнага бізнесу – продажу рэкламы на крэдытных картах.
У верасні 2018-га, пасля няўдалай спробы купіць каманду НФЛ «Караліна Пантэрз» Бэн Навара набыў турнір WTA у Чарлстане, а праз два гады дадаў у свой «партфель» «Мастэрс» у Цынцынаці.
Нягледзячы на тое, што бацька ўсяляк спрыяў кар'еры дачкі –аплачваў трэнінгі, а на турніры ў Чарльстане амерыканка пяць разоў атрымлівала wild card, – нельга абясцэньваць і намаганні спартсменкі. У свае 23 Навара займае 12-ю пазіцыю ў сусветным рэйтынгу, а на пачатку гэтага года ўзяла тытул на турніры ў Хобаце.
У матчы супраць Сабаленкі Навара прадэманстравала і байцоўскі характар – у другім сэце амерыканка скарысталася памылкамі суперніцы і здолела перавесці гульню на тай-брэйк. Але супраць праймавай Сабаленкі гэтага было недастаткова.
Пасля матчу Сабаленка зноў звярнулася да мясцовай публікі: «Рабяты, цяпер вы заўзееце за мяне? Ого. Трохі позна. Атрымае хто-небудзь сёння вечарам бясплатную выпіўку? Рабяты, усім «Маргарыту»! – сказала беларуска.
У фінале беларускай тэнісістцы будзе супрацьстаяць яшчэ адна спадчынніца мільярдэра. Бацька 30-гадовай Джэсікі Пегулы –Тэрэнс – у 1983-м пазычыў у родных і сяброў 7500 долараў і заснаваў кампанію East Resources. Кампанія паступова развівалася, Пегула купляў зямлю ў штатах Нью-Ёрк і Віргінія і ў канцы нулявых магутна падняўся, калі ў прыналежнай яму зямлі выявілі газ, які можна было здабываць пры дапамозе гідраўлічнага разрыву пласта.
У 2010-м Пегула прадаў большую частку актываў кампаніі за 4,7 мільярды долараў, а ў 2014-м збыў рэшту, зарабіўшы яшчэ 1,75 мільярда.
Цяпер бізнэсмэн засяроджаны на спорце і індустрыі забаў. Яму належаць пяць спартыўных каманд з Бафала, уключна з «Бафала Сэйбрз» (НХЛ) і «Бафала Білс» (НФЛ). У барацьбе за клуб НФЛ Пегула абышоў Дональда Трампа. Той пасля гэтага з крыўдай напісаў у твітары: «Ого, рэйтынгі НФЛ моцна падаюць. Рады, што не купіў «Білс».
«Білс», дарэчы, ўжо павіншавалі 6-ю ракетку свету з выхадам у фінал.
Нягледзячы на заможнасць сваёй сям'і, Пегула не шыкуе. Аднойчы дзяўчына расказвала, што не лятае па турнірах прыватным самалётам: «Я б хацела. Але не, лятаю ў эканоме побач з прыбіральняй, як усе астатнія».
Пегула ўсведамляе, што яе гісторыя можа не вельмі прыцягваць простых людзей, але сама спрабуе «быць прасцейшай».
Фінал US Open стане рэмэйкам нядаўнягя фіналу турніра ў Цынцынаці, дзе галоўны прыз таксама дзялілі Сабаленка і Пегула. Тады мацнейшай аказалася беларуска 6:3, 7:5 – менавіта яна лічыцца фаварытам у вырашальным матчы US Open, які адбудзецца 7 верасня ў 23.00 па мінскім часе.
Сабаленка зноў заблыталася ў колькасці бойфрэндаў. Папярэдні раз то было перад смерцю Кальцова
Сёлета прызавы фонд турніру ў ЗША складае 75 мільёнаў долараў, што на 15% больш у параўнанні з мінулым годам. Пераможца папоўніць свой банкаўскі рахунак на 3,6 мільёна долараў (леташняя пераможца Коры Гаўф атрымала ўсяго 3 мільёны). Тэнісістку, якая прайграе ў суботу, суцешаць 1,8 мільёна, што на 300 тысяч больш, чым летась. Але ўсе гэтыя лічбы да выліку падаткаў.
Іншыя пасты карыстальніка
